ହରାରେ, ୧୭।୪- ଭ୍ରମଣକାରୀ ୟୁଏଇ ବିପକ୍ଷରେ ମଙ୍ଗଳବାର ଏଠାରେ ଖେଳାଯାଇଥିବା ଅନ୍ତିମ ତଥା ୪ର୍ଥ ଦିନିକିଆ ମ୍ୟାଚ୍କୁ ଜିମ୍ବାଓ୍ବେ ୩ ଉଇକେଟ୍ରେ ଜିତିନେଇଛି। ପ୍ରଥମେ ବ୍ୟାଟିଂ କରି ୟୁଏଇ ୧୭୫ ରନ ଅଲ୍ଆଉଟ୍ ହୋଇଥିଲା। ତେବେ ବର୍ଷା କାରଣରୁ ଜିମ୍ବାଓ୍ବେ ୩୦ ଓଭରରେ ୧୨୮ ରନର ଟାର୍ଗେଟ୍ ଧାର୍ଯ୍ୟ ହୋଇଥିଲା। ଫଳରେ ଜିମ୍ବାଓ୍ବେ ୩୧ ବଲ୍ ବଳକା ଥାଇ ୭ ଉଇକେଟ୍ ହରାଇ ମ୍ୟାଚ୍ କବ୍ଜା କରିନେଇଥିଲା। ଏହି ବିଜୟ ସହ ଜିମ୍ବାଓ୍ବେ ୪ ମ୍ୟାଚ୍ବିଶିଷ୍ଟ ସିିରିଜକୁ ୪-୦ରେ କ୍ଲିନ୍ସୁଇପ୍ କରିନେଇଛି।
ସ୍ଥାନୀୟ ହରାରେ ସ୍ପୋଟର୍ସ କ୍ଲବରେ ଖେଳାଯାଇଥିବା ଏହି ମ୍ୟାଚ୍ରେ ଟସ୍ ଜିତି ୟୁଏଇ ୪୭.୧ ଓଭରରେ ୧୭୫ ରନରେ ସୀମିତ ରହିଥିଲା। ଦଳ ପକ୍ଷରୁ ଓପନର୍ ଚିରାଗ ସୁରି ୪୬ ଓ ସିପି ରିଜଓ୍ବାନ ୪୫ ଓ ମହମ୍ମଦ ଉସମାନ ୨୭ ରନ କରିଥିବାବେଳେ ଅନ୍ୟମାନେ ବିଫଳ ହୋଇଥିଲେ। ଘରୋଇ ଦଳ ପକ୍ଷରୁ କାଏଲ୍ ଜାର୍ଭିସ, କ୍ରିସ ମୋଫୁ, ସିନ୍ ଓ୍ବିଲିୟମ୍ସ ୨ଟି ଲେଖାଏ ଉଇକେଟ୍ ଅକ୍ତିଆର କରିଥିଲେ। ଜବାବରେ ଜିମ୍ବାଓ୍ବେ ଇନିଂସ ଆରମ୍ଭରୁ ବର୍ଷା ହେବାରୁ ମ୍ୟାଚ୍କୁ ୩୦ ଓଭରରେ ୧୨୮ ରନର ଟାର୍ଗେଟ୍ ଧାର୍ଯ୍ୟ କରାଯାଇଥିଲା। ଜିମ୍ବାଓ୍ବେ ବ୍ୟାଟ୍ସମ୍ୟାନଙ୍କ ମିଳିତ ସଫଳତା ବଳରେ ୨୪.୫ ଓଭରରେ ୭ ଉଇକେଟ୍ ହରାଇ ଟାର୍ଗେଟ୍ ହାସଲ କରିନେଇଥିଲା। ଦଳ ପକ୍ଷରୁ ତିମସିଏନ ମାରୁମା ସର୍ବାଧିକ ୩୫ ରନ କରିଥିବାବେଳେ ବ୍ରାଏନ ଚାରି (୧୯), ରେଗିସ ଚକାଭା (୨୮) ଓ ସିନ୍ ଓ୍ବିଲିୟମ୍ସ (୨୦) ତାଙ୍କୁ ସହାୟତା କରିଥିଲେ। ୟୁଏଇ ଅଧିନାୟକ ମହମ୍ମଦ ନବିଙ୍କୁ ୨ଟି ଉଇକେଟ୍ ମିଳିଥିଲା।
