ଛତ୍ରପୁର,୧୩ା୪(ଡି.ଏନ୍.ଏ.) – ରାଜ୍ୟ ସରକାର ଏପ୍ରିଲ ୩୦ ପର୍ଯ୍ୟନ୍ତ ଲକ୍ଡାଉନ୍ ଅବଧି ବୃଦ୍ଧି କରିଛନ୍ତି। ଏନେଇ ଏକ ବୈଠକ ସୋମବାର ଛତ୍ରପୁରସ୍ଥିତ ଜିଲାପାଳଙ୍କ କାର୍ଯ୍ୟାଳୟରେ ଅନୁଷ୍ଠିତ ହୋଇଥିଲା। ଏଥିରେ ଜିଲାପାଳ ବିଜୟ ଅମୃତା କୁଲାଙ୍ଗେ ଅଧ୍ୟକ୍ଷତା କରିଥିଲେ। କୃଷି, ଉଦ୍ୟାନ, ପାନୀୟ ଜଳ ବ୍ୟବସ୍ଥା ଉପରେ ଧ୍ୟାନ ଦିଆଯିବାକୁ ଏଥିରେ ଆଲୋଚନା ହୋଇଥିଲା। ଉକ୍ତ ବିଭାଗର ସମସ୍ତ ଅଧିକାରୀ ଓ କର୍ମଚାରୀ ନିଜ ହେଡକ୍ୱାର୍ଟରରେ ରହିବେ। ଏଥିରେ ଅବମାନନା କଲେ ସମ୍ପୃକ୍ତ କର୍ମଚାରୀ ଓ ଅଧିକାରୀଙ୍କ ବିରୋଧରେ ସ୍ଥାନୀୟ ଥାନାରେ ଏତଲା ଦିଆଯିବା ସହ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଜିଲାକୁ ଥିବା ସମସ୍ତ ପ୍ରବେଶ ପଥକୁ ଚେକ୍ପୋଷ୍ଟ କରାଯିବ ଏବଂ ତହସିଲଦାର ମାନେ ଏହାର ମନିଟରିଂ କରିବେ। ବିଭିନ୍ନ ବିଭାଗୀୟ ଅଧିକାରୀ ଓ ପୋଲସି ଏଠାରେ ଅହୋରାତ୍ର କାର୍ଯ୍ୟ କରିବେ। ପ୍ରବେଶ କରୁଥିବା ସମସ୍ତ ଯାନବାହନର ସମ୍ପୂର୍ଣ୍ଣ ବିବରଣୀ ଏଠାରେ ଏକ ରେଜିଷ୍ଟ୍ରରରେ ଉଲ୍ଲେଖ ରହିବ। ତହସିଲଦାରଙ୍କ ମାଧ୍ୟମରେ ଚାଷୀଙ୍କ ପାସ୍ ଦିଆଯିବ। ବାହାର ଫେରନ୍ତାଙ୍କୁ କ୍ୱାରାଣ୍ଟାଇନ୍ରେ ରଖାଯିବ। ଏଥିରେ ଅବହେଳା କଲେ ସମ୍ପୃକ୍ତ ବିଡିଓ ଓ ତହସିଲଦାରଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ। ଯେଉଁମାନେ ବାହାରୁ ଫେରିବେ ସେମାନଙ୍କ ପାଇଁ ୧୪ ଦିନିଆ ଆନୁଷ୍ଠାନିକ କ୍ୱାରାଣ୍ଟାଇନ୍ ବାଧ୍ୟତାମୂଳକ ରହିବ।
