ଭୁବନେଶ୍ୱର, ୨୫।୯(କ୍ରୀଡ଼ା ପ୍ରତିନିଧି)-କାନପୁରର ଗ୍ରୀନ୍ ପାର୍କ ଷ୍ଟାଡିୟମରେ ଚାଲିଥିବା ୪ର୍ଥ ହକି ଇଣ୍ଡିଆ ୫-ଏ-ସାଇଡ୍ ମହିଳା ହକି ଟୁର୍ନାମେଣ୍ଟର କ୍ୱାର୍ଟର ଫାଇନାଲରେ ଓଡ଼ିଶା ପ୍ରବେଶ କରିଛି। ମଙ୍ଗଳବାର ଅନୁଷ୍ଠିତ ପୁଲ୍ ‘ଏ’ର ଏକ ଲିଗ୍ ମ୍ୟାଚରେ ଓଡ଼ିଶା ୨-୧ ଗୋଲରେ ପଞ୍ଜାବକୁ ପରାସ୍ତ କରିଛି। ଲିଗ୍ ମ୍ୟାଚ ଶେଷ ହେବା ସହ ପ୍ରତିଯୋଗିତାର କ୍ୱାର୍ଟର ଫାଇନାଲ ଲାଇନ୍ଅପ୍ ହୋଇଯାଇଛି। କାର୍ଯ୍ୟସୂଚୀ ଅନୁସାରେ ଓଡ଼ିଶା ୩ୟ କ୍ୱାର୍ଟର ଫାଇନାଲରେ ମହାରାଷ୍ଟ୍ରକୁ ଭେଟିବ। ପ୍ରଥମ କ୍ୱାର୍ଟର ଫାଇନାଲରେ ଝାଡ଼ଖଣ୍ଡ-କର୍ନାଟକ, ଦ୍ୱିତୀୟ କ୍ୱାର୍ଟର ଫାଇନାଲରେ ଉତ୍ତର ପ୍ରଦେଶ-ପଞ୍ଜାବ ଏବଂ ଚତୁର୍ଥ କ୍ୱାର୍ଟର ଫାଇନାଲରେ ହରିୟାଣା ଓ ତାମିଲନାଡ଼ୁ ମଧ୍ୟରେ ମୁକାବିଲା ହେବ। କ୍ୱାର୍ଟର ଫାଇନାଲ ମ୍ୟାଚ ଗୁଡ଼ିକ ବୁଧବାର ଅନୁଷ୍ଠିତ ହେବ।
ଓଡ଼ିଶା-ପଞ୍ଜାବ ମ୍ୟାଚ ଆରମ୍ଭରୁ ସଂଘର୍ଷପୂର୍ଣ୍ଣ ହୋଇଥିଲା। ମ୍ୟାଚର ପ୍ରଥମ ମିନିଟରେ ଅଧିନାୟିକା ନଭନୀତ କୌରଙ୍କ ଗୋଲ ବଳରେ ପଞ୍ଜାବ ଅଗ୍ରଣୀ ହାସଲ କରି ଓଡ଼ିଶା ଉପରେ ଚାପ ପ୍ରୟୋଗ କରିଥିଲା। ମାତ୍ର ଓଡ଼ିଶା ଚାପକ ନ ଆସି କାଳବିଳମ୍ବ ନ କରି ପ୍ରତିଆକ୍ରମଣ ରଣନୀତିରେ ସେହି ୧ମ ମିନିଟରେ ହିଁ ଗୋଲଟି ପରିଶୋଧ କରି ମ୍ୟାଚରେ ରୋମାଞ୍ଚ ଭରି ଦେଇଥିଲା। ଆଜମିନା କୁଜୁର ଦଳ ପକ୍ଷରୁ ଏହି ଗୋଲଟି ଦେଇଥିଲେ। ଏହାପରେ ଆକ୍ରମଣାତ୍ମକ ରଣନୀତିରେ ଖେଳି ଉଭୟ ଦଳ ଏକାଧିକ ଗୋଲ ସ୍କୋରିଂ ସୁଯୋଗ ସୃଷ୍ଟି କରିଥିଲେ। ଫଳରେ ମ୍ୟାଚରେ ଉତ୍କଣ୍ଠା ଭରି ରହିଥିଲା। ମ୍ୟାଚର ୨୦ତମ ମିନିଟରେ ଓଡ଼ିଶା ଅଧିନାୟିକା ଅସ୍ମିତା ବାର୍ଲା ଦେଇଥିବା ଗୋଲଟି ଶେଷରେ ନିର୍ଣ୍ଣାୟକ ହୋଇଥିଲା। ପଞ୍ଜାବ ଗୋଲ ପରିଶୋଧ କରିବାକୁ ଶେଷ ପର୍ଯ୍ୟନ୍ତ ଉଦ୍ୟମ କରିଥିଲେ ହେଁ ଓଡ଼ିଶା ରକ୍ଷଣଭାଗ ଖେଳାଳିମାନେ ତାହା ହେବାକୁ ଦେଇ ନ ଥିଲେ। ଝାଡ଼ଖଣ୍ଡ ଓ ତାମିଲନାଡ଼ୁ ମଧ୍ୟରେ ଅନୁଷ୍ଠିତ ଅନ୍ୟ ପୁଲ୍ ‘ଏ’ ମ୍ୟାଚଟି ୩-୩ ଗୋଲରେ ଡ୍ର ରହିଥିଲା। ଝାଡ଼ଖଣ୍ଡ ପ୍ରଥମାର୍ଦ୍ଧ ଶେଷସୁଦ୍ଧା ୨-୦ ଗୋଲରେ ଅଗ୍ରଣୀ ରହିଥିଲେ ହେଁ ତାମିଲନାଡ଼ୁ ସଫଳ ପ୍ରତ୍ୟାବର୍ତ୍ତନ କରି ମ୍ୟାଚକୁ ଡ୍ର ରଖିଥିଲା। ପୁଲ୍ ‘ବି’ର ଏକ ମ୍ୟାଚରେ ହରିୟାଣା ଚମତ୍କାର ପ୍ରଦର୍ଶନ କରି ୧୨-୨ ଗୋଲରେ ଉତ୍ତର ପ୍ରଦେଶକୁ ପରାସ୍ତ କରିଥିଲା। ବିଜୟୀ ଦଳ ପକ୍ଷରୁ ଅମନଦୀପ କୌର(୯, ୧୩, ୧୫ତମ ମିନିଟ) ଏବଂ ଦୀପିକା (୧୦, ୧୨ ଓ ୧୭ତମ ମିନିଟ) ସର୍ବାଧିକ ୩ଟି ଲେଖାଏ ଗୋଲ ସ୍କୋର କରିଥିଲେ। ଏହି ଗ୍ରୁପର ଅନ୍ୟ ଏକ ମ୍ୟାଚରେ ମହାରାଷ୍ଟ୍ର ୫-୨ ଗୋଲରେ କର୍ନାଟକକୁ ହରାଇ କ୍ୱାର୍ଟର ଫାଇନାଲରେ ସ୍ଥାନ ପକ୍କା କରିଥିଲା।