ଅନୁଗୋଳ ଅଫିସ,୧୦।୫: ଅନୁଗୋଳ ଜିଲାରେ ରବିବାର ସକାଳୁ ୧୩ ଜଣ କରୋନା ପଜିଟିଭ୍ ରୋଗୀ ଚିହ୍ନଟ ପରେ ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଛି। ଏହି ଆକ୍ରାନ୍ତଙ୍କ ମଧ୍ୟରୁ ୧୧ ଜଣ ସୁରଟ ଫେରନ୍ତା, ଜଣେ ମହାରାଷ୍ଟ୍ର ଫେରନ୍ତା ଥିବା ବେଳେ ଅନ୍ୟ ଜଣେ ଅନୁଗୋଳ ସଦରରୁ ବୋଲି ଜଣାପଡିଛି । ୧୨ ଜଣ କ୍ୱାରାଣ୍ଟାଇନରେ ଥିବା ବେଳେ ଜଣେ ସଦରରୁ ହେଇଥିବାରୁ ତାଙ୍କୁ ପ୍ରଶାସନ ପକ୍ଷରୁ ଚିହ୍ନଟ କରାଯାଇ ସେ କାହା କାହା ସଂସ୍ପର୍ଶରେ ଆସିଛନ୍ତି ସେ ନେଇ ତଥ୍ୟ ସଂଗ୍ରହ କରାଯାଉଛି। ତେବେ ଏହି ୧୩ ଜଣ ରୋଗୀ ଚିହ୍ନଟ ପରେ ଅନୁଗୋଳକୁ ରେଡ୍ ଜୋନ ଭାବେ ପରିଗଣିତ କରାଯିବ ବୋଲି କୁହାଯାଇଥିଲା। ତେବେ ଅପରାହ୍ନରେ ଏକ ଖବରଦାତା ସମ୍ମିଳନୀରେ ଜିଲାକୁ ରେଡ୍ଜୋନ୍ ଭାବେ ଘୋଷଣା କରାଯାଇ ନାହିଁ ବୋଲି ଜିଲାପାଳ ମନୋଜ ମହାନ୍ତି ସ୍ପଷ୍ଟ କରିଛନ୍ତି। ସେ କହିଛନ୍ତି ରେଡ୍ ଜୋନ୍ ଘୋଷଣା ତାଙ୍କ କ୍ଷମତା ବାହାରେ । ରାଜ୍ୟ ସରକାର କେବଳ ଏହି ଜୋନ୍ ଘୋଷଣା କରି ପାରିବେ । ଏଣୁ ସରକାରଙ୍କ ନିର୍ଦ୍ଦେଶ ନ ଆସିବା ଯାଏ ଅନୁଗୋଳ ପୂର୍ବ ଭଳି ରହିବ ।
