ଆସିକା,୬ା୩ (ଡି.ଏନ୍.ଏ.)- ଜାଲ୍ ସାର୍ଟିଫିକେଟ୍ ଦାଖଲ କରି ଶିକ୍ଷକତା କରୁଥିବା ଅଭିଯୋଗରେ ପୋଲିସ ଶୁକ୍ରବାର ଦୁଇଜଣ ଶିକ୍ଷକଙ୍କୁ ଗିରଫ କରିଛି। ସେମାନେ ହେଲେ ଆସିକା ଥାନା ମଣ୍ଟାପଡା ହାଇସ୍କୁଲର ସହକାରୀ ଶିକ୍ଷକ ଓକିଲ ବିଷୋୟୀ ଓ କେନ୍ଦୁପଦର ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟର ସହକାରୀ ଶିକ୍ଷକ ଅଶୋକ ସାହୁ। ସେମାନଙ୍କ ନିକଟରୁ ପୋଲିସ ଜାଲ୍ ସାର୍ଟିଫିକେଟ୍ ଜବତ କରିଛି। ଗିରଫ ଅଭିଯୁକ୍ତଙ୍କୁ ଶୁକ୍ରବାର ଅପରାହ୍ନରେ କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ପ୍ରଶାନ୍ତ କୁମାର ସାହୁ ସୂଚନା ଦେଇଛନ୍ତି।
ସୂଚନା ଯୋଗ୍ୟ ଯେ, ଏହି ଜାଲ୍ ସାର୍ଟିଫିକେଟ୍ ଧାରୀ ଶିକ୍ଷକଙ୍କୁ ଗିରଫ କରିବା ଲାଗି ଆସିକା ଗୋଷ୍ଠୀ ଶିକ୍ଷାଧିକାରୀଙ୍କ ପକ୍ଷରୁ ଗତ ଡିସେମ୍ବର ମାସରେ ଆସିକା ପୋଲିସରେ ଅଭିଯୋଗ ହୋଇଥିଲା। ଏନେଇ ଆସିକା ଥାନାରେ ନଂ.୪୬୬/୧୯ରେ ଏକ ମାମଲା ରୁଜୁ କରାଯାଇଥିଲା। ତେବେ ପୋଲିସ ପକ୍ଷରୁ ଫେରାର୍ ଥିବା ଅନ୍ୟ ଜାଲ୍ ସାର୍ଟିଫିକେଟ୍ ଧାରୀ ଶିକ୍ଷକଙ୍କୁ ଗିରଫ କରିବା ଲାଗି ଉଦ୍ୟମ ଜାରି ରହିଥିବା କୁହାଯାଇଛି। ସୂଚନା ଯୋଗ୍ୟ ଗତ ଫେବୃଆରୀ ୨୯ରେ ଆସିକା ପୋଲିସ ଆସିକା ଥାନା ଇଲାକାର ଦୁଇଜଣ ଜାଲ୍ ସାର୍ଟିଫିକେଟ୍ ଧାରୀ ଶିକ୍ଷକଙ୍କୁ ଗିରଫ କଲାବେଳେ ଏକ ଜାଲ୍ ସାର୍ଟିଫିକେଟ୍ ରାକେଟ୍ର ପର୍ଦ୍ଦାଫାସ୍ ହୋଇଥିଲା। ପୋଲିସ ଏହି ମାମଲାରେ ୨ ଶିକ୍ଷକଙ୍କ ସମେତ ସାର୍ଟିଫିକେଟ୍ ପ୍ରସ୍ତୁତି ଓ ଦଲାଲି ଅଭିଯୋଗରେ କୋଦଳା ଓ ପୋଲସରାର ୩ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲା।