ବସ୍ତା, ୨୪।୬(ସ୍ବ.ପ୍ର.)- ୬୦ନଂ. ଜାତୀୟ ରାଜପଥର ବସ୍ତା ଥାନା ଅନ୍ତର୍ଗତ ଭେଲୋରା -ରାଜଘାଟ ମଝିରେ ଏକ ଟମାଟୋ ବୋଝେଇ ଟ୍ରକ ସୋମବାର ମଧ୍ୟାହ୍ନରେ ହଠାତ୍ ଜଳିଯାଇଥିବା ଜଣାପଡିଛି । ଆନ୍ଧ୍ରପ୍ରଦେଶରୁ ପଶ୍ଚିମବଙ୍ଗ ଅଭିମୁଖେ ଯାଉଥିବା ଏହି ଟ୍ରକ (ନଂ.ଡବ୍ଲ୍ୟୁବି -୪୧-୦୫୧୦)ରେ ନିଆଁ ଲାଗିଯାଇଥିବା ଦେଖି ଲୋକେ ଡ୍ରାଇଭରଙ୍କୁ ଜଣାଇଥିଲେ । ଫଳରେ ଡ୍ରାଇଭର ଓ ହେଲପର ତୁରନ୍ତ ଗାଡିକୁ ଅଟକାଇ ସେଥିରୁ ବାହାରି ଆସିଥିଲେ। ଧୀରେ ଧୀରେ ନିଆଁର ପ୍ରକୋପ ବଢି ଟ୍ରକ ଜଳିବାକୁ ଲାଗିଥିଲା। ଏ ନେଇ ଲୋକେ ବସ୍ତା ଦମକଳ ବାହିନୀକୁ ଖବର ଦେଇଥିଲେ। ବସ୍ତା ଦମକଳ କର୍ମଚାରୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ । ଫଳରେ ଗାଡିରେ ଭର୍ତ୍ତି ଥିବା ବହୁ ବିଲାତି ପେଟି କ୍ଷତିରୁ ବଞ୍ଚି ଯାଇଥିଲା। ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ସର୍ଟସର୍କିଟରୁ ଏହି ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଛି ।