ଜାମସେଦପୁର,୩୦ା୧୦: ସ୍ଥାନୀୟ ଜେଆର୍ଡି ସ୍ପୋଟର୍ସ କମ୍ପ୍ଲେକ୍ସଠାରେ ମଙ୍ଗଳବାର ଚଳିତ ୬ଷ୍ଠ ହିରୋ ଇଣ୍ଡିଆନ ସୁପର ଲିଗ (ଆଇଏସ୍ଏଲ)ର ଦଶମ ମ୍ୟାଚରେ ନବାଗତ ହାଇଦ୍ରାବାଦ ଏଫ୍ସିକୁ ୩-୧ ଗୋଲରେ ହରାଇ ଜାମଶେଦପୁର ଏଫ୍ସି କ୍ରମାଗତ ଦ୍ୱିତୀୟ ବିଜୟ ହାସଲ କରିଛି। ପୂର୍ବ ମ୍ୟାଚରେ ଓଡିଶା ଏଫ୍ସିକୁ ୨-୧ରେ ପରାସ୍ତ କରିଥିବା ଜାମଶେଦପୁର ଦଳ ଏହି ବିଜୟ ସହିତ ପୁରା ୬ ପଏଣ୍ଟ ସଂଗ୍ରହ କରି ଟେବୁଲ ଶୀର୍ଷକୁ ଉନ୍ନୀତ ହୋଇଛି l
ଜାମଶେଦପୁର ପକ୍ଷରୁ ଫାରୁକ ଚୌଧୁରୀ, ଆନିକେତ ଯାଦବ ଓ ସର୍ଜିଓ କାଷ୍ଟେଲ ଗୋଲ ଦେଇଥିବା ବେଳେ ହାଇଦ୍ରାବାଦ ତରଫରୁ ଗୋଟିଏ ଗୋଲ ପରିଶୋଧ କରିଥିଲେ ମାର୍ସେଲିନୋ ପେରେରା। ପୂର୍ବ ମ୍ୟାଚରେ ଏଟିକେଠାରୁ ୫-୦ରେ ହାରିଥିବା ହାଇଦ୍ରାବାଦ ଦଳର ଏହା କ୍ରମାଗତ ଦ୍ୱିତୀୟ ପରାଜୟ l ମ୍ୟାଚରେ ଘରୋଇ ଜାମଶେଦପୁର ଦଳ ଆରମ୍ଭରୁ ଆକ୍ରମଣାତ୍ମକ ପନ୍ଥା ଆପଣାଇ ଗୋଲ ଦେବାର ଏକାଧିକ ସୁଯୋଗ କରିଥିଲା। କିନ୍ତୁ ଦୁର୍ବଳ ଫିନିଶିଂ ଏବଂ ହାଇଦ୍ରାବାଦ ଗୋଲରକ୍ଷକ ତଥା ଅଧିନାୟକ କମଲଜିତ ସିଂଙ୍କ ଲଢୁଆ ପ୍ରଦର୍ଶନ ଯୋଗୁ କୌଣସି ଗୋଲ ହୋଇ ନ ଥିଲା l ମଙ୍ଗଳବାର ଖେଳରେ ମାରୁତି ସୁଜୁକି ଲିମିଟ୍ଲେସ୍ ପ୍ଲେୟର ଅଫ୍ ଦି ମ୍ୟାଚ ପୁରସ୍କାର ସର୍ଗିଓ କାଷ୍ଟେଲଙ୍କୁ ଏବଂ ହିରୋ ଅଫ୍ ଦି ମ୍ୟାଚ ପୁରସ୍କାର ଫାରୁକ ଚୌଧୁରୀଙ୍କୁ ପ୍ରଦାନ କରାଯାଇଥିଲା l ସେହିପରି ଆନିକେତ ଯାଦବ ଆଇଏସ୍ଏଲ୍ ଇମର୍ଜିଂ ପ୍ଲେୟର ଅଫ୍ ଦି ମ୍ୟାଚ୍ ପୁରସ୍କାର ଲାଭ କରିଥିଲେ l