ଭବାନୀପାଟଣା,୨୧।୮(ଡି.ଏନ୍.ଏ.): କଳାହାଣ୍ଡି ଜିଲା ଭବାନୀପାଟଣାସ୍ଥିତ ଜିଲା ମୁଖ୍ୟ ଚିକିତ୍ସାଳୟରେ ବିଭିନ୍ନ ସମସ୍ୟା ଏବଂ ଅଧାରୁ ଅଧିକ ଡାକ୍ତର ପଦବୀ ଖାଲିଥିବା ସତ୍ତ୍ୱେ ଜାତୀୟସ୍ତରରେ ଡାକ୍ତରଖାନାକୁ କ୍ୱାଲିଟି ପ୍ରମାଣପତ୍ର ମିଳିଛି। ଏ ସମ୍ପର୍କରେ ଜାତୀୟ ସ୍ବାସ୍ଥ୍ୟ ମିଶନର ଅତିରିକ୍ତ ସଚିବ ମନୋଜ ଝଲାନୀ ପତ୍ର ଲେଖି ଓଡ଼ିଶା ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ କମିଶନର ତଥା ସଚିବ ଡ. ପ୍ରମୋଦ ମେହେରଙ୍କୁ ଜଣାଇଛନ୍ତି। ଦୁର୍ଘଟଣା ଜରୁରୀ ସେବା, ଫାର୍ମାସୀ ଏବଂ ଇଣ୍ଟେନ୍ସିଭ କେୟାର ୟୁନିଟ୍ ବ୍ୟତୀତ ଚିକିତ୍ସାଳୟରେ ୧୨ଟି ବିଭାଗକୁ ନେଇ ଯେଉଁ ସ୍ବାସ୍ଥ୍ୟସେବା ଯୋଗାଇ ଦିଆଯାଉଛି ତାହା ଉଲ୍ଲେଖଯୋଗ୍ୟ। ତେଣୁ ଜାତୀୟସ୍ତରରେ ଚିକିତ୍ସାଳୟ ଜାତୀୟ କ୍ୱାଲିଟି ସାର୍ଟିଫିକେଟ ପ୍ରଦାନ କରାଯାଇଛି। ଏଥି ନିମନ୍ତେ ଜୁଲାଇ ୨୨-୨୪ ତାରିଖ ପର୍ଯ୍ୟନ୍ତ ଏକ ତଦନ୍ତକାରୀ ଦଳ ଜିଲା ମୁଖ୍ୟ ଚିକିତ୍ସାଳୟ ପରିଦର୍ଶନ କରି ରିପୋର୍ଟ ପ୍ରଦାନ ପରେ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଜାତୀୟ କ୍ୱାଲିଟି ପ୍ରମାଣପତ୍ର ପ୍ରଦାନ କରାଯାଇଛି। କଳାହାଣ୍ଡି ଜିଲାର ମୁଖ୍ୟ ଚିକିତ୍ସାଳୟ ପରିଦର୍ଶନ ବେଳେ ୮୪% ନମ୍ବର ରଖି ସାର୍ଟିଫିକେଟ ପାଇବା ପାଇଁ ଯୋଗ୍ୟ ବିବେଚିତ ହୋଇଛି। ଏଥି ନିମନ୍ତେ ଜୁନାଗଡ଼ ବିଧାୟକ ତଥା ଶକ୍ତି, ଶିଳ୍ପ, ଏମ୍ଏସ୍ଏମଇ ଓ ଗୃହ ମନ୍ତ୍ରୀ ଦିବ୍ୟଶଙ୍କର ମିଶ୍ର କଳାହାଣ୍ଡି ଜିଲାରେ କାର୍ଯ୍ୟରତ ସ୍ବାସ୍ଥ୍ୟ ବିଭାଗର ସିଡିଏମ୍ଓଙ୍କ ସମେତ ସମସ୍ତ ଡାକ୍ତର ଓ ସ୍ବାସ୍ଥ୍ୟ କର୍ମଚାରୀଙ୍କୁ ଅଭିନନ୍ଦନ ଜଣାଇଛନ୍ତି। ସମସ୍ତ ଅସୁବିଧା ସତ୍ତ୍ୱେ ଜିଲାବାସୀଙ୍କୁ ଜିଲା ଚିକିତ୍ସାଳୟ ସେବା ଯୋଗାଇ ଦେଉଥିବାରୁ ମନ୍ତ୍ରୀ ମିଶ୍ର ସାଧୁବାଦ ଜଣାଇବା ସହ କଳାହାଣ୍ଡି ଜିଲାରେ ସ୍ବାସ୍ଥ୍ୟସେବାକୁ ଲୋକାଭିମୁଖୀ କରିବା ପାଇଁ ସମସ୍ତ ପ୍ରକାର ସହଯୋଗ କରିବା ନିମନ୍ତେ ମତ ଦେଇଛନ୍ତି।