ଜଗତ୍ସିଂହପୁର ଅଫିସ,୨ା୩: ମାତ୍ର ୩୬ ବର୍ଷ ବୟସରେ କିଡ୍ନୀ ରୋଗରେ ଆକ୍ରାନ୍ତ ହୋଇ ଜୀବନ ସହ ସଂଗ୍ରାମ କରୁଛନ୍ତି ଜଗତ୍ସିଂହପୁର ବ୍ଲକ ଅଧୀନ ଖଇରଙ୍ଗ ପଞ୍ଚାୟତ ନୂଆପାଟଣାର ଶତ୍ରୁଘ୍ନ ନାଥ। ମୁଲ ଲାଗି ପରିବାର ପୋଷଣ କରୁଥିବା ଶତ୍ରୁଘ୍ନ ୪ ମାସ ହେବ ଅସହ୍ୟ ଯନ୍ତ୍ରଣାରେ ଛଟପଟ ହେଉଛନ୍ତି। ଏକମାତ୍ର ରୋଜଗାରିଆ ପୁଅର ଏଭଳି ଦୁର୍ଦ୍ଦଷାରେ ଭାଙ୍ଗି ପଡିଛନ୍ତି ପରିବାର ଲୋକେ। ଏଣେ ଶତ୍ରୁଘ୍ନଙ୍କ ରୋଜଗାର ନ ଥିବାବେଳେ ଚିକିତ୍ସା ପାଇଁ ଅର୍ଥ ସାଜିଛି ବାଧକ। ଶତ୍ରୁଘ୍ନଙ୍କ ମା’ ମଞ୍ଜୁ ତାଙ୍କର ଗୋଟିଏ କିଡ୍ନୀ ପୁଅକୁ ଦେବା ପାଇଁ ସ୍ବୀକୃତି ପ୍ରଦାନ କରିଛନ୍ତି। କିନ୍ତୁ କିଡ୍ନୀ ପ୍ରତିରୋପଣ ପୂର୍ବ ଓ ପରବର୍ତ୍ତୀ ସମୟରେ ଆବଶ୍ୟକ ପାଖାପାଖି ୩ ଲକ୍ଷ ଟଙ୍କା ଯୋଗାଡ କରିବା ଏହି ପରିବାର ପାଇଁ ଚିନ୍ତାର କାରଣ ହୋଇଛି। ଡାକ୍ତରଙ୍କ ପରାମର୍ଶକ୍ରମେ କିଡ୍ନୀ ପ୍ରତିରୋପଣ ନ ହେଲେ ଶତ୍ରୁଘ୍ନଙ୍କ ଜୀବନ ପ୍ରତି ବିପଦ ବଢ଼ିବ। ଏକଥା ଶୁଣିବା ପରେ ପରିବାର ସଦସ୍ୟଙ୍କ ମୁଣ୍ଡରେ ଚଡକ ପଡିଯାଇଛି।
ଶତ୍ରୁଘ୍ନଙ୍କ ବାପା ପହଲି ଦୀର୍ଘ ବର୍ଷ ପୂର୍ବରୁ ସନ୍ନ୍ୟାସୀ ହୋଇ କୁଆଡେ ଚାଲି ଯାଇଛନ୍ତି। ମା‘ ମଞ୍ଜୁ ବହୁ କଷ୍ଟରେ ୩ ପୁଅଙ୍କୁ ବଡ କରିଛନ୍ତି। ବଡ଼ପୁଅ ଶତ୍ରୁଘ୍ନ ପାଖାପାଖି ୧୦ ବର୍ଷ ପୂର୍ବରୁ ବିବାହ କରିଥିବାବେଳେ ତାଙ୍କର ଏକ ୯ ବର୍ଷର ପୁଅ ଓ ୬ ବର୍ଷର ଝିଅ ଅଛି। ଶତ୍ରୁଘ୍ନ ଓ ତାଙ୍କ ତଳ ଭାଇ ପଞ୍ଚାନନ ମୂଲ ଲାଗି ଯାହା ରୋଜଗାର କରନ୍ତି ସେଥିରେ ପରିବାର ଭରଣପୋଷଣ ହୋଇଯାଏ। ସବୁଠାରୁ ସାନଭାଇ ସ୍ଥାନୀୟ ଏକ ମହାବିଦ୍ୟାଳୟରେ ଯୁକ୍ତ ଦୁଇରେ ଶିକ୍ଷାଲାଭ କରୁଛନ୍ତି। କେବଳ ଢିଅ ଖଣ୍ଡିକୁ ବାଦ ଦେଲେ ଜମି ବୋଲି ଗୁଣ୍ଠେ ନାହିଁ। ମୁଣ୍ଡ ଗୁଞ୍ଜିବାକୁ ୨ ବଖରା ଚାଳଘର ଭରସା। ଛପର କରିବାକୁ ସମ୍ବଳ ହେଉ ନ ଥିବାରୁ ପଲିଥିନ ଖଣ୍ଡେ ପକାଇ ତା’ ଭିତରେ ରହିଯାଉଛନ୍ତି ଶତ୍ରୁଘ୍ନଙ୍କ ପରିବାର। ଦେହମୁଣ୍ଡ ଖରାପ ହେଲେ ଏହି ପରିବାର ପାଇଁ ଦୁଃଖ ବଢିଯାଏ। ତଥାପି ଶତ୍ରୁଘ୍ନଙ୍କ ମନରେ ଅନେକ ସ୍ବପ୍ନ ଥିଲା। ସ୍ତ୍ରୀ, ୨ ସନ୍ତାନ, ମା’, ଭାଇଙ୍କ ମନରେ କେବେ କଷ୍ଟ ଦେବାକୁ ଚାହୁଁ ନ ଥିଲେ। ହେଲେ ସେ କ’ଣ ଜାଣିଥିଲେ ଦଇବ ଦାଉ ସାଧିବ? ୪ ମାସ ପୂର୍ବରୁ ତାଙ୍କର ୨ଟି ଯାକ କିଡ୍ନୀ ଖରାପ ଥିବା ଜଣାଯାଇଥିଲା। ପରେ କାମ ବନ୍ଦ। କେବଳ ତାଙ୍କର ନୁହେଁ, ସାନଭାଇ ପଞ୍ଚାନନ ମଧ୍ୟ ଆଉ କାମ କରିପାରୁନାହାନ୍ତି। ସପ୍ତାହରେ ୨ ଥର କଟକ ବଡ ଡାକ୍ତରଖାନା ନବାଆଣିବାରେ ପଞ୍ଚାନନ ବ୍ୟସ୍ତ। ୨ ରୋଜଗାରିଆ ପୁଅଙ୍କ ରୋଜଗାର ବନ୍ଦ ହୋଇଯିବା ପରେ ଏହି ପରିବାରରେ ଖାଦ୍ୟ ଚିନ୍ତା ଉତ୍କଟ ହେଲାଣି। ଯେହେତୁ ଶତୃଘ୍ନଙ୍କ ୨ଟି ଯାକ କିଡ୍ନୀ ଖରାପ ହୋଇଯାଇଛି ତେଣୁ ତୁରନ୍ତ ଗୋଟିଏ ପ୍ରତିରୋପଣ ହେବା ଉପରେ ଡାକ୍ତର ପରାମର୍ଶ ଦେଇଛନ୍ତି। ଶତୃଘ୍ନଙ୍କ ମା’ ମଞ୍ଜୁ କହିଛନ୍ତି, ଯେଉଁ ପୁଅ ଭରସାରେ ଜୀବନର ଅବଶିଷ୍ଟ ସମୟ କାଟିଦେବେ ବୋଲି ଭାବୁଥିଲେ ସେ ଆଜି ଜୀବନ ସଂଗ୍ରାମରେ। ଏ ବୟସରେ ପୁଅ, ବୋହୂ, ନାତି, ନାତୁଣୀ ଆଦିଙ୍କ ଦାୟିତ୍ୱ ତାଙ୍କ ଉପରେ ବୋଝ ଉପରେ ନଳିତା ବିଡା ସଦୃଶ ହୋଇଛି। ତେଣୁ ଜିଲାପାଳ ସହାୟତା ଯୋଗାଇଦେବାକୁ ସେ ନିବେଦନ କରିଛନ୍ତି।