ଢେଙ୍କାନାଳ ଅଫିସ, ୨୬ା।୯ – ଢେଙ୍କାନାଳ ଜିଲା ସଦ୍ଭାବନା ଗୃହରେ ବୁଧବାର ସଡ଼କ ସୁରକ୍ଷା କମିଟି ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ଜିଲାପାଳ ଭୂମେଶ ଚନ୍ଦ୍ର ବେହେରା ଅଧ୍ୟକ୍ଷତା କରି ସଂଶୋଧିତ ମୋଟରଯାନ ଆଇନର କାର୍ଯ୍ୟକାରିତା ନେଇ ଜନସଚେତନତା ସୃଷ୍ଟି ଏବଂ ଦୁର୍ଘଟଣା ହ୍ରାସ କରିବା ଦିଗରେ ଯତ୍ନବାନ ହେବାକୁ ଗୁରୁତ୍ୱାରୋପ କରିଥିଲେ।
ନୂତନ ମୋଟରଯାନ ଆଇନ ଅନୁଯାୟୀ ଗାଡ଼ି ଚାଳକଙ୍କୁ ହେଲମେଟ୍ ଏବଂ ସିଟବେଲ୍ଟ ବ୍ୟବହାର ସହିତ ଆବଶ୍ୟକ କାଗଜପତ୍ର ପାଖରେ ରଖିବା ଅନିବାର୍ଯ୍ୟ। ନିଶା ସେବନକାରୀ ଡ୍ରାଇଭରଙ୍କୁ କୌଣସି ପରିସ୍ଥିତିରେ କ୍ଷମା ଦିଆଯିବନାହିଁ ବୋଲି ଜିଲାପାଳ କହିଛନ୍ତି। ବେପରୁଆ ଗାଡ଼ିଚାଳନା, ଡ୍ରାଇଭିଂ ବେଳେ ମୋବାଇଲ ବ୍ୟବହାର, ମଦ୍ୟପାନ କରି ଗାଡ଼ି ଚଳାଇବା, ବିନା ସୁରକ୍ଷା ଉପକରଣରେ ଯାନବାହନ ଚଳାଚଳ ଦୁର୍ଘଟଣାର ପ୍ରମୁଖ କାରଣ। ଏଥିପ୍ରତି ପରିବହନ ବିଭାଗ ଏବଂ ପୋଲିସ ପକ୍ଷରୁ ପ୍ରଥମେ ସଚେତନ ସୃଷ୍ଟି କରାଯିବ। ଏହାପରେ ଯାଞ୍ଚ କଡ଼ାକଡ଼ି କରିବାକୁ ମତପ୍ରକାଶ ପାଇଥିଲା।
ଦୁର୍ଘଟଣା ରୋକିବାକୁ ପୂର୍ତ୍ତ ବିଭାଗ ରାସ୍ତା, ୫୫ ଓ ୨୦୦ ନମ୍ବର ଜାତୀୟ ରାଜପଥ, ଗ୍ରାମ୍ୟ ଉନ୍ନୟନ ରାସ୍ତାରେ ରେଡିୟମ ଷ୍ଟିକର ଲଗାଯିବ। ଦୁର୍ଘଟଣାପ୍ରବଣ ସ୍ଥାନ ଚିହ୍ନଟ କରି ହମ୍ପସ୍ ନିର୍ମାଣ କରାଯିବାକୁ ନିଷ୍ପତ୍ତି ହୋଇଛି। ୧୮ବର୍ଷରୁ ଊର୍ଦ୍ଧ୍ୱ ବୟସର ବ୍ୟକ୍ତି ଲାଇସେନ୍ସ ପାଇବାକୁ ଯୋଗ୍ୟ ବିବେଚିତ ହେବେ। ନାବାଳକଙ୍କ ଗାଡ଼ିଚାଳନା ଉପରେ ସତର୍କ ଦୃଷ୍ଟି ରଖାଯିବ। ନିୟମ ଉଲ୍ଲଂଘନକାରୀଙ୍କଠାରୁ ଜରିମାନା ଆଦାୟ କରାଯିବ। ଆବଶ୍ୟକସ୍ଥଳେ ସେମାନଙ୍କ ଲାଇସେନ୍ସ ରଦ୍ଦ ହେବ। ଶିକ୍ଷାନୁଷ୍ଠାନରେ ନିଯୋଜିତ ବସ୍ଗୁଡ଼ିକ ସିଟ୍ ଅନୁଯାୟୀ ପିଲା ପରିବହନ କରିବେ। କ୍ଷମତାଠାରୁ ଅଧିକ ପରିବହନ କରିବା ଦଣ୍ଡନୀୟ ଅପରାଧ। ଏହାର ଯାଞ୍ଚ କରିବାକୁ ଆଞ୍ଚଳିକ ପରିବହନ ଅଧିକାରୀ ଶ୍ରୀବତ୍ସ ଦଳେଇଙ୍କୁ ନିର୍ଦ୍ଦେଶ ଦିଆଯାଇଛି।
ବୈଠକରେ ଅତିରିକ୍ତ ଏସ୍ପି ବିନୟ କାମିଲା, ପୂର୍ତ୍ତ ବିଭାଗ ନିର୍ବାହୀ ଯନ୍ତ୍ରୀ ମନୋରଞ୍ଜନ ବିଶ୍ୱାଳ, ଜିଲା ରେଡ୍କ୍ରସ୍ ଶାଖା ଉପସଭାପତି ବିରଞ୍ଚତ୍ ନାରାୟଣ ପାଣି, ଶିକ୍ଷାବିତ୍ ପ୍ରଦ୍ୟୁମ୍ନ ରଥ, ଏସ୍ଡିପିଓ ଶ୍ରୀହର୍ଷ ମିଶ୍ର, ଟାଉନ ଥାନାଧିକାରୀ ଜ୍ଞାନରଞ୍ଜନ ସାମଲ, ଏନ୍ଏଚ୍ଏଆଇ ଅଧିକାରୀ, ଟ୍ରକ୍ ଓନର୍ସ ଆସୋସିଏଶନ, ମୋଟର ତାଲିମ କେନ୍ଦ୍ର କର୍ମକର୍ତ୍ତାଙ୍କ ସମେତ କମିଟି ସଦସ୍ୟମାନେ ଉପସ୍ଥିତ ଥିଲେ।