ଦାରିଙ୍ଗବାଡ଼ି,୧୧।୫(ଡି.ଏନ.ଏ)- ସରକାର ଗ୍ରୀନ୍ଜୋନ୍ରେ ଚାଷକାର୍ଯ୍ୟ ସମେତ ବିଭିନ୍ନ ଉନ୍ନୟନମୂଳକ କାମ ସାମାଜିକ ଦୂରତା ରଖି କରିବାକୁ ନିର୍ଦ୍ଦେଶ ଦେଇଛନ୍ତି। ଦାରିଙ୍ଗବାଡି ବ୍ଲକ ଅଞ୍ଚଳରେ ଏକ ଠିକାସଂସ୍ଥାରେ ଜିଲା ବାହାର ଶ୍ରମିକ କାମ କରୁଥିବା ନେଇ ରବିବାର ଉତ୍ତେଜନା ପ୍ରକାଶ ପାଇଛି।
ପ୍ରକାଶ ଯେ, ଶ୍ରାନିକେତା ପଞ୍ଚାୟତ ଦଣ୍ଡିମାଠାରେ ଏକ ଠିକାସଂସ୍ଥାର କ୍ରସରକୁ ଲାଗିଥିବା କ୍ୟାମ୍ପରେ ବାହାରୁ ଶ୍ରମିକ ଆସି ରହି କାମ କରୁଥିବା ଅଞ୍ଚଳବାସୀ ସ୍ଥାନୀୟ ବିଧାୟକ ସାଲୁଗା ପ୍ରଧାନ, ତହସିଲଦାର ନୀତିଶ କୁମାର ତ୍ରିପାଠୀ, ଆଇଆଇସି କୌଶିକ ମାଝୀ ଏବଂ ବିଡିଓ ଜଗଦୀଶ ଷଡ଼ଙ୍ଗୀଙ୍କୁ ଲିଖିତ ଅଭିଯୋଗ କରିଛନ୍ତି। ଉକ୍ତ ସଂସ୍ଥାକୁ ଗତ କିଛିଦିନ ହେଲା ବାହାର ଅଞ୍ଚଳର ଶ୍ରମିକ ଲୁଚିକରି ଆସି କାମ କରୁଛନ୍ତି। ଜିଲା ବାହାରୁ ଶ୍ରମିକ ଆସି ଏଠାରେ କାମ କଲେ ଆମେ ଆଉ କରୋନା କବଳରୁ ସୁରକ୍ଷିତ ରହିପାରିବୁ ନାହିଁ। କାରଣ କମ୍ପାନୀ ଲୋକେ ସ୍ଥାନୀୟ ଅଞ୍ଚଳ ଦୋକାନବଜାରକୁ ଆସୁଛନ୍ତି। ତେଣୁ ବାହାରୁ ଆସିଥିବା ଶ୍ରମିକଙ୍କୁ ଚିହ୍ନଟ କରି ପ୍ରଥମେ କ୍ୱାରାଣ୍ଟାଇନ୍ରେ ରଖାଯାଇ ଟେଷ୍ଟ ପରେ କାମରେ ନିୟୋଜିକ କରାଯାଉ ବୋଲି ଉଲ୍ଲେଖ ରହିଛି। ରବିବାର ଅଞ୍ଚଳବାସୀ ଉକ୍ତ କ୍ରସରରେ ପହଞ୍ଚତ୍ ଠିକାସଂସ୍ଥା କର୍ତ୍ତୃପକ୍ଷଙ୍କୁ ଏନେଇ ପଚାରିବାରୁ ଚାପା ଉତ୍ତେଜନା ଦେଖାଦେଇଥିଲା।
ଏନେଇ ଠିକାସଂସ୍ଥାର ଆକାଉଣ୍ଟାଣ୍ଟ କମଳାକାନ୍ତ ମଲ୍ଲିକଙ୍କୁ ପଚାରିବାରୁ ସେ କହିଛନ୍ତି ଯେ, ସଂସ୍ଥାକୁ କୌଣସି ଲୋକଙ୍କୁ ଅଣାଯାଇନାହିଁ। ଲକ୍ଡାଉନ ପୂର୍ବରୁ ପ୍ରାୟ ୪୦ ଜଣ କର୍ମଚାରୀ ଫସି ରହିଥିବାବେଳେ ସବ୍କଣ୍ଟ୍ରାକ୍ଟ ଦିଆଯାଇଥିବା ସଂସ୍ଥାର ପ୍ରାୟ ୧୨ ଜଣ ରାଜ୍ୟ ବାହାର ଶ୍ରମିକ ରହିଛନ୍ତି। ଏନେଇ ତହସିଲଦାର ତ୍ରିପାଠୀ କହିଛନ୍ତି ସୀମା ସିଲ୍ ହୋଇଛି, କୌଣସି ବ୍ୟକ୍ତି ଜିଲା ବାହାରୁ ଆସିଲେ ଜଣାପଡ଼ିବ। ଆଜିପର୍ଯ୍ୟନ୍ତ ସେଭଳି କେହି ଲୁଚି ଆସିନାହାନ୍ତି।