ଭଣ୍ଡାରିପୋଖରୀ, ୨୨ା୧୦(ଡି.ଏନ୍.ଏ.)-ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ବନ୍ଦାଳୋ-ମଢିଆଳି ପଞ୍ଚାୟତ ମଢିଆଳି ଗ୍ରାମରେ ଜଣେ ୧୭ ବର୍ଷର କଲେଜ ପଢୁଆ ଛାତ୍ର ଜାପାନୀ ଜ୍ୱରରେ ଆକ୍ରାନ୍ତ ହୋଇଥିବା ଜଣାପଡିଛି। ତାଙ୍କୁ ବର୍ତ୍ତମାନ ଭୁବନେଶ୍ୱରର ଏକ ଘରୋଇ ଡାକ୍ତରଖାନାରେ ଆଇସିୟୁରେ ରଖି ଚିକତ୍ସା କରାଯାଉଛି। ଏହି ସୂଚନାକୁ ଆଧାର କରି ମଙ୍ଗଳବାର ଭଦ୍ରକ ଓ ଭଣ୍ଡାରିପୋଖରୀ ଡାକ୍ତରଖାନାରୁ ଏକ ଚିକିତ୍ସକ ଦଳ ଏଠାରୁ ୧୫ କି.ମି. ଦୂର ମଢିଆଳି ଗ୍ରାମକୁ ଯାଇ ସେଠାକାର ସ୍ଥିତି ଅନୁଧ୍ୟାନ କରିଥିଲେ। ସେମାନେ ପରିବେଶ, ପାନୀୟ ଜଳଉତ୍ସ, ଗ୍ରାମରେ ମଶା ଅଣ୍ଡା ଦେବାଭଳି ପାଣି ଜମୁଥିବା ସ୍ଥାନ ଆଦି ବୁଲି ଦେଖିଥିଲେ। ଗ୍ରାମର ପରିବେଶକୁ ସଫାସୁତୁରା ରଖିବା ଲାଗି ସେମାନେ ଲୋକଙ୍କୁ ଡାକି ସଭା କରି ସଚେତନତା ସୃଷ୍ଟି କରିଥିଲେ।
ଜାପାନୀ ଜ୍ୱରର ଚିକତ୍ସା ଲାଗି ଆବଶ୍ୟକ ଔଷଧ ବାହାରି ନ ଥିବାରୁ ଅଞ୍ଚଳରେ ଆତଙ୍କର ବାତାବରଣ ଖେଳି ଯାଇଛି। ଏଥିଲାଗି କେହି ଭୟଭୀତ ନ ହେବାକୁ ଡାକ୍ତରୀ ଦଳ ଲୋକଙ୍କୁ ବୁଝାଇ ପରିବେଶକୁ ସଫାସୁତୁରା ରଖିବା ଏବଂ ସଚେତନ ରହିବାକୁ କହିଥିଲେ। ଜିଲା ମ୍ୟାଲେରିଆ ଅଧିକାରୀ ଡ. ମୁରଲୀଧର ନାୟକ, ମ୍ୟାଲେରିଆ ସୁପରଭାଇଜର ସଙ୍ଗୀତା ଦେବତା, ଜନସ୍ବାସ୍ଥ୍ୟ ସମ୍ପ୍ରସାରଣ ଅଧିକାରିଣୀ ଅନୀତାରାଣୀ ରାଉତ, ସ୍ବାସ୍ଥ୍ୟ ସୁପରଭାଇଜର ମନୋରଞ୍ଜନ ରାଉତ, ନବଘନ ଦାସ ପ୍ରମୁଖ ଏହିଦଳରେ ସାମିଲ ଥିଲେ। ସ୍ବାସ୍ଥ୍ୟକର୍ମୀ ରୁଦ୍ରନାରାୟଣ କବି, ଅଙ୍ଗନୱାଡି କର୍ମୀ ବିଦ୍ୟୁତ୍ପ୍ରଭା ବାରିକ, ଶଶିମଣି ଜେନା, ଆଶାକର୍ମୀ ଉର୍ମିଳା ବେହେରା, କୋଇଲୀ ସେଠୀ ପ୍ରମୁଖ ଗ୍ରାମବାସୀଙ୍କ ସହ ସତର୍କତା ଅବଲମ୍ବନ ନେଇ ଆଲୋଚନା କରିଥିଲେ। ଜାପାନୀ ଜ୍ୱରର ମୁକାବିଲା ସକାଶେ ପ୍ରତିଷେଧକ ବ୍ୟବସ୍ଥା ଅପରିହାର୍ଯ୍ୟ। ଏଥିଲାଗି ନଭେମ୍ବର ୧୧ ତାରିଖରୁ ଟିକାକରଣ କାର୍ଯ୍ୟକ୍ରମ ଆରମ୍ଭ ହେବ ବୋଲି ଚିକିତ୍ସକଦଳ ସୂଚନା ଦେଇଥିଲେ। ଏହାବାଦ ଏକ ବ୍ଲକସ୍ତରୀୟ ସଭା ଆସନ୍ତା ୨୪ ତାରିଖରେ ଭଣ୍ଡାରିପୋଖରୀ ଡାକ୍ତରଖାନାରେ ହେବାର କାର୍ଯ୍ୟକ୍ରମ ରହିଛି।