କେନ୍ଦୁଝର, ୨୦ା୬ (ସ୍ବ.ପ୍ର.)- କେନ୍ଦୁଝର ଜିଲାର ଲାଇଫଲାଇନ କୁହାଯାଉଥିବା ୨୦ ନମ୍ବର ଜାତୀୟ ରାଜପଥ ମରାମତି ଅଭାବରୁ ଶୋଚନୀୟ ହୋଇପଡିଛି। ଏହାକୁ ଜିଲାର ‘ଜୀବନ ରେଖା’ କୁହାଯାଉଥିବା ବେଳେ ବିଭିନ୍ନ ସ୍ଥାନରେ ଦୁର୍ଘଟଣା ଘଟି ଧନଜୀବନ ହାନୀର କାରଣ ସାଜିଛି। ମୃତ୍ୟୁଯନ୍ତା ପାଲଟିଥିବା ରାଜପଥ ସମସ୍ୟା ପ୍ରତି କାହାରି ନଜର ନ ଥିବା କୁହାଯାଉଛି। ଏହି ଜାତୀୟ ରାଜପଥକୁ ୪ ଲେନ ବିଶିଷ୍ଟ କରାଯାଇଥିଲେ ମଧ୍ୟ ବିଭିନ୍ନ ସ୍ଥାନରେ କାମ ଅଧପନ୍ତରିଆ ହୋଇ ପଡରହିଛି। ଏସବୁ ସ୍ଥାନରେ ସର୍ବଦା ଦୁର୍ଘଟଣା ଘଟୁଥିଲେ ମଧ୍ୟ କାମ ଶେଷ କରାଯାଉନାହିଁ । ବିଭାଗୀୟ ଅଧିକାରୀ ରାସ୍ତାରେ ଏକାଧିକ ସ୍ଥାନରେ ଟୋଲ ଗେଟ୍ ବସାଇ ଅର୍ଥ ଆଦାୟରେ ବ୍ୟସ୍ତ ରହୁଥିବା ଲକ୍ଷ୍ୟ କରାଯାଉଛି। ପାଣିକୋଇଲି ଠାରୁ ରିମୁଳି ପର୍ଯ୍ୟନ୍ତ ଏବଂ କେନ୍ଦୁଝରଠାରୁ ଆନନ୍ଦପୁର ପର୍ଯ୍ୟନ୍ତ ଅନେକ ସ୍ଥାନରେ ପୋଲ ଓ ରାସ୍ତା କାମ ଶେଷ ହୋଇନାହିଁ। ଫଳରେ ସମସ୍ତ ଗାଡି ସେଠାରେ ଗୋଟିଏ ପାର୍ଶ୍ୱ ରାସ୍ତା ଦେଇ ଯିବାଆସିବା କରୁଛି । ଗତ ଏପ୍ରିଲ ମାସ ସୁଦ୍ଧା ଜିଲାର ବିଭିନ୍ନ ରାସ୍ତାରେ ୫୬ଟି ଦୁର୍ଘଟଣା ଘଟି ୩୦ ଜଣଙ୍କ ଜୀବନ ଯାଇଛି। ୩୨ ଜଣ ଗୁରୁତର ଓ ୫୯ ଜଣ ସାମାନ୍ୟ ଆହତ ହୋଇଛନ୍ତି। ତନ୍ମଧଧ୍ୟରୁ ୨୦ ନମ୍ବର ଜାତୀୟ ରାଜପଥରେ ଦୁର୍ଘଟଣା ଅଧିକ ଘଟିଥିବା ବିଭାଗ ପକ୍ଷରୁ କୁହାଯାଉଛି । ଛୋଟ ଛୋଟ ଦୁର୍ଘଟଣାକୁ ନେଇ ପୋଲିସ ମକଦ୍ଦମା କରୁ ନ ଥିବାରୁ ଏହାର ବାସ୍ତବ ଚିତ୍ର ଲୋକଲୋଚନକୁ ଆସିପାରୁନାହିଁ ା
ଅନ୍ୟପକ୍ଷେ ରାସ୍ତା ସମ୍ପ୍ରସାରଣ ବେଳେ ଏହା ପାର୍ଶ୍ୱରେ ଥିବା ରାଜାରାଜୁଡା ଅମଳର ବହୁ ଆମ୍ବ, ଜାମୁ, ନିମ୍ବ, ବର, ଅଶ୍ୱତଥ ଗଛ ସମେତ ଜଙ୍ଗଲ ଜମିରୁ ଗଛ କଟାଯାଉଛି। ସେହି ତୁଳନାରେ ରାସ୍ତା କଡରେ ବୃକ୍ଷ ରୋପଣ କାର୍ଯ୍ୟ କରାଯାଉ ନାହିଁ ା ଜାତୀୟ ରାଜପଥ ପାର୍ଶ୍ୱ ଏକ ପ୍ରକାର ଗଛ ବିନା ଛାୟା ଶୂନ୍ୟ ହୋଇପଡିଥିବାରୁ ଯାତ୍ରୀମାନେ ହଇରାଣ ହେଉଛନ୍ତି। ଏପରିସ୍ଥଳେ ବସ୍ଷ୍ଟପଗୁଡିକରେ ବିଶ୍ରାମସ୍ଥଳୀ ମଧ୍ୟ ନିର୍ମାଣ କରାଯା ଇ ନାହିଁ ା । ଯାତ୍ରୀମାନେ ଖରା ଓ ବର୍ଷାରେ ରାସ୍ତାକଡରେ ଠିଆ ହୋଇ ବସକୁ ଅପେକ୍ଷା କରିବାକୁ ବାଧ୍ୟ ହେଉଛନ୍ତି। ନବନିର୍ମିତ ରାସ୍ତା ପାର୍ଶ୍ୱ ଅନେକ ସ୍ଥାନରେ ଦବି ଯାଇଥିବା ଦେଖିବାକୁ ମିଳୁଛି। ଏ ନେଇ ପଥଚାରୀଙ୍କ ଲାଗି ରାସ୍ତାପାର୍ଶ୍ୱ ଅସୁରକ୍ଷିତ ହୋଇପଡିଛି। ସେହିପରି ବାଲିଆଗୁଡା (କେନ୍ଦୁଝର), ରାଇସୁଆଁ, ପଦ୍ମପୁର, ଢେଙ୍କିକୋଟ, ଶାଳପଡା ଆଦି ସ୍ଥାନରେ ନିର୍ମାଣ ହୋଇଥିବା ଅଣ୍ଡରପାସ ଓ ସର୍ଭିସ ରୋଡର ଅବସ୍ଥା ଶୋଚନୀୟ ହୋଇ ପଡିଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ମରାମତି କାମ ହେଉ ନ ଥିବାରୁ ରାସ୍ତାରେ ବଡ ବଡ ଖାଲଖମା ସୃଷ୍ଟି ହୋଇ ଦୁର୍ଗମ ହୋଇପଡିଛି। ସାମାନ୍ୟ ବର୍ଷା ହେଲେ ଲୋକେ ଯିବା ଆସିବାରେ ସମସ୍ୟା ଭୋଗୁଛନ୍ତି। ମାଧପୁର (କେନ୍ଦୁଝର) ସହର ର ବାସିନ୍ଦା ପ୍ରଦିପ ମହାନ୍ତି କହିଛନ୍ତି। ଅନ୍ୟପକ୍ଷେ ରାସ୍ତା ନିର୍ମାଣ ଶେଷ ନ ହେବା ଆଗରୁ ଟୋଲ ଆଦାୟ କରାଯିବା ନେଇ ଏଠାରେ ବହୁ ବାର ଆନ୍ଦୋଳନ କରାଯାଇଛି। ହେଲେ ଏକଥା କେହି ଶୁଣୁ ନାହାନ୍ତି। ଏ ନେଇ ନ୍ୟାୟାଳୟ ଦ୍ୱାରସ୍ଥ ହେବା ଏକମାତ୍ର ପନ୍ଥା ବୋଲି କହିଛନ୍ତି, ଆଇନଜୀବୀ ସନ୍ତୋଷ ସାହୁ। ଯୁବ ଓ ଶ୍ରମ ବିକାଶ ମଞ୍ଚର ସାଧାରଣ ସମ୍ପାଦକ ନବୀନ ପଲେଇ ତାଙ୍କ ପ୍ରତିକ୍ରିୟାରେ କହିଛନ୍ତି, ରାସ୍ତା, ପୋଲ ଓ ସର୍ଭିସ ରୋଡ ନିର୍ମାଣ କାମ ଶେଷ କରିବାରେ ଅଯଥା ବିଳମ୍ବ କରାଯିବା ଅତ୍ୟନ୍ତ ଦୁର୍ଭାଗ୍ୟଜନକ। ଏଥିଲାଗି ଅନେକ ସଡ଼କ ଦୁର୍ଘଟଣା ଘଟୁଛି।
