ନୂଆଦିଲ୍ଲୀ/ନ୍ୟୁୟର୍କ,୨୧ା୯: ଆମେରିକାର ନ୍ୟୁୟର୍କରେ ଜାତିସଂଘ ଜଳବାୟୁ ପରିବର୍ତ୍ତନ ସମ୍ମିଳନୀ ସୋମବାର ହେବ। ଏଥିରେ ଯୋଗଦେବା ପାଇଁ ଜାତିସଂଘ ମହାସଚିବ ଆଣ୍ଟୋନିଓ ଗୁଟେରେସ୍ ବିଶ୍ୱନେତାଙ୍କୁ ନିମନ୍ତ୍ରଣ କରିଛନ୍ତି। ଏହି ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯୋଗଦେଇ ଜଳବାୟୁ ପରିବର୍ତ୍ତନର ମୁକାବିଲା ପାଇଁ ଭାରତ ପକ୍ଷରୁ ନିଆଯାଇଥିବା ପଦକ୍ଷେପ ନେଇ ପକ୍ଷ ରଖିବେ। ମୋଦିଙ୍କ ଭାଷଣରେ ଏହି କ୍ଷେତ୍ରରେ ଭାରତର ସଫଳତା ଓ ଯୋଜନା ମୁଖ୍ୟ ବିଷୟ ହେବ ବୋଲି ଜଙ୍ଗଲ ଓ ପରିବେଶ ମନ୍ତ୍ରୀ ପ୍ରକାଶ ଜାଭଡେକର ସୂଚନା ଦେଇଛନ୍ତି।
ପରିବର୍ତ୍ତନଜନିତ ସବୁଜଗୃହ ବାଷ୍ପ ଉତ୍ସର୍ଜନକୁ ଆସନ୍ତା ଦଶନ୍ଧି ମଧ୍ୟରେ ୪୫% ହ୍ରାସ ଓ ୨୦୫୦ ସୁଦ୍ଧା ଶୂନ୍ୟ ନିର୍ଗମନ ପାଇଁ ଲକ୍ଷ୍ୟ ରଖାଯାଇଛି। ତେଣୁ ୨୦୨୦ ସୁଦ୍ଧା ଏହି କ୍ଷେତ୍ରରେ କେଉଁ ଦେଶର କ’ଣ ଅବଦାନ ରହିବ ତାକୁ ନେଇ ନିର୍ଦ୍ଦିଷ୍ଟ ଓ ବାସ୍ତବବାଦୀ ଯୋଜନା ସମ୍ପର୍କରେ ବିଶ୍ୱନେତାମାନେ ନିଜ ନିଜ ବକ୍ତବ୍ୟ ରଖିବେ। ଏହି ସମ୍ମିଳନୀ ସରକାର, ଘରୋଇ କ୍ଷେତ୍ର, ସିଭିଲ ସୋସାଇଟି, ସ୍ଥାନୀୟ କର୍ତ୍ତୃପକ୍ଷ ଓ ଅନ୍ୟ ଆନ୍ତର୍ଜାତିକ ସଙ୍ଗଠନଗୁଡ଼ିକୁ ଜଳବାୟୁ ପରିବର୍ତ୍ତନ ସମସ୍ୟାର ସମାଧାନ ପାଇଁ ଏକାଠି କରିବ। ଏହି ସମ୍ମିଳନୀର ବିଷୟବସ୍ତୁ ରଖାଯାଇଛି, ‘ଏ ରେସ୍ ଓ୍ବି କ୍ୟାନ୍ ଓ୍ବିନ୍, ଏ ରେସ୍ ଓ୍ବି ମଷ୍ଟ ଓ୍ବିନ୍’। ଏଥିରେ ଯୋଗଦେବା ପାଇଁ ଶତାଧିକ ଦେଶ ପକ୍ଷରୁ ଆବେଦନ କରାଯାଇଥିବାବେଳେ ସେଥିମଧ୍ୟରୁ ଅଧା ରାଷ୍ଟ୍ରର ଆବେଦନ ଖାରଜ ହୋଇଯାଇଛି। ପ୍ରାୟ ୬୦ ରାଷ୍ଟ୍ରମୁଖ୍ୟଙ୍କୁ ଏଥିରେ ସାମିଲ ହେବା ପାଇଁ ସୁଯୋଗ ଦିଆଯାଇଥିବା ଜାତିସଂଘ ପକ୍ଷରୁ କୁହାଯାଇଛି। ଏହା ପୂର୍ବରୁ ଶନିବାର ନ୍ୟୁୟର୍କରେ ଜାତିସଂଘ ପକ୍ଷରୁ ଯୁବ ଜଳବାୟୁ ସମ୍ମିଳନୀର ଅୟୋଜନ କରାଯିବ।