ଜୀବନ୍କେ ପାଏନ୍ ଛଡ଼େଇ ଭଂଗା ଘରେ ରହୁଛନ୍: ଆନନ୍ଦ ଲାଗି ସାତ୍ସପନ ଆବାସ ଘର
21 ଅତାବିରା, ୨୨।୬ (ଡି.ଏନ.ଏ): କେନ୍ଦ୍ର ଆର ରାଏଜ୍ ସରକାର ଗରିବ ଦୁଖି, ନିଅଁାସିମାନକୁ ଆବାସ ଯୋଜନାରେ ସାମିଲ କରି ପକାଘର ଯୁଗେଇ ଦେଉଛନ୍। ହେଲେ ଅନେକ୍ ଜାଗାରେ କେହେନ୍ସି କାରନ୍ରୁ ହକ୍ଦାର ହିତାଧିକାରୀ ଯୋଜନାରୁ ବାଦ୍ ପଡ଼ୁଛନ୍। ସେମାନେ ଦରକାରୀ କାଗଜପତର ଧରି ପଁଚେତ୍ରୁ ବ୍ଲକ ଅଫିସ ନରଦି ନରଦି ନିରାଶ ହେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବରଗଡ଼ ଜିଲା ଭେଡ଼େନ ବ୍ଲକ ଦେଶଭଟିଲି ପଁଚେତ୍ ଦେଶପଥର୍ଲାରେ।
ସୂଚନା ଅନ୍ସାରେ ଗଁାର ଆନନ୍ଦ ଦାଶ(୬୦)। ପରିବାର କହେଲେ ମାଏକିନା ଅଯୋଧ୍ୟା(୫୫) ଆର ୩ ଝି’କେ ନେଇ ତାକର ସଁସାର। ବଡ଼ଖା ଝି’ ବିହାଚୁରା ହେଇ ଶାଶ୍ ଘରେ ଖଟୁଥିଲାବେଲେ ବାକି ଦୁଇ ଝି’ ଘରେ ଅଛନ୍। ପରିବାରଟା ନିହାତି ଗରିବ୍ ହେଇଥିଲାବେଲେ ଗୁଟେ ନଡ଼ାଛପର୍ର ମାଏଟ୍ କୁରିଆରେ ବଡ଼ାଦୁଖେ ଜୀବନ୍ ବିତଉଛନ୍। ଅଂଚଲରେ ଗଲା ଗୁରୁବାର ବେଲବୁଡ଼େ ହେଇଥିବାର ବରଷାରେ ତାକର ଘର ଭିତରକେ ପାଏନ୍ ପଶି ଯାଇଥିଲା। ଘରର କଁାଥି ଭାଂଗିଯାଇଛେ। କୁଟୁମବସିଆ ରାଏତ୍ ସାରା ଉଜାଗର ରହି ପାଏନ୍ ଛେଦେଇଥିବାର କହିଛନ୍ ଆନନ୍ଦ। ଇଆଡ଼େ ପୈତୃକ ସଁପତି ଭାଗବଁଟା ନାଇଁ ହେଇଥିବାର ଲାଗି ଏହେଦେ ତାକର ପାସେ ଜମିବାଡ଼ି ନାଇଁ କହେଲେ ଚଲେ। ଏନ୍ତାଥି ଆନନ୍ଦ ସରକାରୀ ଯୋଜନାରେ ପକାଘର ଖଁଡ଼େ ପାଏବାର ଲାଗି ଅନେକ ଥର ପଁଚେତ୍ରୁ ବ୍ଲକ ତକ୍ ଗୁହାରି କରି ନିରାଶ ହେଇଛନ୍। ଏନ୍ତା କି ସେ ଥାନୀୟ ନେତାମାନକୁ ବି ଗୁହାରି କରି ନିରାଶ ହେଇଥିବାର କହିଛନ୍। ଇ ବାବ୍ଦେ ଭେଡ଼େନ ବ୍ଲକ ବିଡିଓ ମୂରଲୀଧର ନାୟକକୁଁ ପଚରାଲାରୁ ଯଦି ତାକର ନଁା ପ୍ରଧାନମନ୍ତ୍ରୀ ଆବାସ ଯୋଜନାର ତାଲିକାରେ ଥିବା ତ ନିହାତି ଭାବେ ଆବାସ ଘରଟେ ଯୁଗେଇ ଦିଆଯିବା। ନାଇଁହେଲେ ବିଜୁ ପକାଘର ଯୁଗେଇ ଦେବାରଲାଗି ହେଲେ ସର୍ଭେ ଉତାରୁ ପଦକ୍ଷେପ ନିଆଯିବା ବଲି ସେ କହିଥିଲେ।