ବାରିପଦା ଅଫିସ,୧୧ା୬- ରାଜ୍ୟରେ କରୋନା ମହାମାରୀ ମୁକାବିଲା ପାଇଁ ମାସ୍କ, ଟେଷ୍ଟିଙ୍ଗ କିଟ୍, ପିପିଇ ଓ ର଼୍ୟାପିଡ୍ କୋଭିଡ୍ ଟେଷ୍ଟିଂ ମେଶିନ କିଣାରେ ଅନିୟମିତତା ହୋଇଥିବା ନେଇ କଂଗ୍ରେସ ଅଭିଯୋଗ କରିଛି। ଏନେଇ ସରକାରଙ୍କ ବିରୋଧରେ ଗୁରୁବାର ଦାବିପତ୍ର ଦେବାକୁ ଯାଇଥିତ୍ବା କଂଗ୍ରେସ କମିଟି କର୍ମକର୍ତ୍ତାଙ୍କୁ ଜିଲାପାଳଙ୍କ ସହ ଭେଟ କରାଇ ନ ଦେଇ ଉପେକ୍ଷା କରାଯିବା ପ୍ରତିବାଦରେ କଂଗ୍ରେସ କର୍ମକର୍ତ୍ତା ଧାରଣା ଦେବା ଚର୍ଚ୍ଚାର ବିଷୟ ହୋଇଛି।
ପୂର୍ବାହ୍ନ ୧୧ଟାରେ ଜିଲା କଂଗ୍ରେସ ପ୍ରତିନିଧି ଦଳ ଜିଲାପାଳଙ୍କୁ ଭେଟି ରାଜ୍ୟପାଳଙ୍କ ଉଦ୍ଦେଶ୍ୟରେ ଦାବିପତ୍ର ଦେବାକୁ ଯାଇଥିଲେ। ସେଠାରେ ମୁତୟନ ହୋଇଥିବା ପୋଲିସ କର୍ମଚାରୀମାନେ ଜିଲାପାଳଙ୍କୁ ଭେଟିବାକୁ ଦେଇ ନ ଥିଲେ। ୨ ଦିନ ତଳେ ଭାଜପାର ଏକ ପ୍ରତିନିଧି ଦଳ ଜିଲାପାଳଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଥିବା ବେଳେ କାହିଁକି କଂଗ୍ରେସ କର୍ମୀଙ୍କୁ ଭେଟିବାକୁ ଦିଆଯାଉ ନାହିଁ ବୋଲି କଂଗ୍ରେସ ଜବାବ ମାଗିଥିଲା। ଏହାର ପ୍ରତିବାଦରେ ଜିଲାପାଳଙ୍କ ମୁଖ୍ୟ ଫାଟକଠାରେ ସମସ୍ତ କଂଗ୍ରେସ କର୍ମକର୍ତ୍ତା ଧାରଣାରେ ବସିଥିଲେ। ମଧ୍ୟାହ୍ନ ୧୨ଟାରେ ଜିଲାପାଳ ନ ଆସି ତାଙ୍କ ପ୍ରତିନିଧି ଭାବେ ଜିଲା ଜରୁରିକାଳୀନ ଅଧିକାରୀ ସୁଜୟ କୁମାର ପତି ପହଞ୍ଚି କଂଗ୍ରେସଠାରୁ ଦାବିପତ୍ର ଗ୍ରହଣ କରିଥିଲେ। ଜିଲା କଂଗ୍ରେସ କମିଟି ସଭାପତି ହେମନ୍ତ ଦାସଙ୍କ ନେତୃତ୍ୱରେ ପୂର୍ବତନ ଏମ୍ପି ସୁଶୀଳା ତିରିଆ, ପୂର୍ବତନ ମନ୍ତ୍ରୀ ସରସ୍ବତୀ ହେମ୍ବ୍ରମ, ଯୋଗେଶ କୁମାର ଅଗ୍ରୱାଲ, ପ୍ରଦୀପ କୁମାର ରଥ, ଜ୍ୟୋତି ପ୍ରକାଶ ରଥ, ଶାନ୍ତନୁ ପାଲଙ୍କ ସମେତ ଏକାଧିକ ନେତା ଓ କର୍ମୀ ଯୋଗ ଦେଇଥିଲେ। ଜିଲା ପ୍ରଶାସନର କଂଗ୍ରେସକୁ ଏହିଭଳି ଭାବେ ଉପେକ୍ଷା କରିବା ଘଟଣାକୁ ସାଧାରଣରେ ନିନ୍ଦା କରାଯାଉଛି।