ହାରାରେ, ୭ା୯(ପି.ଟି.): ଜିମ୍ବାଓ୍ବେର ପୂର୍ବତନ ରାଷ୍ଟ୍ରପତି ରବର୍ଟ ମୁଗାବେ(୯୫)ଙ୍କ ପରଲୋକ ହୋଇଯାଇଛି। ଏନେଇ ଦେଶର ରାଷ୍ଟ୍ରପତି ଇମର୍ସନ୍ ନାଙ୍ଗଗ୍ବା ଶୁକ୍ରବାର ଘୋଷଣା କରିଛନ୍ତି। ୧୯୮୦ରୁ ୨୦୧୭ ମଧ୍ୟରେ ମୁଗାବେ ଜିମ୍ବାଓ୍ବେକୁ ଦୃଢ ନେତୃତ୍ୱ ଦେବାରେ ସକ୍ଷମ ହୋଇଥିଲେ। ଦେଶବାସୀଙ୍କୁ ମୁକ୍ତ ଓ ସେମାନଙ୍କୁ ସଶକ୍ତ କରିବାରେ ମୁଗାବେଙ୍କ ଭୂମିକା ଗୁରୁତ୍ୱପୂର୍ଣ୍ଣ ଥିଲା। ମୁକ୍ତି ଆନ୍ଦୋଳନର ଜଣେ ଯୋଦ୍ଧା ଭାବେ ସେ ସୁପରିଚିତ। ତାଙ୍କ ସଂଘର୍ଷମୟ ଜୀବନ ଓ ଦେଶ ପ୍ରତି ଭଲ ପାଇବାକୁ କେବେହେଲେ ଭୁଲି ହେବନାହିଁ ବୋଲି ରାଷ୍ଟ୍ରପତି ଇମର୍ସନ୍ ପ୍ରକାଶ କରିଛନ୍ତି। ୨୦୧୭ ନଭେମ୍ବର ପରଠାରୁ ସେ ମାନସିକ ଭାବେ ଦୁର୍ବଳ ହୋଇପଡ଼ିବା ସହ ସ୍ବାସ୍ଥ୍ୟଗତ ଅବନତି ପରିଲକ୍ଷିତ ହୋଇଥିଲା। ତାଙ୍କୁ ସିଙ୍ଗାପୁରସ୍ଥିତ ଏକ ହସ୍ପିଟାଲରେ ଚିକିତ୍ସା କରାଯାଉଥିଲା। ହଠାତ୍ ତାଙ୍କ ପରଲୋକ ସମସ୍ତଙ୍କୁ ଆଶ୍ଚର୍ଯ୍ୟ କରିଛି।
ମୁଗାବେ ଜଣେ ପୂର୍ବତନ ରାଜନୈତିକ ବନ୍ଦୀ ଥିବାବେଳେ ଜଣେ ଦକ୍ଷ ନେତାର ପରିଚୟ ଦେଇ ୧୯୮୦ ନିର୍ବାଚନରେ କ୍ଷମତାକୁ ଆସିଥିଲେ। ବର୍ଣ୍ଣ ବୈଷମ୍ୟବାଦ ଦୂର ସହ ଦେଶର ଶିକ୍ଷା, ସ୍ବାସ୍ଥ୍ୟ, ଆର୍ଥକ ବିକାଶ କ୍ଷେତ୍ରକୁ ପ୍ରଶସ୍ତ କରିବା ଲାଗି ଅନେକ ପଦକ୍ଷେପ ଗ୍ରହଣ କରିଥିଲେ। ଭୂସଂସ୍କାର ଆଇନ ପ୍ରଣୟନ, କୃଷି ବିକାଶ, ବିଦେଶୀ ପୁଞ୍ଜିଲଗାଣକୁ ସେ ଗୁରୂୁତ୍ୱ ଦେଇଆସିଥିଲେ। ତେବେ ନିର୍ବାଚନରେ ରିଗିଂ ଓ ମାନବାଧିକାର ଉଲ୍ଲଂଘନ ଭଳି ଅନେକ ଅଭିଯୋଗ ତାଙ୍କ ବିରୋଧରେ ଆସିଥିଲା। ଜଣେ ଦୃଢମନା, ଦକ୍ଷ ଶାସନ ପ୍ରଣାଳୀ ତାଙ୍କୁ ଆଫ୍ରିକାର ଜଣେ ମହାନ୍ ନେତାର ମାନ୍ୟତା ଦେଇଛି।