ଭୁବନେଶ୍ୱର, ୧୧।୧(କ୍ରୀଡ଼ା ପ୍ରତିନିଧି)-
ଇଣ୍ଡିଆନ ମାଉଣ୍ଟେନରିଂ ଫେଡେରେଶନ(ଆଇଏମଏଫ) ଓ ରାଜ୍ୟ ସରକାରଙ୍କ କ୍ରୀଡ଼ା ବିଭାଗ ମିଳିତ ଆନୁକୂଲ୍ୟରେ ଆୟୋଜିତ ଜାତୀୟ ସ୍ପୋଟର୍ସ କ୍ଲାଇମ୍ବିଂ ଚାମ୍ପିୟନଶିପ୍ର ୨୫ତମ ସଂସ୍କରଣ ଶୁକ୍ରବାର କଳିଙ୍ଗ ଷ୍ଟାଡିୟମରେ ଉଦ୍ଯାପିତ ହୋଇଛି। ପ୍ରତିଯୋଗିତାର ଏହି ରୌପ୍ୟ ଜୟନ୍ତି ସଂସ୍କରଣରେ ପୂର୍ବାଞ୍ଚଳ ମୋଟ ପଏଣ୍ଟ ସହିତ ଚାମ୍ପିୟନ ହୋଇଛି। ଦକ୍ଷିଣାଞ୍ଚଳ ୨୫ ପଏଣ୍ଟ ସହିତ ଦ୍ୱିତୀୟ ଓ ପଶ୍ଚିମାଞ୍ଚଳ ୨୪ ପଏଣ୍ଟ ପାଇ ତୃତୀୟ ସ୍ଥାନ ଅଧିକାର କରିଛି। ପୂର୍ବାଞ୍ଚଳ ୮ ସ୍ବର୍ଣ୍ଣ, ୩ ରୌପ୍ୟ ଓ ୪ ବ୍ରୋଞ୍ଜ ସହିତ ମୋଟ ୧୫ଟି ପଦକ ପାଇ ଶୀର୍ଷରେ ରହିଛି। ଦକ୍ଷିଣାଞ୍ଚଳ ୪ ସ୍ବର୍ଣ୍ଣ, ୪ ରୌପ୍ୟ, ୫ ବ୍ରୋଞ୍ଜ ସହ ୧୩ଟି ଏବଂ ପଶ୍ଚିମାଞ୍ଚଳ ୪ଟି ଲେଖାଏ ସ୍ବର୍ଣ୍ଣ, ରୌପ୍ୟ ଓ ବ୍ରୋଞ୍ଜ ପଦକ ସହିତ ୨୪ଟି ପଦକ ପାଇ ପ୍ରତିଯୋଗିତା ଶେଷ କରିଛି। ଅନ୍ୟ ଦଳ ଗୁଡ଼ିକ ମଧ୍ୟରେ ଉତ୍ତରାଞ୍ଚଳ ୩ ସ୍ବର୍ଣ୍ଣ, ୪ ରୌପ୍ୟ, ୩ ବ୍ରୋଞ୍ଜ, ଉତ୍ତର ପୂର୍ବାଞ୍ଚଳ ୧ ସ୍ବର୍ଣ୍ଣ, ୧ ବ୍ରୋଞ୍ଜ ଏବଂ ସର୍ଭିସେସ ଗୋଟିଏ ଲେଖାଏ ରୌପ୍ୟ ଓ ବ୍ରୋଞ୍ଜ ପଦକ ପାଇଥିବାବେଳେ ପୋଲିସ ଫୋର୍ସ ଦଳ ପଦକଶୂନ୍ୟ ରହିଛି। ଉତ୍ତରାଞ୍ଚଳ ୨୦, ଉତ୍ତର ପୂର୍ବାଞ୍ଚଳ ୪ ଓ ସର୍ଭିସେସ ୩ ପଏଣ୍ଟ ପାଇଛି। ଏସିଆନ ଗୋଲ୍ଡ ମେଡାଲିଷ୍ଟ ଶିବାନୀ ପନ୍ନୁଙ୍କ ସମେତ ଦେଶର ବିଭିନ୍ନ ଭାଗରୁ ପ୍ରତିଯୋଗିମାନେ ଏହି ୫ ଦିନ ବିଶିଷ୍ଟ ପ୍ରତିଯୋଗିତାରେ ୩ଟି ବିଭାଗ ଲିଡ୍, ସ୍ପିଡ୍ ଓ ବୋଲ୍ଡରିଂରେ ଭାଗ୍ୟ ପରୀକ୍ଷା କରିଥିଲେ। ଅନିଶା ବର୍ମା ୧୦.୪୧ ସେକେଣ୍ଡ ସମୟ ନେଇ ନୂଆ ସ୍ପିଡ୍ ରେକର୍ଡର ଅଧିକାରିଣୀ ହୋଇଥିଲେ।