ମାଲକାନଗିରି,୬ା୭(ଡି.ଏନ୍.ଏ.): ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଛାତ୍ରୀଛାତ୍ରଙ୍କ ପାଇଁ ସରକାର ମଧ୍ୟାହ୍ନଭୋଜନର ବ୍ୟବସ୍ଥା କରିଛନ୍ତି। କିନ୍ତୁ ସରକାରୀ ଛୁଟି ଦିନଗୁଡ଼ିକରେ ଏହି ବ୍ୟବସ୍ଥା ନ ଥିଲେ ମଧ୍ୟ ଶିକ୍ଷକଙ୍କ ଖାମଖିଆଲ ତଥା ଅର୍ଥଲୋଭ ଜିଲାର ଶିକ୍ଷା ବ୍ୟବସ୍ଥା ପ୍ରତି ଅଙ୍ଗୁଳି ନିର୍ଦ୍ଦେଶ କରିଛି। ଏପରି ଅନିୟମିତତା ମାଲକାନଗିରି ଜିଲା ଖଇରପୁଟ ବ୍ଲକ ଅନ୍ତର୍ଗତ ବୃଡଡୁରାଲ ପଞ୍ଚାୟତ ବାଲିକୁଣ୍ଡ ପ୍ରାଥମିକ ବିଦ୍ୟାଳୟରେ ଦେଖିବାକୁ ମିଳିଛି। ଛୁଟିଦିନରେ ମଧ୍ୟ ଉକ୍ତ ବିଦ୍ୟାଳୟରେ ମଧ୍ୟାହ୍ନଭୋଜନ ଦିଆଯାଇଥିବା ବିଦ୍ୟାଳୟର ସରକାରୀ ନଥିପତ୍ରରୁ ଜଣାପଡ଼ିଛି। ସରକାରୀ ତାଲିକା ଅନୁଯାୟୀ, ଗତ ଜୁନ୍ ୩୦ ତାରିଖ ରବିବାର ସରକାରୀ ଛୁଟି ସତ୍ତ୍ୱେ ବାଲିକୁଣ୍ଡ ପ୍ରାଥମିକ ବଦ୍ୟାଳୟରେ ମଧ୍ୟାହ୍ନଭୋଜନ ଦିଆଯାଇଥିବା ସ୍କୁଲ କର୍ତ୍ତୃପକ୍ଷ ଶିକ୍ଷାଧିକାରୀଙ୍କୁ ମୋବାଇଲରେ ମେସେଜ ପଠାଇଛନ୍ତି। ଉକ୍ତ ଦିନ ୧୯ ଜଣ ଛାତ୍ରୀଛାତ୍ର ଉପସ୍ଥିତ ଏବଂ ମଧ୍ୟାହ୍ନଭୋଜନ ଦିଆଯାଇଥିବା ଦର୍ଶାଯାଇଛି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ଏପରି ମେସେଜ୍ ପାଇଲା ପରେ ବ୍ଲକ କିମ୍ବା ଜିଲା ଶିକ୍ଷାଧିକାରୀ ଏ ସମ୍ବନ୍ଧରେ କୌଣସି ପ୍ରଶ୍ନ ଉଠାଇନାହାନ୍ତି। ଘଟଣା ସମ୍ବନ୍ଧରେ ଶିକ୍ଷା ବିଭାଗର ପଦାଧିକାରୀ ଏବଂ ଜିଲାପାଳ ଉକ୍ତ ଗ୍ରାମକୁ ଯାଇ ସେହି ଗ୍ରାମର ଅଭିଭାବକ ଛାତ୍ରୀଛାତ୍ର ଏବଂ ସ୍କୁଲ ବିଦ୍ୟାଳୟର ନଥିପତ୍ର ଯାଞ୍ଚ କଲେ ଅନେକ ଅନିୟମିତତା ଲୋକଲୋଚନକୁ ଆସିପାରିବ ବୋଲି ସାଧାରଣରେ ଦାବି ହୋଇଛି। ଏ ନେଇ ଜିଲା ଶିକ୍ଷାଧିକାରୀଙ୍କ ସହ ଯୋଗାଯୋଗ ହୋଇ ପାରି ନ ଥିବାରୁ ତାଙ୍କର ପ୍ରତିକ୍ରିୟା ମିଳି ପାରିନାହିଁ।