ବିଶ୍ୱରେ ବିଚିତ୍ର ସ୍ଥିତି ସୃଷ୍ଟି କରିଛି କରୋନା। ଭୂତାଣୁ ସଂକ୍ରମଣରେ ଭୟଭୀତ ମଣିଷ। ପ୍ରତିଦିନ ଗଡୁଛି ମୁଣ୍ଡ। ବଢୁଛି ଆତଙ୍କ। ଏଥିରେ ପ୍ରଭାବିତ ହୋଇଛି ଜୀବନ ସାଙ୍ଗକୁ ଜୀବିକା। କରୋନା ଛଡ଼ାଇ ନେଇଛି ଅନେକଙ୍କ ହାତରୁ ରୋଜଗାର। ବେଶି କ୍ଷତିଗ୍ରସ୍ତ ହୋଇଛନ୍ତି ଅଣସଙ୍ଗଠିତ କ୍ଷେତ୍ରର ମେହନତି ମଣିଷ। ଭୋକ ଓ ଭୟର ଦୋଛକିରେ ଛିଡ଼ା ହୋଇଛି ମଣିଷ ଖୋଜୁଛି ବଞ୍ଚତ୍ବାର ସାଧନ। ଏସବୁ ଭିତରେ ସମୟର ଆହ୍ବାନକୁ ସମ୍ମାନ ଜଣାଇ ପେଟ ପାଇଁ ଆରମ୍ଭ ହୋଇଛି ପରିବର୍ତ୍ତନ। ଲକ୍ଡାଉନ୍ରେ ଜୀବନ ଚିନ୍ତାରେ ବୃତ୍ତି ବଦଳାଇଥିବା ଏଭଳି କେତେଜଣଙ୍କୁ ନେଇ ଧରିତ୍ରୀର ସ୍ବତନ୍ତ୍ର ଉପସ୍ଥାପନା…
-ରିପୋର୍ଟ: ଦୀନେଶ ଦାସ, ଓଡ଼ାପଡ଼ା
ସାଇକେଲ ଦୋକାନରେ ପଡ଼ିଛି ତାଲା
କଣ୍ଟାବଣିଆ ବଜାରରେ ସାଇକେଲ ମରାମତି ଦୋକାନ କରି ଚଳୁଥିଲି। କରୋନା କଟକଣା ପାଇଁ ପ୍ରାୟ ୨ମାସ ହେଲା ଦୋକାନ ବନ୍ଦ। ଘରେ ବାପା, ମାଆ, ସ୍ତ୍ରୀ ଓ ୨ ପୁଅଙ୍କୁ ନେଇ ୬ ପ୍ରାଣୀ କୁଟୁମ୍ବ। ହାତ ବାନ୍ଧି ବସି ରହିଲେ ସମସ୍ତେ ଓପାସ ରହିବେ। ତେଣୁ ପେଟ ପାଇଁ ଜୀବିକା ବଦଳେଇବାକୁ ପଡ଼ିଲା। କିଛିଦିନ ହେବ କଣ୍ଟାବଣିଆ ବଜାରରେ ବସି ପରିବା ବିକ୍ରି କରୁଛି। ସାଇକେଲ ମରାମତି କାମରୁ ଦିନକୁ ୫ଶହ ଟଙ୍କା ଯାଏ ରୋଜଗାର ହେଉଥିଲା। ଏବେ ପରିବା ବ୍ୟବସାୟରୁ କେବେ ୨ଶହ ତ ଆଉ କେବେ ୩ଶହ ଟଙ୍କା ହେଉଛି। ଦିନେ ଦିନେ ପରିବା ନଷ୍ଟ ହୋଇଯିବାରୁ ମୂଳ ବି ହାତରୁ ଯାଉଛି। ବଡ଼ କଷ୍ଟରେ ଚଳିବାକୁ ପଡୁଛି।
-ପ୍ରଦୀପ ସାହୁ, କଣ୍ଟାବଣିଆ
ଫାଷ୍ଟଫୁଡ୍ ବନ୍ଦ, ଶାଗ ସାହା
ରୋଜଗାର ଆଶାରେ କିଛି ବର୍ଷ ହେଲା ବାଲେଶ୍ୱରରୁ କଣ୍ଟାବଣିଆ ଆସିଥିଲି। କଣ୍ଟାବଣିଆ ବଜାରରେ ଫାଷ୍ଟଫୁଡ୍ ଦୋକାନଟିଏ ଦେଇ ରୋଜଗାର କରିବା ସହ ଅନୁଗୋଳ ଜିଲା ଗିରାଙ୍ଗରେ ସ୍ତ୍ରୀପୁଅକୁ ନେଇ ଭଡ଼ାରେ ରହୁଥିଲି। ଆଗରୁ ସବୁ ଠିକ୍ ଥିଲା। ହେଲେ କରୋନା ଆସିବା ଦିନରୁ ସବୁ ଏପଟ ସେପଟ ହେଇଯାଇଛି। ଫାଷ୍ଟଫୁଡ୍ ଦୋକାନ ବନ୍ଦ। ୨ମାସ ହେଲା ଘରଭଡ଼ା ବି ଦେଇନି। ତା’ ସାଙ୍ଗକୁ ପେଟ ଚିନ୍ତା। ତେଣୁ ବାଧ୍ୟ ହୋଇ ଶାଗ, ପରିବା ବିକୁଛି। ଏଥିରେ ପରିବାର ଚଳୁଛି। ଫାଷ୍ଟଫୁଡ୍ ଦୋକାନରୁ ଦିନକୁ ୫୦୦ରୁ ୬୦୦ଟଙ୍କା ବାହାରେ। ଏବେ ଶାଗ, ପରିବାରୁ ୩୦୦ଟଙ୍କା ହେବା ବି ମୁସ୍କିଲ। ଉଠା ଦୋକାନୀଙ୍କ ପାଇଁ ସରକାର ସହଯୋଗ କଲେ ଅନେକ ପରିବାର ବଞ୍ଚତ୍ୟାଆନ୍ତେ।
-ପଞ୍ଚାନନ ପାତ୍ର, ବାଲେଶ୍ୱର
ପାନ ବଦଳରେ ପରିବା ବେପାର
ବାପା ନାହାନ୍ତି। ପରିବାର କହିଲେ ମୁଁ, ମା’ ଆଉ ସାନ ଭାଇ। ପୂରା ଘରର ବୋଝ ମୋ’ ମୁଣ୍ଡରେ। ଆଗରୁ କଣ୍ଟାବଣିଆ ବଜାରରେ ପାନ ଦୋକାନଟିଏ ଦେଇଥିଲି। ସେଇଥିରୁ ଯାହା ମିଳେ ପରିବାର ଚଳେ। କରୋନା ଯୋଗୁ ସରକାର ଦୋକାନ ବନ୍ଦ କରିବାକୁ କହିଛନ୍ତି। ତେଣୁ ୨ମାସ ହେଲା ଦୋକାନ ବନ୍ଦ। କେମିତି ପେଟ ପୋଷିବୁ ଭାବି ବଜାରରେ ବସି ପରିବା ବିକୁଛି। ସେଇଥିରୁ ଯାହା ୨୦୦-୩୦୦ଟଙ୍କା ମିଳୁଛି, ସେଥିରେ କଷ୍ଟେ ମଷ୍ଟେ ପରିବାର ଚଳାଉଛି। ଆଗକୁ କ’ଣ ହବ କିଛି ଜଣାନାହିଁ। ଲକ୍ଡାଉନ୍ ଖୋଲିଲେ ପାନ ଦୋକାନ ସହ ପରିବା ବ୍ୟବସାୟ କରିବି ବୋଲି ଭାବିଛି।
-ସଞ୍ଜିତ ସାହୁ, କଣ୍ଟାବଣିଆ