ଜି.ଉଦୟଗିରି,୧୩ା୧(ଡି.ଏନ.ଏ.)-ଜି.ଉଦୟଗିରି ସହର ତଥା ଆଖପାଖ ଅଞ୍ଚଳରେ ଗତ ତିନିଦିନ ଧରି ଶୀତର ଲହରି ଜାରି ରହିଛି। ସୋମବାର ପାରଦ ୭ ଡିଗ୍ରୀ ସେଲ୍ସିୟସ୍ ରହିଥିଲେ ମଧ୍ୟ ସହରର ବିଭିନ୍ନ ସ୍ଥାନରେ ତୁଷାରପାତ ଦେଖାଦେଇଛି। ବିଶେଷକରି ୯ ନମ୍ବର ୱାର୍ଡର କିଛି ଚାଷଜମିରେ ଏପରି ତୁଷାରପାତ ହୋଇଥିବା ଦେଖିବାକୁ ମିଳିଥିଲା। ପ୍ରବଳ ଶୀତ ସାଙ୍ଗକୁ କୋହଲିଆ ପବନ ବୋହୁଥିବା ଯୋଗୁ ସକାଳ ୧୦ଟା ପର୍ଯ୍ୟନ୍ତ ଜି.ଉଦୟଗିରି ବଜାର ସାରା ଖାଲି ଖାଲି ଲାଗୁଥିଲା। ଘନ କୁହୁଡ଼ି ଯୋଗୁ କଳିଙ୍ଗା ଘାଟିରେ ଯାନବାହାନ ଚଳାଚଳରେ ଅସୁବିଧା ହେଉଛି ବୋଲି ଘରୋଇ ମଟର କର୍ମଚାରୀ ସଂଘ ସଭାପତି ରାଜେନ୍ଦ୍ର କୁମାର ମହାପାତ୍ର କହିଛନ୍ତି। ସର୍ବନିମ୍ନ ତାପମାତ୍ରା ୭ ଡିଗ୍ରୀ ରହୁଥିବାରୁ ଚାଷୀମାନେ ଶୀତଦିନିଆ ପନିପରିବା ପାଇଁ ବିଶେଷ ଯନତ୍ବାନ ରହିବାକୁ କୃଷି ବୈଜ୍ଞାନିକ ଅକ୍ଷୟ କୁମାର ସେଠୀ କହିଛନ୍ତି।