ପ୍ୟାରିସ୍,୩୦।୪ (ଏଏଫ୍ପି): କୋଭିଡ-୧୯ ମହାମାରୀ କାରଣରୁ ଜର୍ମାନୀ, ନେଦରଲାଣ୍ଡ୍ସ ଓ ଫିନ୍ଲାଣ୍ଡରେ ଆୟୋଜନ ହେବାକୁଥିବା ମୋଟୋ ଗ୍ରାଁ ପ୍ରି ରେସ୍ଗୁଡିକୁ ବାତିଲ କରାଯାଇଛି। ଜୁନ୍ ଓ ଜୁଲାଇରେ ଏହି ରେସ୍ଗୁଡିକ ଆୟୋଜନ ହେବାର କାର୍ଯ୍ୟକ୍ରମ ଥିଲା। ତେବେ ଏଗୁଡିକୁ ବାତିଲ କରିବାକୁ ନିଷ୍ପତ୍ତି ନିଆଯାଇଛି ବୋଲି ଅନ୍ତର୍ଜାତୀୟ ମୋଟୋର ସାଇକ୍ଲିଂ ଫେଡେରେଶନ (ଏଫ୍ଆଇଏମ୍) ଓ ପ୍ରମୋଟର ଡୋର୍ନା ସ୍ପୋଟର୍ସ ତରଫରୁ ଘୋଷଣା କରାଯାଇଛି। କରୋନ ଭାଇରସ ସଂକ୍ରମଣ କାରଣରୁ ଏପରି କଷ୍ଟକର ନିଷ୍ପତ୍ତି ନେବାକୁ ହେଲା ବୋଲି କୁହାଯାଇଛି।
ଜର୍ମାନ ଗ୍ରାଁ ପ୍ରି ଜୁନ୍ ୧୯ରୁ ୨୧ ତାରିଖ ମଧ୍ୟରେ ଆୟୋଜନ ହେବାର କାର୍ଯ୍ୟକ୍ରମ ଥିଲା। ସେହିପରି ଡଚ୍ ମୋଟୋ ଗ୍ରାଁ ପ୍ରି ଜୁନ୍ ୨୬ରୁ ୨୮ ଓ ଫିନ୍ଲାଣ୍ଡରେ ମୋଟୋ ରେସ୍ ଜୁଲାଇ ୧୦ରୁ ୧୨ ତାରିଖ ମଧ୍ୟରେ ଆୟୋଜନ ହୋଇଥାନ୍ତା। କରୋନ ଭାଇରସ ସଂକ୍ରମଣକୁ ରୋକିବା ପାଇଁ ଏହି ୩ଟି ଦେଶରେ ଲୋକଙ୍କୁ ଏକାଠି ହେବାକୁ ମନା କରାଯାଇଛି। ଏହି ୩ଟି ରେସ୍ ବାତିଲ କରିବା ନିଷ୍ପତ୍ତି ନିହାତି କଷ୍ଟକର ଥିଲା ବୋଲି ଡୋର୍ନା ମୁଖ୍ୟ କାର୍ଯ୍ୟ ନିର୍ବାହୀ କାର୍ମେଲୋ ଏଜପେଲେଟା କହିଛନ୍ତି। ପୂର୍ବରୁ ୨୦୨୦ ସେସନର ପ୍ରଥମ ୮ ରାଉଣ୍ଡ ବାତିଲ କରାଯାଇସାରିଛି।