ଆନନ୍ଦପୁର,୨୦। ୬(ସ୍ବ.ପ୍ର.)- ଆନନ୍ଦପୁର ଉପଖଣ୍ଡ ରାମଚନ୍ଦ୍ରପୁର ଓଭରବ୍ରିଜ୍ ଠାରେ ଏକ ତେଲ ବୋଝେଇ ପିକ୍ ଅପ୍ ଭ୍ୟାନ ହଠାତ୍ ଅଗ୍ନିକାଣ୍ଡରେ ଜଳିଯାଇଛି। ଗାଡିର ଚାଳକ ଅଳପକେ ବର୍ତ୍ତିଯାଇଥିବାବେଳେ ତେଲ ପେଟି ଗୁଡିକୁ ସ୍ଥାନୀୟ ଲୋକମାନେ ଉଦ୍ଧାର କରିବାରେ ସଫଳ ହୋଇଛନ୍ତି। ଯାଜପୁର ପାର୍ଶ୍ୱରୁ ଏକ ପିକ୍ ଅପ୍ ଭ୍ୟାନ୍ ଖାଇବା ତେଲ ବୋଝେଇ କରି ଆନନ୍ଦପୁର ଅଭିମୁଖେ ଯାଉଥିଲା। ରାମଚନ୍ଦ୍ରପୁର ଓଭରବ୍ରିଜ ଠାରେ ଗାଡିର ଇଞ୍ଜିନ୍ ପାର୍ଶ୍ୱ ନିଆଁ ହୁତ୍ ହୁତ୍ ହୋଇ ଜଳିବାରେ ଲାଗିଥିଲା। ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବା ସହିତ ଭ୍ୟାନ୍ରୁ ତେଲ ପେଟି ଗୁଡିକୁ ସୁରକ୍ଷିତ ବାହାର କରିବାରେ ସଫଳ ହୋଇଥିଲେ। ତେବେ ଅଗ୍ନିକାଣ୍ଡ କେଉଁ କାରଣରୁ ଘଟିଥିଲା ତାହା ଜଣାପଡି ନ ଥିବାବେଳେ ଏହା ସର୍ଟ ସର୍କିଟରୁ ହୋଇଥାଇପାରେ ବୋଲି ଅନୁମାନ କରାଯାଉଛି।