ନୂଆଦିଲ୍ଲୀ, ୨୦।୮ (ପି.ଟି.)- ଚଳିତ ବର୍ଷ ଶେଷ ଭାଗରେ ଅଷ୍ଟ୍ରେଲିଆରେ ହେବାକୁ ଥିବା ତ୍ରି-ରାଷ୍ଟ୍ରୀୟ ଜୁନିୟର ମହିଳା ହକି ପ୍ରତିଯୋଗିତା ପାଇଁ ସୋମବାର ୩୩ ଜଣିଆ ସମ୍ଭାବ୍ୟ ଭାରତୀୟ ଦଳ ଘୋଷଣା କରାଯାଇଛି। ହକି ଇଣ୍ଡିଆ ପକ୍ଷରୁ ଘୋଷଣା କରାଯାଇଥିବା ଏହି ୩୩ ଜଣିଆ ଜୁନିୟର ମହିଳା ହକି ଦଳରେ ଓଡ଼ିଶାରୁ ୩ ଜଣ ଖେଳାଳି ସ୍ଥାନ ପାଇଛନ୍ତି। ସେମାନେ ହେଲେ ମିଡ୍ଫିଲ୍ଡର ମାରିଆନା କୁଜୁର ଓ ଆଜମିନ କୁଜୁର ଏବଂ ଫର୍ଓ୍ବାର୍ଡ ଜୀବନ କିଶୋରୀ ଟପ୍ନୋ। ମୁଖ୍ୟ କୋଚ୍ ବଲ୍ଜିତ୍ ସିଂ ସଇନି ତତ୍ତ୍ୱାବଧାନରେ ଏ ସମସ୍ତ ଖେଳାଳିଙ୍କୁ ନେଇ ଏକ ଜାତୀୟ କ୍ୟାମ୍ପ୍ ସେପ୍ଟେମ୍ବର ୧୪ ପର୍ଯ୍ୟନ୍ତ ଅନୁଷ୍ଠିତ ହେବ। ଏହି କ୍ୟାମ୍ପ୍ରେ ଫିଟ୍ନେଶ ଓ ରିଦିମ୍ ଉପରେ ଫୋକସ୍ କରାଯିବା ସହ ତ୍ରି-ରାଷ୍ଟ୍ରୀୟ ପ୍ରତିଯୋଗିତା ପାଇଁ ଚୂଡ଼ାନ୍ତ ଖେଳାଳି ମନୋନୀତ କରାଯିବ ବୋଲି ଜଣାପଡ଼ିଛି। ଏହି ତ୍ରି-ରାଷ୍ଟ୍ରୀୟ ପ୍ରତିଯୋଗିତାରେ ଭାରତ ସମେତ ଆୟୋଜକ ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡ ଜୁନିୟର ମହିଳା ହକି ଦଳ ଅଂଶଗ୍ରହଣ କରିବେ।
