ଅନୁଗୋଳ ଅଫିସ, ୧୭।୬
କରୋନା ମହାମାରୀ ସମୟରେ ଜୀବନ ବଡ଼ ନା ଜୀବିକା। ଏ ନେଇ ଥିବା ଦ୍ୱନ୍ଦ୍ୱ ଦୂର ହୋଇ ନ ଥିବାବେଳେ ଜୀବିକାକୁ ପ୍ରାଧାନ୍ୟ ଦେଇ କର୍ମସ୍ଥଳୀ ଅନୁଗୋଳରେ ପହଞ୍ଚିଛନ୍ତି ପଶ୍ଚିମବଙ୍ଗ ମେଦିନପୁର ଅଞ୍ଚଳର ଶମ୍ଭୁନାଥ ଭୂୟାଁ। ନିଜ ସାଇକେଲରେ ସେ ଦୀର୍ଘ ୪୪୩ କିଲୋମିଟର ଅତିକ୍ରମ କରି ଅନୁଗୋଳରେ ପହଞ୍ଚିବା ପରେ ତାଙ୍କୁ ୭ ଦିନ ପାଇଁ ସଙ୍ଗରୋଧ କେନ୍ଦ୍ରରେ ରଖାଯାଇଛି। ପରିବାର ପ୍ରତିପୋଷଣ ଚିନ୍ତା ତାଙ୍କୁ କର୍ମକ୍ଷେତ୍ରକୁ ଟାଣି ଆଣିଥିବା ଶମ୍ଭୁନାଥ କହିଛନ୍ତି।
ଶମ୍ଭୁନାଥଙ୍କ କହିବା ଅନୁଯାୟୀ, ଅନୁଗୋଳରେ ସେ ବ୍ୟାଗ ସିଲେଇ କାମ କରନ୍ତି। ପାରିଶ୍ରମିକ ଭାବେ ଯାହା ପାଆନ୍ତି ସେଥିରେ ତାଙ୍କ ପରିବାର ଚଳିଥାଏ। ଲକ୍ଡାଉନ ଘୋଷଣା ପୂର୍ବରୁ ସେ ଘରକୁ ଯାଇଥିଲେ। ଏହାପରେ କଟକଣା ଯୋଗୁ ଆଉ ଫେରିପାରି ନ ଥିଲେ। କରୋନା ସଂକ୍ରମଣ ଭୟରେ ସେ ୩ ମାସ ଘରେ ବସିରହିଥିଲେ। ହେଲେ ପରିବାର ଚଳାଇବା କଷ୍ଟକର ହୋଇପଡିବାରୁ ସେ ଜୀବନକୁ ବିପଦରେ ପକାଇ ଜୀବିକା ବଞ୍ଚାଇବାକୁ ଇଚ୍ଛା ପ୍ରକାଶ କରିଥିଲେ। ସେଥିପାଇଁ ସାଇକେଲଟିଏ ଧରି ଅନୁଗୋଳ ଅଭିମୁଖେ ବାହାରି ପଡ଼ିଥିଲେ। ୩ ଦିନ ଧରି ସାଇକେଲ ଚଳାଇ ଓ ଚା’ ବିସ୍କୁଟ ଖାଇ ସେ ଅନୁଗୋଳରେ ପହଞ୍ଚିଥିଲେ। ରାତିରେ ସାଇକେଲ ଚଳାଇବାକୁ ଭୟ ଲାଗୁଥିଲେ ମଧ୍ୟ ବାଧ୍ୟହୋଇ ସେ ଦୀର୍ଘ ପଥ ଅତିକ୍ରମ କରିଥିଲେ। ରାତି ଅଧିକ ହେଲେ ରାସ୍ତା ପାର୍ଶ୍ୱରେ ଶୋଇପଡୁଥିଲେ। ଅନୁଗୋଳରେ ପହଞ୍ଚତ୍ବା ପରେ ପୌରପାଳିକା ପକ୍ଷରୁ ତାଙ୍କୁ କ୍ବାରାଣ୍ଟାଇନ ସେଣ୍ଟରରେ ରଖାଯାଇଛି। ୭ ଦିନିଆ ସଙ୍ଗରୋଧ ଶେଷ ହେବା ପରେ ସେ ଅନୁଗୋଳ ବଜାରରେ ବ୍ୟାଗ ସିଲେଇ କରି କିଛି ରୋଜଗାର କରିବେ ବୋଲି ଶମ୍ଭୁନାଥ କହିଛନ୍ତି।