ଭବାନୀପାଟଣା,୮।୮(ଡି.ଏନ.ଏ.) ଜିଲା ସ୍ବାସ୍ଥ୍ୟ ସମିତି ଓ ଜିଲା ସ୍ବାସ୍ଥ୍ୟ ପରିବାର କଲ୍ୟାଣ ବିଭାଗ ପକ୍ଷରୁ ବୁଧବାର ଜିଲା ମୁଖ୍ୟ ଚିକିତ୍ସାଳୟ ସମ୍ମିଳନୀ କକ୍ଷରେ ଜିଲାସ୍ତରୀୟ ସ୍ତନ୍ୟପାନ ସପ୍ତାହ ପାଳିତ ହୋଇଯାଇଛି। ଆୟୋଜିତ କାର୍ଯ୍ୟକ୍ରମରେ ଜିଲା ମୁଖ୍ୟ ଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀ ଡା. ବନଲତା ଦେବୀ, ଅତିରିକ୍ତ ଜିଲା ଜନସ୍ବାସ୍ଥ୍ୟ ଅଧିକାରୀ ଡା. ଅଶୋକ କୁମାର ଦାସ, ଏପିଡେମିଲୋଜିଷ୍ଟ ଡା. ସୁସିଲ କୁମାର ରଥ, ଡା. ରବୀନ୍ଦ୍ର କୁମାର ପାଣିଗ୍ରାହୀ, ଏଏନ୍ଏମ୍ ଟ୍ରେନିଂ ସେଣ୍ଟର ଅଧ୍ୟକ୍ଷା ତନ୍ମୟୀ ବେହେରା, ଆଶା ମେନେଜର ଅକ୍ଷୟ କୁମାର ରଣା, ଜିଲା ଜନସ୍ବାସ୍ଥ୍ୟ ଯୋଗାଯୋଗ ଅଧିକାରୀ ଖଗେନ୍ଦ୍ର ମାଝି ପ୍ରମୁଖ ଯୋଗଦେଇ ସ୍ତନ୍ୟପାନର ଉପକାରିତା, ଜନ୍ମହେବା ମାତ୍ରେ ଶିଶୁକୁ ମା’ର କଷ କ୍ଷୀର ନିଶ୍ଚୟ ଖାଇବାକୁ ଦେବା, ଜନ୍ମହେବାଠାରୁ ୬ ମାସ ପର୍ଯ୍ୟନ୍ତ ଶିଶୁକୁ କେବଳ ମାଫର କ୍ଷୀର ଦେବା ସାଙ୍ଗକୁ ମା’ର କ୍ଷୀର କିଭଳି ଶିଶୁ ସହଜରେ ହଜମକରେ, ମା’ଠାରୁ ସିଧା ସଳଖ ଶିଶୁ ପାଖକୁ ଆସୁଥିବାରୁ ଏହା ଜୀବାଣୁ ମୁକ୍ତ, ନିମୋନିଆ ଏବଂ ଡାଇରିଆ ପରି ସଂକ୍ରମଣରୁ ଶିଶୁକୁ ରକ୍ଷା ମିଳିଥାଏ, ଏହା ଶିଶୁକୁ ବୁଦ୍ଧିମାନ କରିଥାଏ, ଶିଶୁକୁ ଆଜ୍ମା (ଶ୍ୱାସରୋଗ) ଏବଂ ଆଲେର୍କିରୁ ମଧ୍ୟ ରକ୍ଷା କରିଥାଏ, ମା’ ଏବଂ ଶିଶୁ ମଧ୍ୟରେ ଭାବନାମତ୍କ ସମ୍ପର୍କକୁ ଦୃଢ କରିଥାଏ ସେ ସମ୍ପର୍କରେ ଉପସ୍ଥିତ ସମସ୍ତଙ୍କୁ ଅବଗତ କରାଇଥିଲେ। ଏହି ଅବସରରେ ମା’ର କ୍ଷୀରର ଉପକାରିତା ଉପରେ ଏକ ସଚେତନତା ଆଲୋଚନାଚକ୍ର, ବକୃତା ଓ କୁଇଜ୍ ପ୍ରତିଯୋଗିତା ଅନୁଷ୍ଠିତ ହୋଇଥିଲା। କୃତି ପ୍ରତିଯୋଗୀମାନଙ୍କୁ ଅତିଥିମାନେ ପୁରସ୍କୃତ କରିଥିଲେ।