ଅହମ୍ମଦାବାଦ, ୨୪ା୧୨: ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର କ୍ରିକେଟ ଉପଦେଷ୍ଟା କମିଟି ଗୁରୁବାର ଭାରତର ପୂର୍ବତନ ପେସ୍ ବୋଲର ଚେତନ ଶର୍ମାଙ୍କୁ ଜାତୀୟ ସିନିୟର ସିଲେକ୍ସନ ପ୍ୟାନେଲର ଚେୟାରମ୍ୟାନ ଭାବେ ନିଯୁକ୍ତ କରିଛି। ତାଙ୍କ ନେତୃତ୍ୱାଧୀନ ୫ ଜଣିଆ ଚୟନ କମିଟିରେ ସ୍ଥାନ ପାଇଛନ୍ତି ଅନ୍ତର୍ଜାତୀୟ ଖ୍ୟାତି ସମ୍ପନ ଓଡ଼ିଶାର ପୂର୍ବତନ ଖେଳାଳି ଦେବାଶିଷ ମହାନ୍ତି।
ଅନ୍ତର୍ଜାତୀୟ ସ୍ତରରେ ଭାରତ ପାଇଁ ଦେବାଶିଷ ୨ଟି ଟେଷ୍ଟ ଓ ୪୫ ଦିନିକିଆ ମ୍ୟାଚ୍ ଖେଳିଛନ୍ତି। ଏହାବାଦ୍ ଓଡ଼ିଶା ପକ୍ଷରୁ ୧୧୭ଟି ପ୍ରଥମ ଶ୍ରେଣୀ ମ୍ୟାଚ ଓ ୧୨୯ଟି ଲିଷ୍ଟ ଏ’ ମ୍ୟାଚରେ ପ୍ରତିନିଧିତ୍ୱ କରିଥିଲେ।
ଏଠାରେ ବସିଥିବା ବିସିସିଆଇର ୮୯ତମ ବାର୍ଷିକ ସାଧାରଣ ଅଧିବେଶନ ଅବସରରେ ନୂଆ ଚୟନ କମିଟି ଗଠନ କରାଯାଇଛି। ସିଲେକ୍ସନ ପ୍ୟାନେଲରେ ପୂର୍ବତନ ଭାରତୀୟ ଖେଳାଳି ସୁନୀଲ ଯୋଶୀ ଓ ହର୍ବିନ୍ଦର ସିଂ ମଧ୍ୟ ସ୍ଥାନ ପାଇଛନ୍ତି। ପୂର୍ବତନ ଖେଳାଳି ଚେତନ ଶର୍ମା ୧୧ ବର୍ଷ ଧରି ଅନ୍ତର୍ଜାତୀୟ କ୍ରିକେଟରେ ସକ୍ରିୟ ଥିଲେ। ଭାରତ ତରଫରୁ ସେ ୨୩ଟି ଟେଷ୍ଟ ଓ ୬୫ ଅନ୍ତର୍ଜାତୀୟ ଦିନିକିଆ ମ୍ୟାଚ ଖେଳିଛନ୍ତି। ୧୯୮୭ ବିଶ୍ୱକପ୍ରେ ହ୍ୟାଟ୍ରିକ ଉଇକେଟ ନେବା ପୂରା ଦେଶ ପାଇଁ ଐତିହାସିକ ମୁହୂର୍ତ୍ତ ଥିଲା।
