ଚେନ୍ନାଇ,୩୦।୫(ପି.ଟି.): ଶେଷରେ ପୂର୍ବତନ ବିଶ୍ୱ ଚେସ୍ ଚାମ୍ପିୟନ ବିଶ୍ୱନାଥନ୍ ଆନନ୍ଦ ସ୍ବଦେଶ ପ୍ରତ୍ୟାବର୍ତ୍ତନ କରିବେ। କୋଭିଡ୍-୧୯ ମହାମାରୀ କାରଣରୁ ଲାଗୁ ଥିବା ଯାତ୍ରା କଟକଣା ପାଇଁ ସେ ଜର୍ମାନୀରେ ୩ ମାସ ଫସି ରହିଥିଲେ। ଆନନ୍ଦ ଶନିବାର ଭାରତ ପ୍ରତ୍ୟାବର୍ତ୍ତନ କରିଥିବା ତାଙ୍କ ସ୍ତ୍ରୀ ଅରୁଣା କହିଛନ୍ତି।
ଆନନ୍ଦ ଫ୍ରାଙ୍କଫର୍ଟରୁ ଏୟାର ଇଣ୍ଡିଆ ବିମାନ (ଏ ୧- ୧୨୦)ରେ ଶୁକ୍ରବାର ରାତିରେ ଯାତ୍ରା ଆରମ୍ଭ କରିଥିଲେ। ସେ ଦିଲ୍ଲୀ ବାଟ ଦେଇ ବେଙ୍ଗାଲୁରୁରେ ଶନିବାର ପହଞ୍ଚିଛନ୍ତି। କର୍ନାଟକ ସରକାରଙ୍କ ନିୟମ ଅନୁସାରେ ୧୪ ଦିନ କ୍ୱାରାଣ୍ଟାଇନ୍ରେ ରହିବେ ବୋଲି ଅରୁଣା କହିଛନ୍ତି। ଜର୍ମାନୀରେ ବୁଣ୍ଡେସଲିଗା ଚେସ୍ ଲିଗ୍ ଖେଳିବାପରେ ତାଙ୍କର ଭାରତ ଫେରିବାର କାର୍ଯ୍ୟକ୍ରମ ଥିଲା। ମାତ୍ର କରୋନା ଭାଇରସ୍ ମହାମାରୀ କାରଣରୁ ସବୁ କାର୍ଯ୍ୟକ୍ରମ ବାତିଲ ହୋଇଥିଲା। ଲକ୍ ଡାଉନ୍ ଯୋଗୁ ସେ ସ୍ବଦେଶ ଫେରିପାରି ନ ଥିଲେ। ଫଳରେ ସେ ଫ୍ରାଙ୍କଫର୍ଟରେ ରହିକ୍ୟାଣ୍ଡିଡେଟ୍ସ ଚେସ୍ ଟୁର୍ନାମେଣ୍ଟ ପାଇଁ ଅନ୍ ଲାଇନ୍ କମେଣ୍ଟ୍ରି କରୁଥିଲେ। କିନ୍ତୁ ଏହି ଟୁର୍ନାମେଣ୍ଟ ମଧ୍ୟ ମହାମାରୀ କାରଣରୁ ଅଧାରୁ ବାତିଲ ହୋଇଥିଲା। ଚଳିତ ମାସ ପ୍ରାରମ୍ଭରେ ଖେଳାଯାଇଥିବା ଅନ୍ଲାଇନ୍ ନେସନ୍ସ କପ୍ରେ ସେ ଭାରତର ନେତୃତ୍ୱ ନେଇଥିଲେ। ଜର୍ମାନୀରେ ଫସି ରହିଥିବା ବେଳେ ଆନନ୍ଦ ଭିଡିଓ କଲ୍ ମାଧ୍ୟମରେ ପରିବାର ସହିତ ସମ୍ପର୍କରେ ଥିଲେ ଓ ଚେସ୍ ସମ୍ପର୍କିତ କାର୍ଯ୍ୟରେ ନିଜକୁ ବ୍ୟସ୍ତ ରଖୁଥିଲେ।