ଜୟପୁର,୧୧।୧(ଡି.ଏନ୍.ଏ.): ଜୟପୁର ବ୍ଲକ ଫାମ୍ପୁଣି ପଞ୍ଚାୟତରେ ଜାଲଚାଷୀ ଧରାପଡ଼ିବା ପରେ ପ୍ରଶାସନିକ ତତ୍ପରତା ଦେଖିବାକୁ ମିଳିଛି। ଜିଲାର ସମସ୍ତ ବ୍ଲକରେ ପ୍ରକୃତ ଭାଗଚାଷୀଙ୍କୁ ଚିହ୍ନଟ ପ୍ରକ୍ରିୟା ଆରମ୍ଭ କରିଛି ପ୍ରଶାସନ। ଏନେଇ ବ୍ଲକର ଯୋଗାଣ ନିରୀକ୍ଷକ, ରାଜସ୍ବ ନିରୀକ୍ଷକ ଓ କୃଷି ଗ୍ରାମସେବକଙ୍କୁ ନେଇ ଗଠିତ ସ୍କ୍ବାଡ୍ ଯାଞ୍ଚ ଆରମ୍ଭ କରିଛନ୍ତି। ତଦନ୍ତ ପରେ ପ୍ରକୃତ ଭାଗଚାଷୀ କେତେ ରହିଛନ୍ତି, ସେନେଇ ତଥ୍ୟ ମିଳିବା ପରେ ଜାଲ ଭାଗଚାଷୀଙ୍କୁ ଠାବ କରାଯାଇ କାର୍ଯ୍ୟାନୁଷ୍ଠାନ ନିଆଯିବ। ମଣ୍ଡିରେ ଧାନ ବିକ୍ରି ହୋଇସାରିଥିଲେ ମଧ୍ୟ ଭାଗଚାଷୀ ଜାଲ ବୋଲି ଯାଞ୍ଚ ବେଳେ ଜଣାପଡ଼ିଲେ ପଦକ୍ଷେପ ନେବ ପ୍ରଶାସନ।
ଉଲ୍ଳେଖଯୋଗ୍ୟ, ଜିଲାରେ ୪୨୭୪ ଜଣ ଭାଗଚାଷୀ ନାମ ପଞ୍ଜିକରଣ କରିଛନ୍ତି। କିନ୍ତୁ ଏନେଇ ମାତ୍ର ୪୨୫୨ ଜଣ ଜମି ମାଲିକଙ୍କଠାରୁ ଭାଗଚାଷ କରୁଥିବା ସମ୍ପର୍କିତ ସମସ୍ତ କାଗଜପତ୍ର କର୍ତ୍ତୃପକ୍ଷଙ୍କ ନିକଟରେ ଦାଖଲ କରିଛନ୍ତି। ଅବଶିଷ୍ଟ ୨୮ ଜଣ ଏନେଇ କୌଣସି କାଗଜାତ ଦାଖଲ କରିପାରି ନାହାନ୍ତି। ପଞ୍ଜିକୃତ ଭାଗଚାଷୀଙ୍କ ମଧ୍ୟରେ ବୋରିଗୁ୍ମ୍ମା ବ୍ଲକରେ ସର୍ବାଧିକ ୧୬୦୬ ଜଣ ରହିଛନ୍ତି। ସେମାନଙ୍କ ମଧ୍ୟରୁ ୧୬୦୦ ଜଣ ଏନେଇ ସମସ୍ତ କାଗଜପତ୍ର ଦେଇଛନ୍ତି। ସେହିପରି ଜୟପୁର ବ୍ଲକରେ ୧୦୯୫ ଜଣଙ୍କ ମଧ୍ୟରୁ ୧୦୯୧ ଜଣ, କୁନ୍ଦୁରା ବ୍ଲକରେ ୭୨୧ ଜଣଙ୍କ ମଧ୍ୟରୁ ୭୧୫ ଜଣ, କୋଟପାଡ଼ରେ ୪୬୭ ଜଣଙ୍କ ମଧ୍ୟରୁ ୪୬୨ ଜଣ ଏବଂ ସେମିଳିଗୁଡ଼ାରେ ୨ ଜଣଙ୍କ ମଧ୍ୟରୁ ଜଣେ ଭାଗଚାଷୀ ସମସ୍ତ କାଗଜପତ୍ର ଦାଖଲ କରିଛନ୍ତି। ବନ୍ଧୁଗାଁରେ ୭, ବୈପାରୀଗୁଡ଼ା ୩୧୦, ଦଶମନ୍ତପୁର ୪୭, କୋରାପୁଟ ୬, ଲମତାପୁଟ ୮, ନନ୍ଦପୁର ୩, ପଟ୍ଟାଙ୍ଗିରେ ୨ ଜଣ ଭାଗଚାଷୀ ରହିଛନ୍ତି। ନାରାୟଣପାଟଣା ଓ ଲକ୍ଷ୍ମୀପୁର ପଞ୍ଚାୟତରେ କୌଣସି ଭାଗଚାଷୀ ନାହାନ୍ତି।