ଜଳେଶ୍ୱର, ୨୫ା୮-ଜଳେଶ୍ୱର ଜିକେଭଟ୍ଟର ହସପିଟାଲରେ ହୋଇଥିବା ଭଙ୍ଗାରୁଜା ଘଟଣାକୁ ନେଇ ବାଲେଶ୍ୱର ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କ ଆବାହକତ୍ୱରେ ଶନିବାର ଜଳେଶ୍ୱର ବ୍ଲକ ସମ୍ମିଳନୀ କକ୍ଷରେ ଏକ ଶାନ୍ତି କମିଟି ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ ଜଳେଶ୍ୱର ବିଧାୟକ ଅଶ୍ୱିନୀ କୁମାର ପାତ୍ର, ଉପଜିଲାପାଳ ନିଲୁ ମହାପାତ୍ର, ଜିଲା ମୁଖ୍ୟଚିକିତ୍ସାଧିକାରୀ ଡା. କମଳାକାନ୍ତ ନାୟକ, ଜଳେଶ୍ୱର ଏସ୍ଡିପିଓ ସୁଦର୍ଶନ ଦାସ, ଜଳେଶ୍ୱର ବ୍ଲକ ଅଧ୍ୟକ୍ଷା ସବିତା ଦଳାଇ ଯୋଗଦେଇ ହସପିଟାଲର ସୁରକ୍ଷା ତଥା ସ୍ବାସ୍ଥ୍ୟସେବା କିପରି ଭଲ ଭାବରେ ହୋଇପାରିବ ସେ ବିଷୟରେ ଆଲୋଚନା କରିଥିଲେ। ଏହି ଆଲୋଚନାରେ ଜଳେଶ୍ୱରର ବିଭିନ୍ନ ବୁଦ୍ଧିଜୀବୀ, ଆଇନ୍ଜୀବୀ, ଖବରଦାତା, ନିର୍ବାଚିତ ପ୍ରତିନିଧି ଓ ପ୍ରଶାସନିକ ଅଧିକାରୀମାନେ ଯୋଗଦେଇ ମତାମତ ରଖିଥିଲେ।
ଜିଲାପାଳ ସମସ୍ତ ଆଲୋଚନା ଶୁଣି ଏହାର ସ୍ଥାୟୀ ସମାଧାନ ନିମନ୍ତେ ଜିଲା ମୁଖ୍ୟଚିକିତ୍ସାଧିକାରୀଙ୍କୁ ଜିକେ ଭଟ୍ଟର ହସପିଟାଲରେ ଖାଲିଥିବା ଡାକ୍ତର ପଦବୀ ପୂରଣ, ରୋଗୀ କଲ୍ୟାଣ ସମିତିର ପୁର୍ନଗଠନ, ଶବ ବ୍ୟବଚ୍ଛେଦ ପାଇଁ ସୁଇପର ନିଯୁକ୍ତି କରିବା ପାଇଁ ନିର୍ଦ୍ଦେଶ ଦେଇଥିଲେ। ଅଧିକ ଶୌଚାଳୟ ନିର୍ମାଣ ପାଇଁ ଜଳେଶ୍ୱର ମ୍ୟୁନିସିପାଲିଟିର କାର୍ଯ୍ୟନିର୍ବାହୀ ଅଧିକାରୀଙ୍କୁ ନିର୍ଦ୍ଦେଶ ଦେଇଥିବା ବେଳେ ହସ୍ପିଟାଲରେ ବାରମ୍ବାର ଗଣ୍ଡଗୋଳ ହେଉଥିବାରୁ ସୁରକ୍ଷା ପାଇଁ ସେଠାରେ ପୋଲିସ ବ୍ୟବସ୍ଥା କରିବା ପାଇଁ ଜଳେଶ୍ୱର ଏସ୍ଡିପିଓଙ୍କୁ କହିଥିଲେ। ସେହିପରି ଜଳେଶ୍ୱର ଜନସାଧାରଣଙ୍କୁ ସରକାରୀ ସମ୍ପତ୍ତିର ସୂରକ୍ଷା ପାଇଁ ଯନତ୍ବାନ ହେବା ସଙ୍ଗେ ସଙ୍ଗେ ଆଇନ୍କୁ ସମ୍ମାନ ଦେବା ପାଇଁ ଅନୁରୋଧ କରିଥିଲେ। ଏହି ଆଲୋଚନାରେ ବ୍ଲକ ଉପାଧ୍ୟକ୍ଷ ବ୍ରଜମୋହନ ପ୍ରଧାନ, କମଳ ଚକ୍ରବର୍ତ୍ତୀ, ସତ୍ୟସୁନ୍ଦର ଦାସ, ସୁଦର୍ଶନ ଦାସ, ସିତାଂଶୁ ସେନାପତି, ଅରୁଣ ବେଜ, କୁଞ୍ଜ ବିହାରୀ ଦାସ, ଦିଲ୍ଲୀପ ଗିରି, ମଧୁସୂଦନ ସେନାପତି, ରାଧାଶ୍ୟାମ ସାହୁ, ସଞ୍ଜୟ ମହାନ୍ତି, ସେକ ଅବଦୁଲ ରହିମ ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିବାବେଳେ ଜଳେଶ୍ୱର ବିଡିଓ ନିତ୍ୟାନନ୍ଦ ସାହୁ, ତହସିଲଦାର ଅଭିମନ୍ୟୁ ପଣ୍ଡା, ହସ୍ପିଟାଲର ମୁଖ୍ୟ ଚିକିତ୍ସକ ଦିଲୀପ ପାତ୍ର ଓ ମ୍ୟୁନିସିପାଲଟି କାର୍ଯ୍ୟନିର୍ବାହୀ ଅଧିକାରୀ ପାଣି ପ୍ରମୁଖ ଉପସ୍ଥିତ ଥିଲେ।