ଖୋର୍ଦ୍ଧା ଅଫିସ, ୨୪।୮: ଜଳ ନିଷ୍କାସନ ବ୍ୟବସ୍ଥାକୁ ଅଣଦେଖା କରି ନିର୍ମାଣ କରାଗଲା ଡ୍ରେନ। ଏଣୁ ବର୍ଷା ହେଲେ ବର୍ଷାଜଳ ସହ ନର୍ଦ୍ଦମା ଜଳ ରାସ୍ତା ଉପରେ ଯାଉଛି। ଠିକାଦାର ଡ୍ରେନ ନିର୍ମାଣ କରି ସରକାରୀ ଅନୁଦାନକୁ ହାତେଇ ନେଲେ। ପାଣି ଡ୍ରେନରେ ଯାଉ କି ରାସ୍ତାରେ ଯାଉ ତାଙ୍କର ଯାଆସ ନାହିଁ। ପ୍ରଶାସନିକ ସ୍ତରରେ ମଧ୍ୟ ଯାଞ୍ଚ ନାହିଁ। ସେହି ଏକା ଅବସ୍ଥା ହୋଇଛି ବଲାଙ୍ଗୀର-ଖୋର୍ଦ୍ଧା ୫୭ ନଂ. ଜାତୀୟ ରାଜପଥର ପୁରୁଣା ଦମକଳ ଛକ ଅଞ୍ଚଳରେ। ଏଠାରେ ମଧ୍ୟ ଜାତୀୟ ରାଜପଥ ଉପରେ ବର୍ଷାଜଳ ନର୍ଦ୍ଦମା ଜଳ ସହ ମିଶି ଯାଉଛି। ଯଦି ରାସ୍ତା ଉପରେ ପାଣି ଯିବ ଡ୍ରେନର ଆବଶ୍ୟକତା ନ ଥିଲା ବୋଲି କିଛି ଲୋକ କ୍ଷୋଭର ସହ କହିଛନ୍ତି।