ଜଳେଶ୍ୱର, ୨୫ା୬(ଡି.ଏନ.ଏ.)-ବାଲେଶ୍ୱର ଜିଲା ଜଳେଶ୍ୱର ସହରର ବିଭିନ୍ନ ବଜାରରେ ଥିବା ଜଳଖିଆ ଦୋକାନ ଉପରେ ମଙ୍ଗଳବାର ସ୍ବାସ୍ଥ୍ୟ ବିଭାଗର ଅଧିକାରୀଙ୍କ ପକ୍ଷରୁ ଚଢାଉ କରାଯାଇ ଖାଦ୍ୟର ମାନ ଯାଞ୍ଚ କରାଯାଇଛି। ସିଡିଏମ୍ଓ ଦୁଲାଲସେନ ଜଗଦେବଙ୍କ ନିର୍ଦ୍ଦେଶକ୍ରମେ ଖାଦ୍ୟ ନିରାପତ୍ତା ଅଧିକାରୀ ଅନୁଶ୍ରୀ ଖଟୁଆ, କର୍ମଚାରୀ ନିତ୍ୟାନନ୍ଦ ପତି ସଦଳବଳେ ଚଢ଼ାଉ କରି ଜଳଖିଆ ଦୋକାନରେ ବିକ୍ରି ହେଉଥିବା ବିଭିନ୍ନ ପ୍ରକାର ମିଠା ଓ ତେଲଭାଜି ଖାଦ୍ୟକୁ ପରୀକ୍ଷା ନିରୀକ୍ଷା କରିବା ପରେ ତାହାର କିଛି ନମୁନା ନିଜ ସହିତ ନେଇଯାଇଛନ୍ତି। ଏଥିସହିତ ଖାଦ୍ୟ ପ୍ରସ୍ତୁତ ହେଉଥିବା ରୋଷେଇ ଘରକୁ ମଧ୍ୟ ଅଧିକାରୀ ବୁଲି ପରିଷ୍କାର ପରିଚ୍ଛନ୍ନ ରଖିବା ପାଇଁ କଡ଼ା ତାଗିଦ୍ କରିଥିଲେ।
ଅଧିକାରୀମାନେ ପ୍ରଥମେ ଷ୍ଟେସନବଜାରସ୍ଥିତ କାଳିକା ସୁଇଟ୍ସ୍ ଜଳଖିଆ ଦୋକାନରେ ଚଢାଉ କରିଥିଲେ। ପରିଷ୍କାର, ପରିଚ୍ଛନ୍ନ ଅବଲମ୍ବନ ନେଇ ଅଧିକାରୀମାନେ ତାଗିଦ୍ କରିବା ପରେ ୭ଦିନିଆ ନୋଟିସ୍ ଜାରି କରିଛନ୍ତି। ଉକ୍ତ ନୋଟିସ୍ର ଜବାବ ସନ୍ତୋଷଜନକ ନ ହେଲେ ଆଇନ ଅନୁଯାୟୀ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଅଧିକାରୀମାନେ ସୂଚନା ଦେଇଛନ୍ତି। ଏହାବ୍ୟତିତ ଷ୍ଟେଶନବଜାର ଓ ବଡ଼ବଜାରସ୍ଥିତ ବିଭିନ୍ନ ଜଳଖିଆ ଏବଂ ହୋଟେଲରେ ମଧ୍ୟ ଚଢ଼ାଉ କରାଯାଇଥିଲା।
ଉଲ୍ଲେଖଯୋଗ୍ୟ ଯେ, ଆଜକୁ ୨ ଦିନ ପୂର୍ବେ କାଳିକା ସୁଇଟ୍ସ୍ ଦୋକାନରେ ଜଣେ ଗ୍ରାହକ ଉତ୍ତମ କୁମାର ସାହୁ ସିଙ୍ଗଡ଼ା କିଣି ଖାଉଥିବା ବେଳେ ସେଥିରେ ଏକ ମଲା ବିଛା ଦେଖିଥିଲେ। ଯାହାକୁ ନେଇ ତୀବ୍ର ଉତ୍ତେଜନା ଦେଖାଦେଇଥିଲା। ଫଳସ୍ବରୂପ ଜଳେଶ୍ୱର ଅଞ୍ଚଳର ସଚେତନ ନାଗରିକ, ବୁଦ୍ଧିଜୀବୀ ଓ ଗଣମାଧ୍ୟମ ପ୍ରତିନିଧି ଜିଲାର ସିଡିଏମ୍ଓଙ୍କ ଦୃଷ୍ଟି ଆକର୍ଷଣ କରିବା ପରେ ସ୍ବାସ୍ଥ୍ୟ ବିଭାଗ ତରଫରୁ ଏହି ଚଢ଼ାଉ କରାଯାଇଥିଲା। ସ୍ବାସ୍ଥ୍ୟ ବିଭାଗର ଖାମଖିଆଲି ନୀତି ଓ ନିୟମିତ ଯାଞ୍ଚ କରା ନ ଯିବା ଫଳରେ ଏଭଳି ଅନୁପଯୋଗୀ ବିଷାକ୍ତ ଖାଦ୍ୟ ଖୋଲା ବଜାରରେ ବିକ୍ରି ଚାଲିଛି। ଏଥିପ୍ରତି ତୁରନ୍ତ ଦୃଷ୍ଟି ଦେବା ପାଇଁ ସ୍ବାସ୍ଥ୍ୟ ଅଧିକାରୀଙ୍କ ନିକଟରେ ଜନସାଧାରଣ ଦାବି କରିଛନ୍ତି।