ଟୋକିଓ, ୨୫।୭ (ପି.ଟି.)- ଅଲିମ୍ପିକ୍ସ ରୌପ୍ୟ ପଦକ ବିଜୟିନୀ ଷ୍ଟାର୍ ଭାରତୀୟ ମହିଳା ଶଟ୍ଲର ପି.ଭି. ସିନ୍ଧୁ ଓ ବି. ସାଇ ପ୍ରଣୀଥ୍ ଏଠାରେ ଚାଲିଥିବା ଜାପାନ୍ ଓପନ୍ ବ୍ୟାଡ୍ମିଣ୍ଟନ ଟୁର୍ନାମେଣ୍ଟର କ୍ୱାର୍ଟର ଫାଇନାଲରେ ସ୍ଥାନ ସୁରକ୍ଷିତ କରିନେଇଛନ୍ତି। କିନ୍ତୁ ଅନ୍ୟତମ ଭାରତୀୟ ପ୍ରତିଯୋଗୀ ଏଚ୍.ଏସ୍. ପ୍ରଣୟଙ୍କୁ ନିରାଶ ହେବାକୁ ପଡ଼ିଛି। ମହିଳା ସିଙ୍ଗଲ୍ସ ୨ୟ ରାଉଣ୍ଡର ଏକ ମୁକାବିଲାରେ ୫ମ ସିଡ୍ ସିନ୍ଧୁ ୧୧-୨୧, ୨୧-୧୦, ୨୧-୧୩ ଗେମ୍ରେ ଜାପାନର ଅୟା ଓହରିଙ୍କୁ ପରାସ୍ତ କରିଛନ୍ତି। ଏହି ମ୍ୟାଚ୍ ଜିତିବାକୁ ସିନ୍ଧୁଙ୍କୁ ଏକ ଘଣ୍ଟା ପାଖାପାଖି ସମୟ ଲାଗିଥିଲା। ଏଥିସହ ଓହରିଙ୍କ ବିପକ୍ଷରେ ସିନ୍ଧୁ ବିଜୟ ବ୍ୟବଧାନକୁ ୮-୦କୁ ବଢ଼ାଇଛନ୍ତି। ଚାଇନାର ଚେନ୍ ଜିଆଓ ଜିନ୍ ଓ ୪ର୍ଥ ସିଡ୍ ଜାପାନର ଏକାନେ ୟାମାଗୁଚିଙ୍କ ମଧ୍ୟରେ ହେବାକୁ ଥିବା ମ୍ୟାଚ୍ରେ ଯିଏ ଜିତିବ ସିଏ ଅନ୍ତିମ-୮ ରାଉଣ୍ଡରେ ସିନ୍ଧୁଙ୍କ ସହ ମୁକାବିଲା କରିବେ। ଅପରପକ୍ଷରେ ପୁରୁଷ ସିଙ୍ଗଲ୍ସ ମୁକାବିଲାରେ ପ୍ରଣୀଥ୍ ୨୧-୧୩, ୨୧-୧୬ ସିଧାସଳଖ ଗେମ୍ରେ ଘରୋଇ ପ୍ରତିଯୋଗୀ କାଣ୍ଟା ସୁନେୟାମାଙ୍କୁ ପରାସ୍ତ କରିଛନ୍ତି। ମ୍ୟାଚ୍ ଜିତିବାକୁ ପ୍ରଣୀଥ୍ଙ୍କୁ ମାତ୍ର ୪୫ ମିନିଟ୍ ସମୟ ଲାଗିଥିଲା। ତେବେ ପ୍ରଥମ ରାଉଣ୍ଡରେ ସାଥୀ ଖେଳାଳି କିଡାମ୍ବୀ ଶ୍ରୀକାନ୍ତଙ୍କୁ ପରାସ୍ତ କରିଥିବା ପ୍ରଣୟ ୯-୨୧, ୧୫-୨୧ ସିଧାସଳଖ ଗେମ୍ରେ ଡେନମାର୍କର ରାସମସ୍ ଗେମେକଙ୍କ ନିକଟରୁ ହାରି ପ୍ରତିଯୋଗିତାରୁ ବିଦାୟ ନେଇଛନ୍ତି। ସେହିଭଳି ପୁରୁଷ ଡବଲ୍ସରେ ସାତ୍ତ୍ୱିକସାଇରାଜ ରାନ୍କିରେଡ୍ଡୀ ଓ ଚିରାଗ ସେଟ୍ଟୀ ଯୋଡ଼ି କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି।