ଅନୁଗୋଳ ଅଫିସ, ୧୧।୬ଛେଣ୍ଡିପଦା ବ୍ଲକ କୁଶକିଳା ସରପଞ୍ଚଙ୍କ ବିରୋଧରେ ଜିଲା ପ୍ରଶାସନ ନିକଟରେ ଅଭିଯୋଗ ହୋଇଛି। ଉକ୍ତ ପଞ୍ଚାୟତର କେତେଜଣ ବ୍ୟକ୍ତି ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି ଯେ, ମହିଳା ସରପଞ୍ଚଙ୍କ ପରିବର୍ତ୍ତେ ତାଙ୍କ ଦେଢ଼ଶୂର ଓ ପୁତୁରା ପଞ୍ଚାୟତର ସମସ୍ତ କାର୍ଯ୍ୟ ବୁଝାଶୁଝା କରୁଛନ୍ତି। ଏପରି କି ତେନ୍ତୁଲିଆ ଛକ ଠାରୁ ବିଦ୍ୟୁତ୍ ଟ୍ରାନ୍ସଫର୍ମର ରାସ୍ତା କଂକ୍ରିଟ ହୋଇଥିଲେ ମଧ୍ୟ ପୁଣି ସେଠାରେ ରାସ୍ତା କରିବା ଓ ଏକ ଭଲ ପୋଲ ଭାଙ୍ଗି ପୁନଃ ନିର୍ମାଣ ପାଇଁ ମସୁଧା କରାଯାଉଛି। ଜିଲା ଖଣିଜ ପାଣ୍ଠିରୁ ତିନୋଟି ପ୍ରୋଜେକ୍ଟ ପାଇଁ ମଞ୍ଜୁର ହୋଇଥିବା ଟଙ୍କାକୁ ଅବାଟରେ ଖର୍ଚ୍ଚ କରାଯାଉଥିବାରୁ ଜିଲାପାଳ ଏଥିରେ ହସ୍ତକ୍ଷେପ କରିବାକୁ ଅଞ୍ଚଳବାସୀମାନେ ନିବେଦନ କରିଛନ୍ତି।
ଅଞ୍ଚଳବାସୀ ଅଭିଯୋଗ କରିଛନ୍ତି ଯେ, ତେନ୍ତୁଳି ଛକ ଠାରୁ ଟ୍ରାନ୍ସଫର୍ମର ପର୍ଯ୍ୟନ୍ତ ଥିବା ଭଲ ପୋଲକୁ ଭାଙ୍ଗି ଉକ୍ତ ସ୍ଥାନରେ ଅନ୍ୟ ଏକ ପୋଲ ନିର୍ମାଣ କରିବାକୁ ମସୁଧା ହେଉଛି। ପୋଲ ସାଇଟ୍ରେ ଲୁହା ପାଣି ପାଇପ୍କୁ ମେଶିନ୍ ଦ୍ୱାରା କାଟି ଦିଆଯାଇଛି। ଏ ନେଇ କନିଷ୍ଠ ଯନ୍ତ୍ରୀଙ୍କୁ ଗ୍ରାମବାସୀ ଅଭିଯୋଗ କରିଥିଲେ। ସେ ଆସି ଘଟଣାସ୍ଥଳ ଅନୁଧ୍ୟାନ କରିବା ସହ ଲୋକଙ୍କ ମତାମତ ଲୋଡ଼ିଥିଲେ। କିନ୍ତୁ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନ ଥିଲା। ହରିଜନ ସାହି, ଗୋଲାଘର ସାହି, ପୁରୁଣାଗ୍ରାମ ରାସ୍ତା, ଖଳିମୁଣ୍ଡା ରାସ୍ତା ଅସମ୍ପୂର୍ଣ୍ଣ ହୋଇ ପଡ଼ିରହିଛି। ଜିଲାପାଳ ଘଟଣାରେ ହସ୍ତକ୍ଷେପ ନ କଲେ ଆନ୍ଦୋଳନକୁ ଓହ୍ଲାଇବୁ ବୋଲି ପାଣ୍ଡବ ସାହୁ, ଗଗନ ସାହୁ, ପୀତବାସ ସାହୁ, ଅଜୁ ବିଶ୍ୱାଳ, ପ୍ରଦୀପ ବେହେରା, ପୀତାମ୍ବର ସାହୁ, ଅଭୟ ସାହୁ, ଭଗବାନ ସାହୁ, ଭୁବନ ବେହେରା, ପ୍ରମୋଦ ପ୍ରଧାନ, ଟିକନ ପ୍ରଧାନ, ହାଡ଼ିବନ୍ଧୁ ନାଏକ, ରମେଶ ପ୍ରଧାନ, ବସନ୍ତ ନାଏକ, ମମତା ନାଏକ, ଜଗବନ୍ଧୁ ନାଏକ ପ୍ରମୁଖ ଚେତାବନୀ ଦେଇଛନ୍ତି। ଅନ୍ୟପକ୍ଷରେ ସରପଞ୍ଚଙ୍କ ଦେଢ଼ଶୂର ସୁଶାନ୍ତ କୁମାର ସାହୁ କହିଛନ୍ତି, ଲୋକମାନେ କରିଥିବା ଅଭିଯୋଗ ସମ୍ପୂର୍ଣ୍ଣ ମିଥ୍ୟା। ଅଞ୍ଚଳକୁ ଆସିଥିବା ପୋଲ କାମ କରାଇ ନ ଦେବା ପାଇଁ କିଛି ବିରୋଧି ଗୋଷ୍ଠୀ ଷଡ଼ଯନ୍ତ୍ର କରି ଏଭଳି କାର୍ଯ୍ୟ କରୁଛନ୍ତି।