ବସ୍ତା, ୧୯।୯(ସ୍ବ.ପ୍ର.): ଦ୍ବିତୀୟ ଦିନରେ ମଧ୍ୟ ଜାମଶୁଳି କଲେଜରେ ପରୀକ୍ଷା ଫି’ ବୃଦ୍ଧିକୁ ନେଇ ଅଚଳାବସ୍ଥା ଜାରି ରହିଛି । କଲେଜର ମୁଖ୍ୟ ଫାଟକକୁ ତାଲା ପକାଇ ସମସ୍ତ +୩ ଛାତ୍ରୀଛାତ୍ର ପରିସର ଭିତରେ ନିଆଁ ଜାଳି ବିକ୍ଷୋଭ କରୁଥିବା ଜଣାପଡିଛି। ଫକୀର ମୋହନ ବିଶ୍ବବିଦ୍ୟାଳୟର ଅଧୀନରେ ଥିବା ଅନ୍ୟ କଲେଜରେ ପରୀକ୍ଷା ଫି’ ୧୫୦୦ ରୁ ୨୦୦୦ ମଧ୍ୟରେ ଥିବାବେଳେ ଲକ୍ଷ୍ମୀନାରାୟଣ ମହାବିଦ୍ୟାଳୟରେ ୩୦୦୦ ଟଙ୍କା ଧାର୍ଯ୍ୟ ତଥା ଅନ୍ୟ ଦାବି ନେଇ ଛାତ୍ରୀଛାତ୍ର ଧାରଣାରେ ବସଛନ୍ତି। ଛାତ୍ରୀଛାତ୍ରମାନେ କୌଣସି ଗଣମାଧ୍ୟମକୁ ଭିତରକୁ ଛାଡୁ ନ ଥିବାବେଳେ ବାଲେଶ୍ବର ଉପଜିଲାପାଳଙ୍କ ନିର୍ଦ୍ଦେଶକ୍ରମେ ମାଜିଷ୍ଟ୍ରେଟ ଭାବେ ଯାଇଥିବା ବସ୍ତା ତହସିଲଦାର ନରେନ୍ଦ୍ର ଖମାରୀଙ୍କୁ ମଧ୍ୟ ସେମାନେ ଭିତରକୁ ଛାଡି ନ ଥିବା ଜଣାଯାଇଛି। ପିଲାଙ୍କ କହିବା ଅନୁଯାୟୀ, ଯେଉଁ ଉପରିସ୍ଥ ଅଧିକାରୀ ତାଙ୍କର ସମସ୍ୟାଗୁଡିକୁ ତତ୍କାଳ ଭିତ୍ତିରେ ସମାଧାନ କରିପାରିବେ ତାଙ୍କୁ ଭିତରକୁ ପ୍ରବେଶ କରାଯିବ। ସଦ୍ୟ ମିଳିଥିବା ଖବର ଅନୁସାରେ ମାଜିଷ୍ଟେଟ ଫେରି ଯାଇଥିବାବେଳେ କଲେଜ ପରିସର ବାହାରେ ପୋଲିସ ପ୍ଲାଟୁନ୍ ମୃତୟନ କରାଯାଇଛି।