ଯାଜପୁର ଅଫିସ,୩ା୧: ଯାଜପୁର ଜିଲା ଦଶରଥପୁର ବ୍ଲକ ଅନ୍ତର୍ଗତ ଥାଳକୁଡି ଗ୍ରାମ ପଞ୍ଚାୟତର କସବା ଓ ଥାଳକୁଡି ଗ୍ରାମର ୧୦୩ ଚାଷୀଙ୍କ ବୀମା ଅର୍ଥ ହେରଫେର ଅଭିଯୋଗ ସଂକ୍ରାନ୍ତରେ ଯାଜପୁର ଜିଲାପାଳଙ୍କ କୋର୍ଟରେ ରାୟ ପ୍ରକାଶ ପାଇଛି। ଏଥିରେ ସଂପୃକ୍ତ ବୀମା କମ୍ପାନୀ ଓରିଏଣ୍ଟାଲ ଇନସ୍ୟୁରାନ୍ସର କୌଣସି ଦାୟିତ୍ୱ ନାହିଁ। ପ୍ରଧାନମନ୍ତ୍ରୀ ଫସଲ ବୀମା ଯୋଜନାର ଗାଇଡଲାଇନ ଅନୁସାରେ ସମ୍ପୃକ୍ତ ବ୍ୟାଙ୍କ ୧୦୩ ଚାଷୀଙ୍କ ବୀମାରାଶି ପ୍ରଦାନ କରିବାକୁ ଦାୟୀ ବୋଲି କୋର୍ଟରେ ରାୟ ପ୍ରକାଶ ପାଇଛି। ସୂଚନାଯୋଗ୍ୟ ଯେ, କସବା ଓ ଥାଳକୁଡି ଗ୍ରାମର ୨୫୭ ଜଣ ଚାଷୀ ମଙ୍ଗଳପୁର ପ୍ୟାକ୍ସ ଜରିଆରେ ବୀମାଭୁକ୍ତ ହୋଇଥିଲେ। ଏଥିରୁ ୧୫୪ଜଣ ଚାଷୀଙ୍କୁ ବୀମାରାଶି ପ୍ରଦାନ କରାଯାଇଥିଲା। କିନ୍ତୁ ପ୍ୟାକ୍ସ କର୍ତ୍ତୃପକ୍ଷଙ୍କ ଭୁଲବଶତଃ ଏନ୍ଆଇସି ପୋର୍ଟାଲରେ ଅନ୍ୟ ପଞ୍ଚାୟତରେ ବାକି ୧୦୩ ଜଣ ଚାଷୀଙ୍କ ନାମ ତାଳିକା ପଞ୍ଜିକୃତ ହୋଇଥିଲା। ସରକାରଙ୍କ ଘୋଷଣା ଅନୁସାରେ ସେହି ପଞ୍ଚାୟତର ଚାଷ ବୀମା ପରିସର ହୋଇ ନ ଥିଲା। ଏହାକୁ ନେଇ ସମ୍ପୃକ୍ତ ଚାଷୀମାନେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ହାଇକୋର୍ଟ ଡବ୍ଲ୍ୟୁପି(ସି) ୧୮୮୦୯/୨୦୧୯ରେ ୨ମାସ ମଧ୍ୟରେ ଅଭିଯୋଗର ସମାଧାନ କରିବାକୁ ଯାଜପୁର ଜିଲାପାଳଙ୍କୁ ନିର୍ଦ୍ଦେଶ ଦେଇଥିଲେ। ଏହିକ୍ରମରେ ଜିଲାପାଳଙ୍କ କୋର୍ଟରେ୧୯ା୧୨ା୨୦୧୯ରେ ଚୂଡ଼ାନ୍ତ ଶୁଣାଣି ହୋଇଥିଲା। ଶୁଣାଣିରେ ଓରିଏଣ୍ଟାଲ ଇନସ୍ୟୁରାନ୍ସ କମ୍ପାନୀ ଏବଂ ନ୍ୟାଶନାଲ ଏଗ୍ରିକଲଚର ଇନ୍ସ୍ୟୁରାନ୍ସ କମ୍ପାନୀକୁ ଉପସ୍ଥିତ ରହିବାକୁ ନିର୍ଦ୍ଦେଶ ହୋଇଥିଲା। ଏହପରେ ଓରିଏଣ୍ଟାଲ ଇନସ୍ୟୁରାନ୍ସ କମ୍ପାନୀ ଓକିଲଙ୍କ ଜରିଆରେ ଆବଶ୍ୟକ କାଗଜପତ୍ର ଦାଖଲ କରିଥିଲା ା ଅନ୍ୟ ପଞ୍ଚାୟତରେ ଭୁଲ ପଞ୍ଜିକରଣ ଯୋଗୁ ଏଭଳି ପରିସ୍ଥିତି ସୃଷ୍ଟି ହୋଇଥିବା କୋର୍ଟରେ କାଗଜପତ୍ର ଦାଖଲ ହୋଇଥିଲା। ଏଥିରେ ଗରିବ ଚାଷୀଙ୍କ କୌଣସି ଭୁଲ ନାହିଁ। ସେମାନେ ନୋଡାଲ ବ୍ୟାଙ୍କ ଜରିଆରେ ବୀମା ପ୍ରିମିୟମ ପୈଠ କରିଛନ୍ତି। ତେଣୁ ସେହି ୧୦୩ ଜଣ ଚାଷୀ ଅନ୍ୟଚାଷୀଙ୍କ ଭଳି ବୀମାରାଶି ପାଇବାକୁ ହକଦାର ଅଟନ୍ତି। ତେଣୁ ନୋଡାଲ ବ୍ୟାଙ୍କ ଯଥା କଟକ ସେଣ୍ଟ୍ରାଲ କୋପରେଟିଭ ବ୍ୟାଙ୍କ ସମ୍ପାଦକ ଓ ବ୍ରାଞ୍ଚ ମ୍ୟାନେଜର, ଯାଜପୁର ଟାଉନ ବ୍ରାଞ୍ଚ ଓ ଦଶରଥପୁର ବ୍ରାଞ୍ଚ ସମେତ ମଙ୍ଗଳପୁର ପ୍ୟାକ୍ସର ନିର୍ବାହୀ ଅଧିକାରୀ ଓ ଓରିଏଣ୍ଟାଲ ଇନସ୍ୟୁରାନ୍ସ କମ୍ପାନୀର ଅବହେଳା ଯୋଗୁ ୧୦୩ ଜଣ ଚାଷୀ ବୀମା ଅର୍ଥ ପାଇବାରୁ ବଞ୍ଚିତ ହୋଇଛନ୍ତି। ତେଣୁ ସଂପୃକ୍ତ ବ୍ୟାଙ୍କ ଅଧିକାରୀମାନେ ତୁରନ୍ତ ୧୦୩ ଜଣ ଚାଷୀଙ୍କ ବୀମାରାଶି ପ୍ରଦାନ କରିବାକୁ ପଦକ୍ଷେପ ନେବାକୁ ଜିଲାପାଳଙ୍କ କୋର୍ଟରେ ନିର୍ଦ୍ଦେଶ ହୋଇଛି।