କାମାକ୍ଷାନଗର, ୧୩।୧(ଡି.ଏନ.ଏ.) ଢେଙ୍କାନାଳ ଜିଲା କାମାକ୍ଷାନଗର ବ୍ଲକ ହାଟୁଆରୀ ଗ୍ରାମ ନିକଟରେ ରବିବାର ଅପରାହ୍ନରେ ନିଆଁ ଲାଗି ୧୦ ଚାଷୀଙ୍କ ୧୦ ଏକର ଆଖୁ ଫସଲ ପୋଡ଼ିଯାଇଛି। ନିଆଁର ପ୍ରକୋପରେ ଅଗ୍ନିଶମ ଗାଡ଼ି ମଧ୍ୟ ବର୍ତ୍ତିନାହିଁ। ଖବର ଲେଖାଯିବା ସୁଦ୍ଧା ନିଆଁକୁ ସମ୍ପୂର୍ଣ୍ଣ ଆୟତ୍ତ କରାଯାଇପାରିନାହିଁ। ଫଳରେ ଅବଶିଷ୍ଟ ୩୦ ଏକର ଫସଲ ଉପରେ ବିପଦ ଘନେଇବାରେ ଲାଗିଛି।
ଜମିରେ ନିଆଁ ଲାଗିଥିବା ଦେଖି ଚାଷୀମାନେ କାମାକ୍ଷାନଗର ଅଗ୍ନିଶମ ବିଭାଗକୁ ସୂଚନା ଦେଇଥିଲେ। ଘଟଣାସ୍ଥଳକୁ ଯାଇଥିବା ଅଗ୍ନିଶମ ବାହିନୀର ଗାଡ଼ି (ନଂ. ଓଡି ୩୩ ସି ୨୩୪୬) ଚକାରେ ନିଆଁ ଲାଗିଯାଇଥିଲା। ଫଳରେ ଜମିରେ ଲାଗିଥିବା ନିଆଁ ଲିଭାଇବାରେ ସମସ୍ୟା ଉପୁଜିଥିଲା। ପ୍ରତ୍ୟକ୍ଷଦର୍ଶୀଙ୍କ କହିବା କଥା, ରଙ୍ଗମାଟିଆ ଗ୍ରାମ ପାର୍ଶ୍ୱରୁ କୌଣସି କାରଣରୁ ନିଆଁ ଲାଗି ଭୟଙ୍କର ରୂପ ନେଇଥିଲା। ଚାଷୀମାନେ ଏକର ପ୍ରତି ୨୦ ହଜାର ଟଙ୍କା ହିସାବରେ ଲକ୍ଷେରୁ ଦେଢ଼ ଲକ୍ଷ ଟଙ୍କା ଯାଏ ଋଣ କରିଥିଲେ। ଆଖୁ ଅମଳ ହୋଇଥିଲେ ଏହାକୁ ଶକ୍ତି ସୁଗାର୍ସକୁ ବିକ୍ରିକରି ଋଣ ପରିଶୋଧ କରିବାକୁ ଯୋଜନା କରିଥିଲେ। ହେଲେ ଫସଲ ନଷ୍ଟ ହୋଇଯିବାରୁ କ୍ଷତିଗ୍ରସ୍ତ ଚାଷୀ ସରୋଜ ପଣ୍ଡା, ଦୁଷ୍ମନ୍ତ ମହାନ୍ତି, ଶ୍ରୀକର ମଳିକ, ବସନ୍ତ ମଳିକ, ଗୋବିନ୍ଦ ମଳିକ, ଖଗେଶ୍ୱର ମଳିକ, ନାରାୟଣ ପଣ୍ଡା, ପ୍ରଭାକର ପଣ୍ଡା, ଫଗୁନାଥ ଖୁଣ୍ଟିଆ, କେଶବ ବିହାରୀ, କୈଳାସ ପଣ୍ଡା, ରମେଶ ମଳିକଙ୍କ ମୁଣ୍ଡରେ ଚଡ଼କ ପଡ଼ିଛି।
ଏ ନେଇ ଅଗ୍ନିଶମ କେନ୍ଦ୍ର ଅଧିକାରୀ ସରୋଜ ମହାପାତ୍ର କୁହନ୍ତି, ନିଆଁକୁ ଆୟତ୍ତକୁ ଆଣିବାକୁ ଉଦ୍ୟମ କରାଯାଉଛି। ପରିସ୍ଥିତି ନିୟନ୍ତ୍ରଣରେ ରହିଛି। ଗାଡ଼ି ଚକା ପୋଡ଼ିଯାଇଥିବାରୁ ସମସ୍ୟା ହୋଇଥିଲା। ଅନ୍ୟ ଏକ ଗାଡ଼ି ନିଆଁଲିଭା କାର୍ଯ୍ୟରେ ନିୟୋଜିତ ଅଛି। ବରିଷ୍ଠ ଆଗ୍ନିକ ଅମରଜିତ ପ୍ରଧାନ, ଯୋଗେନ୍ଦ୍ର ସାହୁ ସହଯୋଗ କରିଥିଲେ।
