ବଅଁରପାଳ, ୨୪ା୫(ଡି.ଏନ.ଏ.)- ବଅଁରପାଳ ବ୍ଲକ ଗିରାଙ୍ଗ ଗୋଚ୍ଛାୟତ ସାହିରେ ଲାଗି ରହିଛି ପାନୀୟ ଜଳ ସଙ୍କଟ। ସାହିବାସୀ ପାଣି ମୁନ୍ଦେ ପାଇଁ ନାହିଁ ନ ଥିବା ଅସୁବିଧା ଭୋଗୁଛନ୍ତି। ସାହିରେ ପାନୀୟ ଜଳର କୌଣସି ବ୍ୟବସ୍ଥା ନ ଥିବାବେଳେ ଏକମାତ୍ର ଖୋଲା କୂଅ ପରିତ୍ୟକ୍ତ ଅବସ୍ଥାରେ ରହିଛି। ଫଳରେ ସାହି ନିକଟରେ ଥିବା ଏକ ନଳକୂଅ ଉପରେ ନିର୍ଭର କରୁଛନ୍ତି ପ୍ରାୟ ୪୦ ପରିବାର।
ସାହିବାସୀଙ୍କ କହିବା ମୁତାବକ, ପୂର୍ବରୁ ଲାଗି ରହିଥିବା ଜଳ ସମସ୍ୟା ଏବେ ବଢିଯାଇଛି। ସରକାରଙ୍କ ପକ୍ଷରୁ ସାହି ମଧ୍ୟରେ ଗୋଟିଏ ହେଲେ ନଳକୂଅର ବ୍ୟବସ୍ଥା କରାଯାଇନାହିଁ। ଏକମାତ୍ର ସରକାରୀ ଖୋଲାକୂଅଟି ଏବେ ପରିତ୍ୟକ୍ତ ଅବସ୍ଥାରେ। ସାହିଠାରୁ ଦୂରରେ ଥିବା ୨ଟି ନଳକୂଅ ମଧ୍ୟରୁ ଗୋଟିଏ ଅଚଳ ହୋଇପଡିଛି। ଫଳରେ ଆଉ ଗୋଟିଏ ନଳକୂଅରେ ସାହିର ୪୦ ପରିବାର ନିର୍ଭର କରୁଥିଲେ ହେଁ ସେଥିରୁ ଆବଶ୍ୟକ ମୁତାବକ ପାଣି ବାହାରୁନାହିଁ। ଏହା ନାଲ୍କୋ ପାର୍ଶ୍ୱବର୍ତ୍ତୀ ଗ୍ରାମ ହୋଇଥିବାରୁ ପ୍ରକଳ୍ପ ପକ୍ଷରୁ ପାଇପ୍ ଯୋଗେ ପାଣି ଯୋଗାଯିବା ସହ ସରକାରଙ୍କ ପକ୍ଷରୁ ଏଠାରେ ନଳକୂଅ ଖୋଳିବାକୁ ସାହିବାସୀ ଦାବି କରିଛନ୍ତି। ଏ ସମ୍ପର୍କରେ ସାହିର ଭାଗିରଥୀ ଗୋଚ୍ଛାୟତ, ମନିଷା ଗୋଚ୍ଛାୟତ, ପ୍ରଜାପତି ଗୋଚ୍ଛାୟତ ପ୍ରମୁଖ କୁହନ୍ତି, ପାଣି ପାଇଁ ବହୁ ଅସୁବିଧା ଭୋଗିବାକୁ ପଡୁଛି। ସାହିଠାରୁ ଅଳ୍ପ ଦୂରରେ ଥିବା ଗୋଟିଏ ନଳକୂଅ ଶୋଷ ମେଣ୍ଟାଇପାରୁନି। ଫଳରେ ଦୂର ବାଟରୁ ପାଣି ବୋହି ଘରକୁ ଆଣିବାକୁ ପଡୁଛି। ନାଲ୍କୋ ପକ୍ଷରୁ ଜଳ ଯୋଗାଣ କିମ୍ବା ସରକାରଙ୍କ ପକ୍ଷରୁ ପାନୀୟ ଜଳ ବ୍ୟବସ୍ଥା କରାଗଲେ ସାହିବାସୀଙ୍କ ସମସ୍ୟା ଦୂର ହୁଅନ୍ତା।