ନୂଆଦିଲ୍ଲୀ,୧୮-୪: ଋଣରେ ବୁଡ଼ି ଯାଇଥିବା ଜେଟ୍ ଏୟାରଓ୍ବେଜରେ ଦୀର୍ଘ ୨୫ ବର୍ଷ ପରେ ତାଲା ଝୁଲିଲା। ପରିଚାଳନ ବ୍ୟବସ୍ଥାକୁ ଜିଇଁ ରଖିବା ଲାଗି କମ୍ପାନୀ ମ୍ୟାନେଜମେଣ୍ଟ ବ୍ୟାଙ୍କଗୁଡ଼ିକ(ଋଣପ୍ରଦାନକାରୀ)ଠାରୁ ଜରୁରୀକାଳୀନ ଭିତ୍ତିରେ ୪୦୦ କୋଟି ଟଙ୍କା ଦେବାକୁ କହିଥିଲେ। କିନ୍ତୁ ସେମାନେ ଏହାକୁ ପ୍ରତ୍ୟାଖ୍ୟାନ କରିଦେଇଛନ୍ତି। ବୁଧବାର ରାତିରୁ ଜେଟ୍ ଏୟାରଓ୍ବେଜ ସମସ୍ତ ଉଡ଼ାଣକୁ ସାମୟିକ ଭାବେ ସ୍ଥଗିିତ କରିଦେଇଛି। ଏଭଳି ଭାବେ ବୁଧବାର ରାତିରୁ ଜେଟ୍ରେ ପରିଚାଳନା ବନ୍ଦ ହୋଇଯାଇଛି। ବୁଧବାର ରାତି ୧୦.୩୦ରେ ମୁମ୍ବାଇରୁ ଦିଲ୍ଲୀରେ ଜେଟ୍ର ଶେଷ ଫ୍ଲାଇଟ ୯ଡବ୍ଲ୍ୟୁ-୨୫୦୨ ପହଞ୍ଚତ୍ତ୍ଥିଲା। ତେବେ ଏହା ପୁନର୍ବାର କେବେ ଠାରୁ କାର୍ଯ୍ୟକ୍ଷମ ହେବ କେହି ଜାଣିନାହାନ୍ତି। ନୂଆ ମ୍ୟାନେଜମେଣ୍ଟ, ନୂଆ ମାଲିକ ଆସିବା ପରେ ହିଁ ପୁଣିଥରେ ଏହାର ବିମାନ ଉଡ଼ିବ ବୋଲି ଆଶାକରାଯାଉଛି। ମାତ୍ର କେଇ ଦିନ ପୂର୍ବେ ଜେଟ୍ ୨୬ ବର୍ଷର ଉଡ଼ାଣ ଯାତ୍ରା ପୂର୍ଣ୍ଣ କରି ଘରୋଇ ବିମାନ କ୍ଷେତ୍ରରେ ସର୍ବାଧିକ ଉଡ଼ିବାର ରେକର୍ଡ ହାସଲ କରିଥିଲା। ସିଇଓ ବିନୟ ଦୁବେ କର୍ମଚାରୀଙ୍କୁ ଭାବବିହ୍ବଳ ଇ-ମେଲ ପଠାଇ କମ୍ପାନୀର ନିଷ୍ପତ୍ତି ସମ୍ପର୍କରେ ଜଣାଇ ଦେଇଥିଲେ।
ସେଥିରେ ସେ ଲେଖିଥିଲେ ଯେ, ଉଡାଣ ଜାରି ରଖିବା ଲାଗି ଜରୁରୀ ପାଣ୍ଠି ଯୋଗାଇବାକୁ କମ୍ପାନୀ ପକ୍ଷରୁ ବାରମ୍ବାର ଅନୁରୋଧ କରାଯିବା ସତ୍ତ୍ୱେ ବ୍ୟାଙ୍କଗୁଡ଼ିକ ଏହା ଶୁଣି ନଥିଲେ। ଏଣୁ ଆଉ ବିମାନ ଉଡ଼ାଣ ସମ୍ଭବ ନୁହେଁ। ଜେଟ୍ର ଶେଷ ବିମାନ ଉଡ଼ାଣ ଦୁଇଟି କାରଣରୁ ପ୍ରତୀକାମତ୍କ ଥିଲା। ବୁଧବାର ମୁମ୍ବାଇରୁ ବୋଇଂ ୭୩୭ ବିମାନ ଦିଲ୍ଲୀରେ ପହଞ୍ଚତ୍ବା ପରେ ସମସ୍ତ ଉଡ଼ାଣ ବନ୍ଦ କରାଯାଇଥିଲା। ୧୯୯୩ ମେ ୫ରେ ଏଭଳି ଏକ ବୋଇଂ ବିମାନ ବି୭୩୭ ବିମାନ ମୁମ୍ବାଇରୁ ଅହମ୍ମଦାବାଦ୍ ଉଡ଼ିଥିଲା, ଯାହା କି ଜେଟ୍ ଏୟାରଓ୍ବେଜର ପ୍ରଥମ ଫ୍ଲାଇଟ ଥିଲା। ସୂଚନାଥାଉ କି, ମଙ୍ଗଳବାର ଜେଟ୍ ବୋର୍ଡର ବୈଠକ ବସି ସିଇଓ ଦୁବେଙ୍କୁ ନିଷ୍ପତ୍ତି ନେବାର ପୂର୍ଣ୍ଣ କ୍ଷମତା ଦେଇଥିଲା।
ଜରୁରୀକାଳୀନ ଭିତ୍ତିରେ ୪୦୦ କୋଟି ଟଙ୍କା ସହାୟତା ମାଗିବାକୁ ନିଷ୍ପତ୍ତି ହୋଇଥିଲା। ଏହା ନ ମିଳିଲେ ଯେ କୌଣସି ସମୟରେ କମ୍ପାନୀରେ ତାଲା ଝୁଲାଇବାକୁ ଦୁବେଙ୍କୁ କ୍ଷମତା ପ୍ରଦାନ କରାଯାଇ ଥିଲା। ତେବେ ଜେଟ୍ର ପରମିଟ ରଦ୍ଦ ହୋଇଯିବାର ବିପଦ ରହିଛି। କାରଣ ପରମିଟ ଜାରି ରଖିବାକୁ ହେଲେ ଅତିକମ୍ରେ ୫ ବିମାନ ଚଳାଇବାକୁ ହେବ। ଜରୁରୀ ପାଣ୍ଠି ନ ମିଳିବାରୁ କର୍ମଚାରୀଙ୍କ ମଧ୍ୟରେ ନୈରାଶ୍ୟ ଖେଳି ଯାଇଛି। ସେମାନଙ୍କର ସବୁ ଆଶା ମଉଳି ଯାଇଥିବା କର୍ମଚାରୀମାନେ କହିଛନ୍ତି। ଉଲ୍ଲେଖଥାଉ କି, ଜେଟ୍ ଉପରେ ଏବେ ପ୍ରାୟ ୮ ହଜାର କୋଟି ଟଙ୍କାର ଋଣ ରହିଛି।