ଭୁବନେଶ୍ୱର, ୩୦ା୫(ବ୍ୟୁରୋ) – ପୁରୀ ଜିଲା କଣାସ ବ୍ଲକ ଅନ୍ତର୍ଗତ କଉଡ଼ିଖଣି ଗ୍ରାମରେ ପଦନି ସାହୁଙ୍କ ଘର ଚାରିପଟେ ଘେରାଯାଇଥିବା ଜାଲରେ ଏକ ବଡ଼ ନାଗ ସାପ ପଡି ଛନ୍ଦି ହୋଇଥିବା ଦେଖିବାକୁ ମିଳିଥିଲା। ଖବର ପାଇ ସାପ ଉଦ୍ଧାର ପାଇଁ ସ୍ନେକ୍ ହେଲ୍ପ୍ ଲାଇନ ସଦସ୍ୟ ସୁଶାନ୍ତ କୁମାର ବେହେରା ଘଟଣା ସ୍ଥଳରେ ପହଞ୍ଚତ୍ଥିଲେ। ସୁଶାନ୍ତ ପ୍ରଥମେ ଏହାକୁ ଏକ ସାଧାରଣ ଘଟଣା ବୋଲି ଭାବି ଜାଲକୁ କାଟି ନାଗସାପକୁ ଖୋଲା ଜାଗାକୁ ଆଣିଲେ। କିଛି ସମୟ ଭିତରେ ସାପଟିର ପେଟ ଫୁଲିଥିଲା ଓ ସେ ଗିଳିଥିବା ଖାଦ୍ୟକୁ ବାନ୍ତି କରିବାକୁ ଉଦ୍ୟମ କଲା। କିନ୍ତୁ ତା’ ପାଟି ଏବଂ ଦାନ୍ତରେ ଜାଲର ସୂତା ଛନ୍ଦି ହୋଇଥିବାରୁ ଖାଦ୍ୟଟିକୁ ବାନ୍ତି କରିପାରି ନ ଥିଲା। ଏହାଦେଖି ସୁଶାନ୍ତ ଧୀରେ ଧୀରେ ପାଟିରୁ ଜାଲ ସୂତାକୁ କାଟିବାରେ ଲାଗିଲେ ଏବଂ ସାପଟି ବାନ୍ତି କରିବାକୁ ଆରମ୍ଭ କଲା। ପ୍ରଥମେ ନାଗର ପାଟିରୁ ଗିଳିଥିବା ଅନ୍ୟ ଏକ ସାପର ଲାଞ୍ଜ ଦେଖାଗଲା। ଉକ୍ତ ସାପଟିରେ ମଧ୍ୟ ଜାଲ ଛନ୍ଦି ହୋଇ ରହିଥିବାରୁ ନାଗ ପାଟିରୁ ବାହାରିବା ସମ୍ଭବପର ହେଉ ନ ଥିଲା। ତେଣୁ ସୁଶାନ୍ତ ନାଗ ପାଟି ଭିତରେ ଥିବା ସାପର ଜାଲକୁ ଧୀରେ ଧୀରେ ବାହାରକୁ ଆଣି କାଟିଥିଲେ। ଏହାପରେ ନାଗ ସମ୍ପୂର୍ଣ୍ଣ ସାପଟିକୁ ବାନ୍ତି କରିଥିଲା। ପରେ ଜଣାପଡିଲା ଯେ ନାଗ ଗିଳିଥିବା ସାପଟି ୩ ଫୁଟରୁ ଊର୍ଦ୍ଧ୍ୱ ଲମ୍ବର ଏକ ବିଷଧର ଚନ୍ଦନ ବୋଡ଼ା। ଏହି ଘଟଣାକୁ ଚମତ୍କାର ଘଟଣା ବୋଲି ବର୍ଣ୍ଣନା କରି ସ୍ନେକ୍ ହେଲ୍ପ ଲାଇନ ସମ୍ପାଦକ ତଥା ଖୋର୍ଦ୍ଧା ଜିଲାର ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ଶୁଭେନ୍ଦୁ ମଲ୍ଲିକ କୁହନ୍ତି, ନାଗସାପ ଚନ୍ଦନବୋଡ଼ାକୁ ଶିକାର କରିବା ବା ଗିଳିବା ନୂଆ କଥା ନୁହେଁ। କିନ୍ତୁ ଜାଲରେ ପଡ଼ିଥିବା ଏକ ଚନ୍ଦନବୋଡ଼ାକୁ ନାଗଟି ଗିଳି ନିଜେ ସେହି ଜାଲରେ ଫସିବା ସମ୍ଭବତଃ ବିରଳ ଘଟଣା। ନାଗସାପର ବିଷ ନ୍ୟୁରୋଟକ୍ସିକ ଅର୍ଥାତ୍ ସ୍ନାୟୁ ପ୍ରଭାବୀ ଏବଂ ଚନ୍ଦନବୋଡ଼ା ବିଷ ହେମୋଟକ୍ସିକ ଅର୍ଥାତ୍ ରକ୍ତ ସଞ୍ଚାଳନ ପ୍ରଭାବୀ। ନାଗ ସାପ କାମୁଡ଼ିଲେ ଦ୍ରୁତଗତିରେ ଲକ୍ଷଣ ପ୍ରକାଶ ପାଇବା ସହ ଜନ୍ତୁଟିର ଶୀଘ୍ର ମୃତ୍ୟୁ ଘଟିଥାଏ। ତେଣୁ ନାଗ ଏବଂ ଚନ୍ଦନବୋଡା ଲଢ଼େଇରେ ସର୍ବଦା ନାଗ ହିଁ ବିଜୟୀ ହେବାର ନଜିର ରହିଛି ବୋଲି ଶୁଭେନ୍ଦୁ କହିଛନ୍ତି।