ବାହାନଗା,୧୧।୪(ଡି.ଏନ୍.ଏ.): ବାଲେଶ୍ୱର ଜିଲା ବାହାନଗା ବ୍ଲକର ବିଭିନ୍ନ ଗୋଦାମ ଉପରେ ଜିଲା ଯୋଗାଣ ଓ ଖାଉଟି ବିଭାଗ ପକ୍ଷରୁ ଶନିବାର ଚଢ଼ାଉ କରାଯାଇଛି। କରୋନା ଭାଇରସ୍ ସଂକ୍ରମଣ ନ ହେବା ପାଇଁ ସରକାର ଗତ ୨୨ତାରିଖଠାରୁ ଲକ୍ଡାଉନ୍ ଘୋଷଣା କରିଛନ୍ତି। ଫଳରେ ଅତ୍ୟାବଶ୍ୟକୀୟ ସାମଗ୍ରୀ ବିକ୍ରି ଉପରେ କୌଣସି ପ୍ରତିବନ୍ଧକ ଲାଗି ନ ଥିବାରୁ କିଛି ଅସାଧୁ ବ୍ୟବସାୟୀ ଏହି ସମୟରେ ଚଢ଼ାଦରରେ ଖାଉଟିମାନଙ୍କୁ ଶୋଷଣ କରୁଥିବା ଅଭିଯୋଗ ହୋଇଥିଲା। ଏନେଇ ବାଲେଶ୍ୱର ଜିଲା ଖାଉଟି ଓ ଯୋଗାଣ ବିଭାଗ ପକ୍ଷରୁ ବାହାନଗା ବ୍ଲକର ଗୋପାଳପୁର ଆଳୁଗୋଦାମ, ଗ୍ରୋସରୀ ଦୋକାନ ଏବଂ ବାହାନଗା ଆଳୁଗୋଦାମ ଉପରେ ଚଢ଼ାଉ କରାଯାଇଛି। ଏହି ଚଢ଼ାଉରେ ଜିଲା ଏସିଏସ୍ଓ ଅନାଦି ଚରଣ ସେଠୀ, ଏମ୍ଆଇଆଇ (ମାର୍କେଟିଂ ଇଣ୍ଟେଲିଜେନ୍ସ ଇନ୍ସିପେକ୍ଟର) ରୀତାରାଣୀ ମାଝି ପ୍ରମୁଖ ସାମିଲ ଥିଲେ। ଯାଞ୍ଚ ସମୟରେ ସମସ୍ତ ଦୋକାନ ଓ ଗୋଦାମରେ ଥିବା ଆଳୁ ପିଆଜ, ଅଦା, ରସୁଣ, ସମେତ ଡାଲି ଚୁଡ଼ା, ତେଲ ଆଦି ଅତ୍ୟାବଶ୍ୟକୀୟ ଦର୍ଦାମ ଠିକ୍ ଥିବା ସହିତ ସରକାରୀ ମୂଲ୍ୟର ତାଲିକା ନିୟମ ଅନୁଯାୟୀ କାନ୍ଥରେ ଲଗାଯାଇଥିବା ପ୍ରକାଶ କରିଥିଲେ।
