ଦେବଗଡ଼ ଜିଲାର ବିଭିନ୍ନ ଗ୍ରାମରେ ଗତ କିଛିଦିନ ହେବ ହାତୀ ଆତଙ୍କ ଦେଖାଦେଇଛି। ସହର ବି ସେଥିରୁ ବାଦ୍ ପଡ଼ିନି। ବଣ ଜଙ୍ଗଲ ଛାଡ଼ି ଗାଁ ଓ ସହର ମୁହଁା ହେଉଥିବା ସେହି ହାତୀପଲଙ୍କୁ ରୋକିବା ବନ ବିଭାଗ କର୍ମଚାରୀଙ୍କ ପକ୍ଷେ ବି ସମ୍ଭବ ହୋଇପାରିନାହିଁ। ଏଥିଯୋଗୁ ଚାଷୀଙ୍କ ଫସଲ ଉଜୁଡୁଥିବା ବେଳେ ହାତୀ ଆକ୍ରମଣରେ ଏକାଧିକ ଲୋକଙ୍କ ଜୀବନ ଯାଇଛି। ହାତୀଙ୍କ ଉପଦ୍ରବ ସତେ ଯେମିତି ଦେବଗଡ଼ ଜିଲାରେ ନିତିଦିନିଆ ଘଟଣାରେ ପରିଣତ ହୋଇଛି। ଏପରି ପରିସ୍ଥିତିରେ ଚାରିଆଡ଼େ ଆତଙ୍କ ଖେଳିଯାଇଛି। ସନ୍ଧ୍ୟା ନଇଁବା ପରେ ଲୋକେ ପଦାକୁ ବାହାରୁ ନାହାନ୍ତି। କେତେକ କ୍ଷେତ୍ରରେ ହାତୀ ଓ ଗ୍ରାମବାସୀଙ୍କ ମଧ୍ୟରେ ମୁହଁାମୁହିଁ ପରିସ୍ଥିତି ସୃଷ୍ଟି ହୋଇଛି। ବନ ବିଭାଗ କେବଳ କ୍ଷତିପୂରଣ ଦେବ ବୋଲି ପ୍ରତିଶ୍ରୁତି ଦେଇ ନିଜର କର୍ତ୍ତବ୍ୟ ଶେଷ କରୁଥିବା ବେଳେ ଲୋକଙ୍କ ମଧ୍ୟରେ ଚାପା ଉତ୍ତେଜନା ଅଧିକାଂଶ ଗୁରୁତର ରୂପ ନେଇଛି। ବନ ବିଭାଗ ନିକଟରେ ଏହି ଖବର ଥିଲେ ସୁଦ୍ଧା ଏଥିପ୍ରତି ଆଖିଦୃଶିଆ ପଦକ୍ଷେପ ଗ୍ରହଣ କରାଯାଉ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ହାତୀପଲ ସହରମୁହାଁ ହେବାଯୋଗୁ ବର୍ତ୍ତମାନ ଜଙ୍ଗଲ ନିକଟରେ ରହୁଥିବା ରଜାମୁଣ୍ଡା, ଚର୍ଚ୍ଚ ସାହି, ରଙ୍ଗିଆଗୁଡ଼ା, ହାତୀଶାଳ, ତଅଁଳା ସାହି, ଜକତିପାଲି ସରକାରୀ ନର୍ସରି ଫାର୍ମ ପାଖ କଲୋନୀ ବାସିନ୍ଦା ଆତଙ୍କିତ ଅବସ୍ଥାରେ ଦିନ କାଟୁଛନ୍ତି। ପ୍ରତିଦିନ କୁରଡ଼କୋଡ଼ ଜଳପ୍ରପାତ ଉପରେ ନିର୍ଭର କରୁଥିବା ଲୋକେ ଆଉ ସେଠାକୁ ଯାଉ ନାହାନ୍ତି। ଫଳରେ ସେମାନଙ୍କ ପାଇଁ ସ୍ନାନ, ଶୌଚ କରିବାରେ ସମସ୍ୟା ସୃଷ୍ଟି ହୋଇଛି। ଅଧିକାଂଶ ସମୟରେ ହାତୀପଲ ଖାଦ୍ୟ ଅନ୍ବେଷଣରେ ଗାଁକୁ ଗାଁ ବୁଲୁଛନ୍ତି। ସେମାନେ କ୍ଷେତରେ ପଶି ଧାନ ଫସଲ ନଷ୍ଟ କରିବା ସହ ବଗିଚାର କଦଳୀ, ଅମୃତଭଣ୍ଡା ଏବଂ ପଣସ ଗଛକୁ ଭାଙ୍ଗି ଛିନ୍ଛତର କରୁଛନ୍ତି। ହାତୀପଲ ଘରଦ୍ୱାର ଭାଙ୍ଗି ଦେଉଥିବା ମଧ୍ୟ ନଜିର ରହିଛି। ଏଥିପ୍ରତି ବନ ବିଭାଗ ଓ ଜିଲା ପ୍ରଶାସନ ତରଫରୁ କ୍ଷତିଗ୍ରସ୍ତ ଲୋକଙ୍କୁ ଚିହ୍ନଟ କରିବା ଉପରେ ସାଧାରଣରେ ମତ ପ୍ରକାଶ ପାଇଛି। କ୍ଷତିଗସ୍ତଙ୍କୁ ଉପଯୁକ୍ତ କ୍ଷତିପୂରଣ ପ୍ରଦାନ ଏବଂ ବଣୁଆ ହାତୀଙ୍କ ଉପତ୍ାତରୁ ଦେବଗଡ଼ ସହରବାସୀଙ୍କୁ କିପରି ସୁରକ୍ଷା ଯୋଗାଇହେବ ସେଥିନିମନ୍ତେ ସ୍ବତନ୍ତ୍ର ଦୃଷ୍ଟିଦେବା ପାଇଁ ବୁଦ୍ଧିଜୀବୀ ମହଲରେ ଦାବି ହେଉଛି।
– ଶଶାଙ୍କ ଶେଖର ଝାଙ୍କର
