ଛତ୍ରପୁର, ୨୬।୫(ଡି.ଏନ.ଏ)-ଗଞ୍ଜାମ ଜିଲାରେ ଚାଷୀଙ୍କଠାରୁ ବଳକା ଧାନ କିଣିବା ଦାବି ନେଇ ଋଷିକୂଲ୍ୟା ରୟତ ମହାସଭା ନେତୃତ୍ୱରେ ଚାଷୀମାନେ ମଙ୍ଗଳବାର ଜ଼ିଲାପାଳଙ୍କ ଅଫିସ ଆଗରେ ଧାନ ବସ୍ତା ରଖି ଆନ୍ଦୋଳନ କରିଛନ୍ତି। ପରେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ପ୍ରଦାନ କରଯାଇଥିଲା। ଜ଼ିଲାର ୧ ଲକ୍ଷ ୩୪ ହଜାର ୪୦୦ ଜଣ ଚାଷୀ ଖରିଫ ଧାନ ବିକ୍ରି ପାଇଁ ପଞ୍ଜିକରଣ କରିଥିଲେ। ଏଥିରୁ ୮୦ ହଜାର ୧୭ଜଣଙ୍କ ଧାନ କିଣାଯାଇଥିଲା। ଆହୁରି ପାଖାପାଖି ୫୪ ହଜାର ଚାଷୀଙ୍କଠାରୁ ଧାନ କିଣାଯାଇନି। ଫଳରେ ୪ ମାସ ହେଲା ଚାଷୀମାନେ ହତାଶ ହୋଇବସିଛନ୍ତି। କେତେକ ଚାଷୀ ବାଧ୍ୟ ହୋଇ ଆନ୍ଧ୍ର ବେପାରୀଙ୍କୁ ୭୦ କିଗ୍ରା ପ୍ରତି ୧୦୫୦ ଟଙ୍କାରେ ଧାନ ବିକିଥିବା ଅଭିଯୋଗ ହୋଇଛି। ସମବାୟ, ଯୋଗାଣ ଓ ରାଜସ୍ବ ବିଭାଗର କର୍ମଚାରୀ ଏନେଇ ମିଳିତ ସର୍ଭେ କରିଥିଲେ। ଏହି ରିପୋର୍ଟକୁ ରାଜ୍ୟ ସରକାରଙ୍କୁ ଜିଲାପାଳ ପଠାଇଥିଲେ। ଧାନ ବିକ୍ରି କରିପାରି ନ ଥିବା ଚାଷୀ ଋଣ କେମିତି ସୁଝିବ ବୋଲି ପ୍ରଶ୍ନ କରଯାଇଥିଲା। ଜ଼ିଲାପାଳଙ୍କଠାରୁ ଆରମ୍ଭ କରି ଯୋଗାଣ ବିଭାଗର କମିଶନରଙ୍କୁ ବାରମ୍ବାର ଜଣାଇଥିଲେ ମଧ୍ୟ ବଳକା ଧାନ କିଣିବା ପାଇଁ କୋଣସି ପଦକ୍ଷେପ ନିଆଯାଇନି। ଫଳରେ ଚାଷୀ ମାନେ ଦୁର୍ଦ୍ଦିନରେ ଅଛନ୍ତି। ଏହା ଚାଷୀଙ୍କୁ ବୋଝ ଉପରେ ନଳିତା ବିଡା ସଦୃଶ ବୋଲି କୁହାଯାଇଛି। ବଳକା ଧାନ କିଣିବା ସହ ଚାଷୀଙ୍କଠାରୁ ଋଣ ଅର୍ଥ ଆଦାୟ ନ କରିବାକୁ ଦାବି ହୋଇଛି। ଏଥିସହ ରବି ଫସଲ ମୁଗ, ଚିନାବାଦାମ, ଲଙ୍କା ମରିଚ କିଣିବା ବ୍ୟବସ୍ଥା କରିବାକୁ ମୁଖ୍ୟମନ୍ତ୍ରୀଙ୍କୁ ନିବେଦନ କରାଯାଇଛି। ଏହି ବ୍ୟବସ୍ଥା କଲେ ଚାଷୀ ଉପକୃତ ହୋଇପାରିବେ ବୋଲି କୁହାଯାଇଛି।