ରାଇସୁଆଁ, ୫।୧୧(ଡି.ଏନ.ଏ.)- କେନ୍ଦୁଝର ଜିଲା ସଦର ବ୍ଲକ ଅଞ୍ଚଳରେ ହାତୀ ଉପଦ୍ରବ ବନ ବିଭାଗର ଚିନ୍ତା ବଢାଇଛି। ହାତୀପଲ ଧାନ ଓ ଅନ୍ୟ ଫସଲ ଖାଇବାକୁ ରାତିରେ ଜଙ୍ଗଲତଳି ଇଲାକାକୁ ଆସି ଉପଦ୍ରବ କରୁଥିବାରୁ ଲୋକେ ଆତଙ୍କିତ ହୋଇ ରହୁଛନ୍ତି। ରବିବାର ବିଳମ୍ବତି ରାତିରେ ୨୨ରୁ ଊର୍ଦ୍ଧ୍ୱ ହାତୀ ଜାମୁନାଳିଆ ଗ୍ରାମରେ ପଶି ପ୍ରାୟ ୨ଶହ ଏକରରୁ ଅଧିକ ଜମିର ଧାନଫସଲ ନଷ୍ଟ କରି ଦେଇଥିବା ଗ୍ରାମବାସୀ କହିଛନ୍ତି। ସ୍ଥାନୀୟ ଅଞ୍ଚଳକୁ ଚାଲି ଆସିଥିବା ହାତୀପଲର ଉପଦ୍ରବ ଯୋଗୁ ଲୋକେ ରାତି ଉଜାଗର ରହି ଜଗି ବସୁଥିବା କହିଛନ୍ତି। ହାତୀପଲକୁ ଘଉଡାଇବାରେ ବନବିଭାଗ ତତ୍ପରତା ପ୍ରକାଶ କରୁ ନ ଥିବାରୁ ସ୍ଥାନୀୟ ଅଞ୍ଚଳବାସୀ ଅସନ୍ତୋଷ ବ୍ୟକ୍ତ କରିଛନ୍ତି। ମାତ୍ରାଧିକ ଜଙ୍ଗଲ କ୍ଷୟ ଯୋଗୁ ସଦର ଅଞ୍ଚଳରେ ଦିନକୁ ଦିନ ହାତୀପଲ ଖାଦ୍ୟ ଅନ୍ବେଷଣରେ ଗାଁ ମୁହାଁ ହେଉଥିବା ପରିବେଶବିତ୍ମାନେ କହୁଛନ୍ତି। ଏ ଦିଗରେ ବନବିଭାଗ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବାକୁ ସ୍ଥାନୀୟ ଲୋକଙ୍କ ଦାବି ହେଉଛି। ବର୍ତ୍ତମାନ ଏହି ୨୨ ହାତୀ ଜାମୁନାଳିଆ ନିକଟସ୍ଥ ଜଙ୍ଗଲରେ ରହୁଥିବା ଜଣାପଡିଛି।