ଜଗତ୍ସିଂହପୁର ଅଫିସ,୧୮ା୧୨: ନିକଟରେ ଓଡ଼ିଶା ହ୍ୟାଣ୍ଡବଲ୍ ଆସୋସିଏଶନ୍ ଆନୁକୂଲ୍ୟରେ ଜଗତ୍ସିଂହପୁର ଜିଲା ହ୍ୟାଣ୍ଡବଲ୍ ଆସୋସିଏସନ୍ ତରଫରୁ ଆୟୋଜିତ ଓଡ଼ିଶା ହ୍ୟାଣ୍ଡବଲ ଚାମ୍ପିୟନଶିପ୍ ପ୍ରତିଯୋଗିତା ଅନୁଷ୍ଠିତ ହୋଇଛି। ଏଥିରେ ଜଗତ୍ସିଂହପୁର ଜିଲା ମହିଳା ହ୍ୟାଣ୍ଡବଲ୍ ଦଳ ଚାମ୍ପିୟନ ହେବାର ଗୌରବ ହାସଲ କରିଛି। ଏହାପରେ ମଙ୍ଗଳବାର ଦଳର ଖେଳାଳିମାନେ ଜିଲାପାଳ ସଂଗ୍ରାମ କେଶରୀ ମହାପାତ୍ର ଓ ଏସ୍ପି ପ୍ରକାଶ ଆର୍ଙ୍କୁ ସୌଜନ୍ୟମୂଳକ ସାକ୍ଷାତ କରିଛନ୍ତି। ସାକ୍ଷାତ ସମୟରେ ଜିଲାପାଳ ଓ ଏସ୍ପି ସେମାନଙ୍କୁ ସ୍ବାଗତ କରିବା ସହ ଶୁଭେଚ୍ଛା ଜଣାଇଥିଲେ। ଜିଲାପାଳ କହିଥିଲେ, ୨୦୨୦ ଜାନୁୟାରୀ ପ୍ରଥମ ସପ୍ତାହରେ ଜିଲାପାଳଙ୍କ କାର୍ଯ୍ୟାଳୟ ପରିସର ସଦ୍ଭାବନା ସଭାଗୃହରେ ଦଳର କୃତିତ୍ୱକୁ ନେଇ ଏକ ପ୍ରଦର୍ଶନୀ କରାଯିବ। ଏହିଦିନ ସମସ୍ତ ଖେଳାଳିଙ୍କୁ ଟ୍ରାକ୍ ସୁଟ୍ ଓ ଜୋତା ପ୍ରଦାନ କରାଯିବ। ଏଥିସହ ଜାନୁୟାରୀ ୨୬ରେ ଏକ ପ୍ରଦର୍ଶନୀ ମ୍ୟାଚ୍ କରାଯିବାକୁ ପରାମର୍ଶ ଦେଇଥିଲେ। ଏସ୍ପି ଦଳରେ ସ୍ଥାନ ପାଇଥିବା ୬ ଜଣ ପୋଲିସ ଖେଳାଳିଙ୍କୁ ବତନ୍ତ୍ର ଭାବେ ପ୍ରୋତ୍ସାହନ ଦେବେ ବୋଲି ଘୋଷଣା କରିଥିଲେ। ଜିଲା ହ୍ୟାଣ୍ଡବଲ୍ ଆସୋସିଏଶନ୍ ପ୍ରତିଷ୍ଠାତା ପ୍ରିୟନାଥ ରାୟ, ସଭାପତି ବିପ୍ଳବ ଚୌଧୁରୀ, ସାଧାରଣ ସମ୍ପାଦକ ସାରଦା ପ୍ରସାଦ ଦାସ, ଉପସଭାପତି ବିଜୟ ରାଉତ, କୋଚ୍ ଶ୍ରୀନିବାସ ରାଉତ, ପ୍ରସାଦ ରାୟ, ସଂଗ୍ରାମ କେଶରୀ ସ୍ବାଇଁ, ନିହାର ରଞ୍ଜନ ଜେନା, ସତ୍ୟସୂର୍ଯ୍ୟ ମଲ୍ଲିକ, ବୈଶାଳୀ ଭୋଇ, ମହିଳା ଦଳର କ୍ୟାପଟେନ୍ ପୁଷ୍ପାଞ୍ଜଳି ସ୍ବାଇଁ, ମନୋଜ ସାହୁ ପ୍ରମୁଖ ଉପସ୍ଥିତ ଥିଲେ। ଖେଳାଳି ସେମାନଙ୍କ ନାନା ସମସ୍ୟା ଓ ତାର ସମାଧାନ ପାଇଁ ଜିଲାପାଳଙ୍କ ସହ ଆଲୋଚନା କରିଥିଲେ।