ଦେବଗଡ଼,୮ା୫(ଡି.ଏନ.ଏ.)-ଲକ୍ଡାଉନ ସମୟରେ ଜୀବନ ଓ ଜୀବିକାର ଆଉ ଏକ ଉଦାହରଣ ସୃଷ୍ଟି କରିଛନ୍ତି ରିଆମାଲ ବ୍ଲକ ଆଡସ ଗ୍ରାମପଞ୍ଚାୟତ ସିଆରିଆ ଗ୍ରାମର ବିଶ୍ୱ ମା’ତାରିଣୀ ସ୍ବୟଂ ସହାୟକ ଗୋଷ୍ଠୀ। କରୋନା ସଂକ୍ରମଣକୁ ପ୍ରତିହତ ପାଇଁ ଲାଗୁ କରାଯାଇଥିବା ଲକ୍ଡାଉନର ସମସ୍ତ ନିୟମକୁ ଶୃଙ୍ଖଳାର ସହିତ ପାଳନ କରି ସେମାନେ ଗାଁ କଟାରେ ବୈଷୟିକ ଜ୍ଞାନ କୌଶଳରେ ମାଛଚାଷ କରି ଭଲ ରୋଜଗାର କରିପାରିଛନ୍ତି । ଜିଲା ମତ୍ସ୍ୟ ବିଭାଗର ସୂଚନା ଅନୁଯାୟୀ ଗ୍ରାମପଞ୍ଚାୟତ ପୋଖରୀ ଓ ଅନ୍ୟାନ୍ୟ ଜଳଉତ୍ସରେ ସ୍ବୟଂ ସହାୟକ ଗୋଷ୍ଠୀ ଦ୍ୱାରା ମାଛଚାଷ ଯୋଜନାରେ ୨୦୧୯-୨୦ ଆରମ୍ଭ ହୋଇଥିଲା। ପଞ୍ଚାୟତ ଅଧୀନସ୍ଥ ଗାଁ କଟାକୁ ୫ ବର୍ଷ ପାଇଁ ସ୍ବୟଂ ସହାୟକ ଗୋଷ୍ଠୀ ଲିଜ୍ ସୂତ୍ରରେ ନେଇ ମାଛଚାଷ ଆରମ୍ଭ କରିଥିଲେ। ମତ୍ସ୍ୟ ବିଭାଗ ପକ୍ଷରୁ ସେମାନଙ୍କୁ ଆବଶ୍ୟକୀୟ ବୈଷୟିକ ଜ୍ଞାନ କୌଶଳ ଏବଂ ସରକାରଙ୍କ ଦ୍ୱାରା ନିର୍ଦ୍ଧାରିତ ରିହାତି ଯୋଗାଇ ଦିଆଯାଇଥିଲା। ମାଛଚାଷର ପ୍ରଥମ ଅମଳରୁ ସେମାନେ ୫ କୁଇଣ୍ଟାଲ ମାଛ ସେହି ଗ୍ରାମରେ ହିଁ ବିକ୍ରୟ କରି ୭୦ ହଜାର ଟଙ୍କା ରୋଜଗାର କରିପାରିଛନ୍ତି। ୧୦ଜଣ ସଦସ୍ୟ ବିଶିଷ୍ଟ ଏହି ସ୍ବୟଂ ସହାୟକ ଗୋଷ୍ଠୀର ସଭ୍ୟମାନେ ଏଥିପାଇଁ ବେଶ୍ ଉତ୍ସାହିତ ଅଛନ୍ତି। ଆଗାମୀ ଦିନରେ ଆହୁରି ଭଲ ଭାବେ ମାଛଚାଷ କରି ପରବର୍ତ୍ତୀ ଅମଳରେ ଅଧିକ ରୋଜଗାର କରିବାର ଲକ୍ଷ୍ୟ ରଖିଛନ୍ତି ବୋଲି ଜିଲା ମତ୍ସ୍ୟ ଅଧିକାରୀ ନରୋତ୍ତମ ନାୟକ ପ୍ରକାଶ କରିଛନ୍ତି। ଲକ୍ଡାଉନ ସମୟରେ ଏହି ସ୍ବୟଂ ସହାୟକ ଗୋଷ୍ଠୀର ଆର୍ଥିକ ଉପାର୍ଜନ ଗ୍ରୁପର ମହିଳାମାନଙ୍କ ମୁହଁରେ ହସ ଫୁଟାଇ ପାରିବା ସହ ଅନ୍ୟ ସ୍ବୟଂ ସହାୟକ ଗୋଷ୍ଠୀ ପାଇଁ ଏକ ଉଦାହରଣ ସୃଷ୍ଟି କରିପାରିଛି। ସୂଚନାଯୋଗ୍ୟ, ଅଧିକ ମାଛ ଉପତ୍ାଦନ ସହିତ ପୃଷ୍ଟି ସାଧନ ଓ ସ୍ବୟଂ ସହାୟକ ଗୋଷ୍ଠୀ ମାଧ୍ୟମରେ ମହିଳାମାନଙ୍କୁ ସ୍ବାବଲମ୍ବୀ ଓ ଅଧିକ ରୋଜଗାରକ୍ଷମ କରିବା ଏହି ଯୋଜନାର ମୂଳଲକ୍ଷ୍ୟ ରହିଛି।