ମୁନିଗୁଡ଼ା,୧୭।୨(ଡି.ଏନ୍.ଏ.): ରାୟଗଡ଼ା ଜିଲାପାଳ ପ୍ରମୋଦ କୁମାର ବେହେରା ସୋମବାର ମୁନିଗୁଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିଦର୍ଶନ କରିଛନ୍ତି। ସେ ଅଚାନକ ମେଡିକାଲରେ ପହଞ୍ଚି ଡ. ସଞ୍ଜୟ କୁମାରଙ୍କୁ ବିଭିନ୍ନ ସମସ୍ୟା ସମ୍ପର୍କରେ ପଚାରି ବୁଝିବା ସହ ସ୍ବାସ୍ଥ୍ୟକେନ୍ଦ୍ରର ବିଭିନ୍ନ ବିଭାଗ ବୁଲି ଦେଖିଥିଲେ। ଜିଲାପାଳ ରୋଗୀମାନଙ୍କୁ ଭେଟିବା ସମୟରେ ଜଣେ ଯକ୍ଷ୍ମା ରୋଗୀଙ୍କୁ ଔଷଧ ଖୁଆଇଥିଲେ। ତେବେ ଆବଶ୍ୟକ ଡାକ୍ତର ଓ ଏକ୍ସ-ରେ ମେଶିନ ଲାଗି ଟେକ୍ନିସିୟାନ ନ ଥିବାରୁ ଗ୍ରାମବାସୀ ଅଭିଯୋଗ କରିଥିଲେ। ଏ ନେଇ ତୁରନ୍ତ ସମସ୍ୟାର ସମାଧାନ କରାଯିବ ବୋଲି ଜିଲାପାଳ ବେହେରା ପ୍ରତିଶ୍ରୁତି ଦେଇଛନ୍ତି। ଅନ୍ୟମାନଙ୍କ ମଧ୍ୟରେ ପିଡି-ଡିଆର୍ଡିଏ ଅମୃତ ଋତୁରାଜ, ଉପ ଜିଲାପାଳ ସିଦ୍ଧେଶ୍ୱର ବନ୍ଦର ପ୍ରମୁଖ ଉପସ୍ଥିତ ଥିଲେ।