ଜାହ୍ନବୀ କପୁର ଏବେ ଖୁସିରେ ଉଛୁଳୁଛନ୍ତି। ଦିନ ଯେତିକି ପାଖେଇ ଆସୁଛି ତାଙ୍କର ଉତ୍କଣ୍ଠା ସେତିକି ବଢ଼ି ବଢ଼ି ଚାଲିଛି। ହେଲେ କ’ଣ ପାଇଁ ଜାଣନ୍ତି ? କାରଣ ସେ ଅଭିନୟ କରିବାକୁ ଯାଉଥିବା ହିନ୍ଦୀ ସିନେମା ‘ଦୋସ୍ତାନା-୨’ର ଶୁଟିଂ ଆସନ୍ତା ମାସ ଅର୍ଥାତ୍ ନଭେମ୍ବର ପ୍ରଥମ ସପ୍ତାହରେ ଆରମ୍ଭ ହେବାକୁ ଯାଉଛି। ତେଣୁ ଏ ନେଇ ସେ ପ୍ରାରମ୍ଭିକ ପ୍ରସ୍ତୁତିରେ ବ୍ୟସ୍ତ ଅଛନ୍ତି। ଏ ନେଇ ଜାହ୍ନବୀ କହନ୍ତି, ‘ଏହି ଫିଲ୍ମରେ ମୋତେ ସ୍ପୋଟର୍ସ ଲୁକ୍ରେ ଦର୍ଶକ ଦେଖିବାକୁ ପାଇବେ। ତେଣୁ ସେଥିପାଇଁ ପ୍ରସ୍ତୁତ ହେବାକୁ ପଡୁଛି। ଏଥିରେ ମୋ ସହ ଅଭିନୟ କରୁଥିବା କାର୍ତ୍ତିକ ଆର୍ଯ୍ୟନ ଜଣେ ଭଲ ଅଭିନେତା। ତାଙ୍କ ସହ ମୋ ଯୋଡିକୁ ଦର୍ଶକ ନିଶ୍ଚୟ ପସନ୍ଦ କରିବେ ବୋଲି ମୋର ଆଶା ରହିଛି। ‘ଦୋସ୍ତାନା-୨’ର ଶୁଟିଂ ନଭେମ୍ବର ପ୍ରଥମ ସପ୍ତାହରେ ଚଣ୍ଡିଗଡ, ପଟିଆଲା ଏବଂ ଉତ୍ତର ଭାରତର କେତେକ ସ୍ଥାନରେ ହେବ। ଭାରତରେ ୨୨-ଦିନିଆ ଶୁଟିଂ ସିଡ୍ୟୁଲ ପରେ ବିଦେଶର କେତେକ ସ୍ଥାନରେ ଏହାର ଶୁଟିଂ ହେବାର କାର୍ଯ୍ୟକ୍ରମ ରହିଛି। ଫିଲ୍ମଟିର ନିର୍ଦ୍ଦେଶନା ଦେଉଛନ୍ତି କୋଲିନ୍ ଡି’କୁଞ୍ଚ। ‘ଭାଗ୍ ମିଲଖା ଭାଗ୍’, ‘ତଲାସ’ ଏବଂ ‘ଏନଏଚ-୧୦’ରେ ସହ ନିର୍ଦ୍ଦେଶନ ଭାବରେ କାମ କରିଥିବା କୋଲିନ୍ ପ୍ରଥମ ଥର ପାଇଁ ନିର୍ଦ୍ଦେଶକ ସିଟ୍ରେ ବସିବେ।
