ପାଟଣା,୨୬।୫(ସ୍ବ.ପ୍ର.): କରୋନା ଭୁତାଣୁ ସଂକ୍ରମଣ ସକାଶେ ଦେଶରେ ଲକ୍ଡାଉନ ଜାରି ରହିଛି। ଇତିମଧ୍ୟରେ ପ୍ରବାସୀମାନେ ବିଭିନ୍ନ ପର୍ଯ୍ୟାୟରେ ନିଜ ନିଜ ରାଜ୍ୟକୁ ଫେରିବାରେ ଲାଗିଛନ୍ତି। ସୋମବାର ଗୁଜୁରାଟର ସୁରଟରୁ କିଛି ଲୋକଙ୍କୁ ନେଇ ଏକ ବସ୍ କୋଲକାତା ଅଭିମୁଖେ ଯାଉଥିଲା। ସେହି ସମୟରେ ରାଞ୍ଚି ବିଜୟୱାଡା ୨୨୦ ନମ୍ବର ଜାତୀୟ ରାଜପଥର କେନ୍ଦୁଝର ଜିଲା ପାଟଣା ବ୍ଲକ ମଲ୍ଲୀ ପଶିଠାରେ ଏହି ଯାତ୍ରୀମାନେ ବସ୍ରୁ ଓହ୍ଲାଇ ବିଭିନ୍ନ ଦୋକାନକୁ ଯାଇ ଚା’, ବିସ୍କୁଟ ଓ କଦଳି କିଣିବା ସହ ବଜାରରେ କିଛି ସମୟ ପାଇଁ ବୁଲାବୁଲି କରିଥିଲେ। ଖବର ପାଇ ଘଟଣାସ୍ଥଳରେ ସ୍ଥାନୀୟ ସରପଞ୍ଚ ଭାମାମଣି ଦାସ ପହଞ୍ଚି ବଜାରକୁ ୨୪ ଘଣ୍ଟା ପାଇଁ ସଟ୍ଡାଉନ ଘୋଷଣା କରିଛନ୍ତି। ଏଥିସହ ସଂକ୍ରମଣ ଓ ସୁରକ୍ଷାକୁ ଦୃଷ୍ଟିରେ ରଖି ସେ ପାଟଣା ଅଗ୍ନିଶମ ବିଭାଗକୁ ଡକାଇ ଉକ୍ତ ବଜାରକୁ ବିଶୋଧିତ କରାଇଛନ୍ତି। ଆବଶ୍ୟକସ୍ଥଳେ ସଟ୍ଡାଉନକୁ ୭୨ଘଣ୍ଟାକୁ ବୃଦ୍ଧି କରାଯିବ ବୋଲି ଭାମାମଣି କହିଛନ୍ତି।
