ମାଲକାନଗିରି,୩୦ା୩ (ଡି.ଏନ୍.ଏ.): କରୋନା ଭାଇରସ୍ଜନିତ ରୋଗ ପାଇଁ ଏବେ ସମଗ୍ର ବିଶ୍ୱରେ ଆତଙ୍କ ଦେଖାଦେଇଛି। ଏହି ରୋଗ ଅନ୍ୟ ଦେଶରୁ ଆସଥିବା ଲୋକଙ୍କ ଦ୍ୱାରା ଭାରତରେ ସଂକ୍ରମଣ ହୋଇଥିବା ସରକାର ସ୍ପଷ୍ଟ କରିଛନ୍ତି। ମାଲକାନଗରି ଜିଲାରେ ଏହାର ପ୍ରଭାବ ନ ଥିଲେ ମଧ୍ୟ ଏହି ଜିଲାରୁ ରାଜ୍ୟ ବାହାରକୁ ଯାଇ ଏବେ ଗ୍ରାମକୁ ଫେରୁଥିବା ଶ୍ରମିକମାନଙ୍କ ଉପରେ ସମସ୍ତଙ୍କ ନଜର ଲାଗିଛି। ଏହି ଶ୍ରମିକମାନେ ଯେ ରୋଗ ସୃଷ୍ଟି ନ କରିବେ ସେନେଇ ଆଶଙ୍କା ସୃଷ୍ଟି ହୋଇଛି। ବିଶେଷ କରି ଏହି ରୋଗ ଦକ୍ଷିଣ ଭାରତରେ ଦେଖାଦେଇଥିଲା ବେଳେ ବର୍ତ୍ତମାନ ଦକ୍ଷିଣ ଭାରତର ମହାରାଷ୍ଟ୍ର, ତାମିଲନାଡୁ କେରଳ,କର୍ନାଟକ ଆଦି ରାଜ୍ୟରେ ମୃତ୍ୟୁ ସଂଖ୍ୟା ଅଧିକ ରହିଛି। ମାଲକାନଗିରି ଜିଲାରେ ପ୍ରତିବର୍ଷ ଦାଦନ ଶ୍ରମିକ ଭାବେ କାର୍ଯ୍ୟ କରିବାକୁ ବହୁ ସଂଖ୍ୟକ ଶ୍ରମିକ ଉପରୋକ୍ତ ରାଜ୍ୟକୁ ଯାଇଥାନ୍ତି। ଏବେ ସେସବୁ ରାଜ୍ୟରେ ଲକ୍ଡାଉନ୍ ଯୋଗୁ ବିଭିନ୍ନ କଳକାରଖାନା ବନ୍ଦ ରହିବା ସହ ଗାଡ଼ିମୋଟର ଚଳାଚଳ ବନ୍ଦ ରହିଛି। ସାମାଜିକ ଦୂରତା ପାଳନ କରିବା ସହ ଘରୁ ନ ବାହାରିବା ପାଇଁ କଡାକଡି ନିୟମ ପାଳନ ହେଉଛି। ବିଭିନ୍ନ କାରଖାନାରେ କାମ କରୁଥିବା ଶ୍ରମିକଙ୍କୁ ମାଲିକମାନେ ବାହାର କରି ଦେଉଛନ୍ତି। ଫଳରେ ଅନେକ ଶ୍ରମିକ ସମ୍ପୃକ୍ତ ରାଜ୍ୟଗୁଡ଼ିକରେ ରହି ସେମାନଙ୍କୁ ଉଦ୍ଧାର ପାଇଁ ସରକାରଙ୍କୁ ନିବେଦନ କରୁଛନ୍ତି। ଅନେକ ଶ୍ରମିକ କୌଣସି ଉପାୟରେ ମାଲକାନଗିରି ଜିଲାକୁ ପଳାଇ ଆସିଛନ୍ତି। ଏପରି କି ଚାଲିଚାଲି ମଧ୍ୟ ଶ୍ରମିକମାନେ ଆସୁଥିବା ଦେଖିବାକୁ ମିଳୁଛି। ଏହି ଶ୍ରମିକମାନେ ନିଜ ଗ୍ରାମରେ ପହଞ୍ଚତ୍ଲା ପରେ ଅଧିକାଂଶ ଶ୍ରମିକ ସେମାନଙ୍କ ସ୍ବାସ୍ଥ୍ୟ ପରୀକ୍ଷା କରୁନାହାନ୍ତି। ଏହି ଶ୍ରମିକମାନଙ୍କ ଦ୍ୱାରା କରୋନା ଭାଇରସ୍ଜନିତ ରୋଗ ବିପଦ ସୃଷ୍ଟି କରିପାରେ ବୋଲି ଆଶଙ୍କା କରାଯାଉଛି। ଜିଲା ପ୍ରଶାସନ ପକ୍ଷରୁ ୧୧୧ଟି ପଞ୍ଚାୟତ, ମାଲକାନଗିରି ପୌର ପରିଷଦ, ବାଲିମେଳା ବିଜ୍ଞାପିତ ଅଞ୍ଚଳ ପରିଷଦ ରେ ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର ଖୋଲା ଯାଇଥିଲେ ମଧ୍ୟ ଏପର୍ଯ୍ୟନ୍ତ ଏଠାକୁ କୌଣସି ଗ୍ରାମ ଫେରନ୍ତା ଶ୍ରମିକ ଆସିନାହାନ୍ତି। ଅନ୍ୟପକ୍ଷରେ ଅଙ୍ଗନଓ୍ବାଡି କର୍ମୀଙ୍କ ଦ୍ୱାରା ଫେରୁଥିବା ଦାଦନ ଶ୍ରମିକଙ୍କ ତାଲିକା ପ୍ରସ୍ତୁତ କରାଯାଇ ସେମାନଙ୍କୁୁ ପରିବାରଠାରୁ ଅଲଗା ରହିବା ପାଇଁ କୁହାଯାଉଥିଲେ ମଧ୍ୟ ଆଭ୍ୟନ୍ତରୀଣ ଅଞ୍ଚଳରେ ଶ୍ରମିକମାନେ ଏହାକୁ ହେୟଜ୍ଞାନ କରୁଛନ୍ତି। ଏ ଦିଗରେ ଜିଲା ପ୍ରଶାସନ, ସାମାଜିକ କର୍ମୀ, ସ୍ବେଚ୍ଛାସେବୀ ଅନୁଷ୍ଠାନ ଏବଂ ଜନ ପ୍ରତିନିଧିମାନେ ଏଥିପ୍ରତି ବିଶେଷ ଗୁରୁତ୍ୱ ଦେଇ ଫେରନ୍ତା ଶ୍ରମିକମାନଙ୍କୁ ଚିହ୍ନଟ କରି ସେମାନଙ୍କ ସ୍ବାସ୍ଥ୍ୟ ପରୀକ୍ଷା କରିବା ଆବଶ୍ୟକ। ଏହା ହୋଇପାରିଲେ ସୃଷ୍ଟି ହେଉଥିବା ଆଶଙ୍କା ଦୂର ହୋଇପାରିବ ବୋଲି ସାଧାରଣରେ ମତ ପ୍ରକାଶ ପାଉଛି।